Տղաներին ճանապարհեցին բանակ

Կրկին բազմամարդ էր Շիրակի մարզի Արթիկ խոշորացված համայնքի զինկոմիսարիատի բակը: Նորակոչիկների հերթական խումբը մեկնեց ծառայության հայրենիքի սահմաններն անառիկ պահելու։ Նրանց բանակ ճանապարհեցին ծնողներ, հարազատներ, ընկերներ։ Արթիկի «Սուրբ Գրիգոր Լուսավորիչ» եկեղեցու հոգևոր հովիվ Տեր Սողոմոն քահանա Մինասյանը օրհնեց տղաներին, ցանկանալով բարի ծառայություն, առողջ ու անփորձանք վերադարձ դեպի հայրական օջախներ։ Արթիկ խոշորացված համայնքի Նահապետավան գյուղից բանակ էր մեկնում ծառայության նորակոչիկ ԼՅՈՎԱ ՄԵԼՔՈՆՅԱՆԸ։ Նրա պապը Կարապետ Կարապետյանը, Իրավունքի հետ բացառիկ զրույցում նշեց. «Այսօր, բանակ ենք ճանապարհում թոռնիկիս Լյովային, բոլորին մաղթում ենք բարի ծառայություն, բարի վերադարձ, մեր երկրին էլ խաղաղություն։ Աստված տա երբեք պատերազմ չլինի։

Իսկ Հայրենյաց գյուղից հայրենիքին սրբազան պարտքը կատարելու էին մեկնում երեք նորակոչիկներ ՍԱՄՎԵԼ ԱԼԵՔՍԱՆՅԱՆԸ, ԱՐՄԵՆ ԽԱՉԱՏՐՅԱՆԸ և ՎԱՉԱԳԱՆ ՄԻՔԱՅԵԼՅԱՆԸ։ Վաչագանի եղբայրը ՆԱՐԵԿԸ, Արցախյան 44-օրյա պատերազմի մասնակից է, նա նշեց, որ շատ օգտակար խորհուրդներ է տվել կրտսեր եղբորը, քանի որ անցել է կյանքի այդ դպրոցը, ծառայության ժամանակ, ինչպես նաև պատերազմի բազմաթիվ փորձություններ հաղթահարել, սխրագործություններ կատարել, արժանացել մեդալների։

Նորակոչիկ Արմեն Խաչատրյանի պապն էլ Իշխան Խաչատրյանը, մեզ հետ զրույցում նշեց. «Ուրախությամբ ենք ճանապարհում թոռնիկիս, բոլոր մեր տղաներին, որպեսզի հենց այդ նույն ուրախ տրամադրությամբ էլ հայրենի տուն վերադառնան, ուրախության սեղաններով դիմավորենք։ Ես կուզենամ, որ բոլոր զինծառայողները, հատկապես նաև սպայական անձնակազմը շատ ուշադիր, աչալուրջ լինեն մեր զավակների հանդեպ, որպեսզի բանակում բացառվի որևէ զինվորի կյանքի կորուստ»։

Տուֆաշեն գյուղից էլ ծառայության մեկնեց ԱՐԹՈւՐ ՄԽԻԹԱՐՅԱՆԸ, Նոր Կյանք գյուղից նորակոչիկ ԳԱԳԻԿ ՂԱԶԱՐՅԱՆԸ։ Նրանք էլ նշեցին, որ մեկնում են ծառայության, որպեսզի շարունակեն մեր անմահ հերոսների անավարտ թողած գործը, պաշտպանեն իրենց մայրերին, քույրերին, որպեսզի կարողանան գիշերները հանգիստ քնել։ Բարի ծառայություն մեր նորակոչիկներին, խաղաղություն մեր երկրին: 

Պատրաստեց ՀՈՎՀԱՆՆԵՍ ՍԱՐԳՍՅԱՆԸ