Միակ բանը, որ պետք է անել՝ ձերբազատվելն է այս մարդկանցից. Արշակ սրբազան

Մայր Աթոռի դիվանապետ Գերաշնորհ Տ. ԱՐՇԱԿ արքեպիսկոպոս ԽԱՉԱՏՐՅԱՆԸ, անդրադառնալով Արցախում ստեղծված իրավիճակին, ասաց, որ պաշտոնական տեղեկատվությունը, որին պետք է իբրեւ հավատալ, եփվում է հայաստանյան այսօրվա իշխանության կողմից, որոնք իրենք իրենց են հերքում:

«Ստիպված մասնավոր աղբյուրներից, մեր թեմի տարբեր անձանցից ենք տեղեկատվություն ստանում: Տեղյակ ենք, որ որոշ խմբերի փորձում են տարհանել եւ հավաքել մի տեղ, մարդկանց անմիջական կարիքներին հասնել, բայց ես չգիտեմ՝ որքանով է արդյունավետ ստացվում կամ չի ստացվում», – ցավով ընդգծեց Արշակ սրբազանը:

Ինչ վերաբերում է փաշինյանական պնդումներին, թե այս պահին Արցախի հայության կյանքին սպառնացող անմիջական վտանգ չկա, Մայր Աթոռի դիվանապետը հարցով արձագանքեց. «Ի՞նչ գիտի, որ չկա, երբ տակավին գոյություն ունեն հազարավոր անհետ կորածներ: Մինչեւ հիմա չգիտենք, թե ինչքան կորուստ է եղել: Գյուղեր կան, բնակավայրեր կա, իմ ունեցած տեղեկությունների համաձայն, որոնց բնակիչների վերաբերյալ, բացարձակ որեւիցե տեղեկություն չունենք: Իսկ ի՞նչ գիտենք՝ իրենց կյանքին վտանգ սպառնո՞ւմ է, թե՝ ոչ: Ո՞ւմ ջրաղացին ենք ջուր լցնում դրանով»:

Այս ծանր հոգեբանական իրավիճակում, թե ինչպես մարդիկ կառավարեն իրենց հույզերը, Սրբազան հայրն ասաց. «Ինքս շատերին ասել եմ, որ պետք է զսպել էմոցիաները, պետք չէ ավելորդ հուզականությամբ կրակի վրա յուղ ավելացնել: Բայց ասելն այլ բան է, ապրելը՝ այլ: Խոսքով հնարավոր չէ մարդկանց մեջ շատ բան փոխել, գործնական քայլեր պետք է լինեն, որոշակի ապահովության զգացում պետք է ունենան: Եթե այդ ապահովության զգացումը չկա, մարդկանց մոտ տագնապներն են շատանում, անհանգստությունները, լարվածությունը, ագրեսիան եւ թշնամու դեմ չիրացված ագրեսիան վերադառնում է ներհասարակական կյանք, ու կյանքը դառնում է այնպիսին, ինչպիսին կա»:

Ինչ ակնկալել միջազգային հանրույթից եւ կառույցներից հանուն Արցախի ու արցախահայության փրկության՝ Արշակ սրբազանը շեշտեց. «Մոռացե՛ք, որ միջազգային հանրությունը պետք է ինչ–որ անմարդկային ջանքեր գործադրի Արցախում հայերի կյանքերը փրկելու համար: Արյունակից մարդիկ, եղբայրներ, իրարից մոտավորապես 400–500 կմ հեռավորության վրա են՝ Արցախում աղետալի վիճակ է, Երեւանում «սալյուտ» են կրակում: Երեւանում արձագանք չի ստանում աղիողորմ ճիչը Արցախի, դուք ինչպե՞ս եք պատկերացնում, որ այդ աղիողորմ ճիչը պետք է արձագանք ստանա Բրյուսելում, Ժնեւում կամ Նյու Յորքում»:

Ըստ սրբազանի` հարցը փակել են աղետալի սցենարով, եւ ինչ ցեղասպանական գործողության հնար կար, գործադրել են եւ թե՛ դե ֆակտո, թե՛ դե յուրե Արցախը դարձել է ադրբեջանական, ինչը ճանաչել է Հայաստանի իշխանությունը:

«Այն մարդիկ, ովքեր ամուր կպած են հողին, երբե՛ք չեն համակերպվելու այն իրողությանը, որ Արցախը լինելու է Ադրբեջանի կազմում: Եվ Եկեղեցին, որպես հաստատություն, երբե՛ք չի կարող համակերպվել այն իրողության հետ, որ Արցախը ադրբեջանական է, երբե՛ք չի կարող անտեսել պատմական ակնհայտ փաստը, որ Արցախը բնիկ հայկական հողատարածք է: Բայց եկեք ու տեսեք, որ այն անձինք, ովքեր այսօր ներկայացնում են Հայաստանի Հանրապետությունը ճիշտ հակառակը՝ չեն կարողանում պատկերացնել, որ այն կարող է լինել հայկական: Հիմա այս պայմաններում միակ բանը, որ պետք է անել՝ ձերբազատվելն է այս մարդկանցից, որպեսզի գան այնպիսի մարդիկ, ովքեր շոշափելիորեն պատրաստ են պաշտպանելու Հայաստանի ազգային շահերը: Պետք է ամեն ինչ արվի՝ աղետալի վիճակում հայտնված մարդկանց կյանքերը փրկելու համար», – ասաց Մայր Աթոռի դիվանապետը:

Արշակ սրբազանի գնահատմամբ՝ այս իշխանությունները վերջապես պետք է սթափվեն՝ իրենց ղեկավարի գլխավորությամբ եւ թողնեն հանգիստ ժողովրդին: Նա այս գնահատականը համարում է ոչ թե քաղաքական, այլ` հենց Ավետարանից բխող:

«Ո՞վ ասաց, որ ասվածն Ավետարանից չի բխում՝ հավատալ չար գործողություններով աչքի ընկնող մարդու հեռանալուն: Սա հակավետարանակա՞ն է: Եթե այդպես է, թող մեղադրեն նաեւ Գրիգոր Լուսավորչին, որ Տրդատ արքայի հետ կապված հայտարարություններ էր անում, Մեսրոպ Մաշտոցին եւ Սահակ Պարթեւին մեղադրեն, որ հասարակական կյանքի վերաբերյալ կանոններ էին սահմանում, թող մեղադրեն Ներսես Շնորհալուն…», – փաստերը շարունակեց թվել՝ Մայր Աթոռի բարձրաստիճան հոգեւորականը:

ՀՐԱՆՏ ՍԱՐԱՖՅԱՆ

Այս թեմայով Այս անգամ արդեն հայերին կանգնեցնելը շատ դժվար է լինելու…ժամանակը կգա եւ կտեսնեք. Աբրահամյան Շատ լավ է, որ Արշակ Կարապետյանը հայտարարում է, թե Նիկոլ Փաշինյանը դավաճան է, բայց շատ ուշացած է. Պողոսյան Հայաստանի գոյատեւությանը սպառնող վտանգը ստիպում է ինձ քաղաքական պայքար սկսել. Արշակ Կարապետյան Ի տարբերություն իշխանության՝ Եկեղեցին չի համակերպվի այն մտքին, որ Արցախն ադրբեջանական է․ Արշակ սրբազան 10 միլիոն հայությունը իրավունք ունի ստեղծելու իր համազգային մասնավոր ռազմականացված կազմակերպությունը. Սադոյան