Ադրբեջանը «կրակն է ընկել» այդ` իբրեւ բնապահպանական ակցիայի ձեռքը. Նաիրա Կարապետյան
ՆերքաղաքականԸստ «Եվրոպական ինտեգրացիա» ՀԿ նախագահ, ԱԺ նախկին պատգամավոր ՆԱԻՐԱ ԿԱՐԱՊԵՏՅԱՆԻ` Բերձորի միջանցքը որեւէ կերպ չի կարելի բացել որեւէ պահանջի դիմաց, որովհետեւ այն այդ դեպքում փակվելու-բացվելու է` մի քիչ երկար կամ կարճ:
— Ըստ իս` Արցախի հանրությունը գրագետ քայլ արեց, որ դադարեցրեց Կաշենի հանքավայրի շահագործումը եւ հրավիրեց միջազգային դիտորդների: Որեւէ միջազգային կազմակերպություն չարձագանքեց, եւ սրանով հաստատվեց, որ խնդիրը կապ չունի բնապահպանության հետ: Ադրբեջանն ինքն է «կրակն ընկել» այդ` իբրեւ բնապահպանական ակցիայի ձեռքը եւ մտածում է` ինչպես այն դադարեցնել` երեսը պահելով: Փոքր ակցիաներ են սկսել անել Բրյուսելում, եվրոպական քաղաքներում, բողոքի նոտաներ են հնչեցնում, թե լավ չեն լուսաբանվում այդ բնապահպանական ցույցերը: Նրանք գնալու են Բերձորի միջանցքից: Մեր հայրենակիցների զրկանքների գնով, եթե կարողանանք չկատարել պայմանը, որը մեր առաջ դրված է, սա մի փոքրիկ հաղթանակ է լինելու: Արցախի Հանրապետության սուբյեկտայնությունն այս շրջափակմամբ Ադրբեջանի կողմից բյուրեղացվեց: