Մենք ոչ ոքի նախագիծը չենք. «Արդար խոսք»-ը պատրաստվում է ընտրությունների

«Իրավունք»-ն անդրադարձել էր, որ մի շարք քաղաքական ուժեր վերջին շրջանում ակտիվորեն, բայց դեռեւս ոչ հրապարակային պատրաստվում են խորհրդարանական ընտրությունների՝ լինեն դրանք արտահերթ՝ հիմա, թե հերթական՝ 2026 թվականին: Եվ ահա «Արդար խոսք» նորաստեղծ կուսակցությունը պետական գրանցումից հետո` առաջիններից մեկն է, որը խոսեց այս մասին:

Կուսակցության խորհրդի անդամ, պահեստազորի գնդապետ ՄԻՀՐԱՆ ՄՈՎՍԻՍՅԱՆԸ վստահեցնում է՝ «Արդար խոսք»-ը պատրաստվում է մասնակցել արտահերթ ընտրություններին, իսկ եթե արտահերթ ընտրությունները չկայանան, ապա հերթական ընտրություններին: Իսկ թե ինչպիսի՞ աշխարհայացքային ուղղվածություն է ունենալու այս քաղաքական ուժը, նա ընդգծեց. «Հաճախ են մեզ հարցնում` ռուսամետ ենք, թե՝ արեւմտամետ, պիտի ասեմ՝ մենք հայամետ ենք ու ոչ ոքի նախագիծը չենք: Մենք դժվարությամբ գրանցեցինք կուսակցությունը՝ անհասկանալի տարբեր պատճառներով մերժում էին, սակայն համառորեն հասանք մեր նպատակին ու աշխատելու ենք հանուն մեր երկրի կայունության եւ բարելավման»:

Թե ովքեր են ընդգրկված այս կուսակցությունում, Միհրան Մովսիսյանը նշեց. «Կուսակցության շարքերում նախկին զինվորականներ էլ կան, նախկին ազատամարտիկներ էլ: Այո՛, ազատամարտիկը դարձել է նախկին, որովհետեւ, ցավոք սրտի, պետության կողմից ուշադրության չեն արժանանում։ Ունենք իրավաբաններ, տնտեսագետներ, սոցիալական հարցերով զբաղվող մարդիկ։ Այժմ մենք մտավորականների հետ առանձին աշխատանք ենք տանում, մնացած գործողություններն ենք կազմակերպում։ Ճանաչված քաղաքական գործիչներ, կարող եմ ասել, որ չկան կուսակցության շարքերում, քանի որ «ճանաչված» հասկացությունը չկա: Կան մարդիկ, որոնք ցավում են պետության ապագայի համար, եւ եթե ես եմ իրենց ճանաչում, ապա ես եմ երաշխավորում, իսկ եթե մեր հիմնադիր ժողովից մեկ ուրիշն է ճանաչում, ապա որեւիցե մեկը պետք է մեզ միանալու եւ կուսակցության անդամ դառնալու ցանկություն ունեցողներին պարտադիր երաշխավորի»:

Նշենք, որ վերոնշյալ կուսակցության նախագահն է Միհրան Մովսիսյանի որդին՝ ԱԼԲԵՐՏ ՄՈՎՍԻՍՅԱՆԸ, որը նաեւ «Հանրային ձայն» կուսակցության նախընտրական ցուցակով դարձել է Երեւանի ավագանու անդամ: «Իրավունք»-ը նրանից հետաքրքրվեց, թե արդյոք նոր կուսակցություն ստեղծելուց հետո՝ շարունակելու է մնալ Երեւանի ավագանու անդամ:

«Այո՛, ինչպես միշտ, այնպես էլ հիմա աշխատելու եմ՝ որպես անկախ ավագանի եւ ողջ ուժերս ներդնելու եմ Երեւանի եւ երեւանցու բարեկեցության համար: Ոչինչ չի կարող խոչընդոտել, որ իմ պարտքը կատարեմ հանուն մեր մայրաքաղաքի բարելավման: Որպես կուսակցության նախագահ՝ անելու եմ ամենը, որպեսզի հետագա ընտրություններում ունենանք մեր մանդատները նաեւ խորհրդարանում ու լծվենք Հայաստանի բարելավման եւ խնդիրների վերացման գործին», - շեշտեց նա:

ՆԱՆԱ ՍԱՐԳՍՅԱՆ

Այս թեմայով Չեմ հասկանում՝ մեզ մշակույթ պետք չէ՞. Նկարիչների միության նախկին նախագահը համախմբման կոչ է անում Նիկոլ Փաշինյանը շնորհավորել է Ռուսաստանի նախագահ Վլադիմիր Պուտինին ծննդյան օրվա առիթով ԱՊՀ ղեկավարներին այսօր երեկոյան կընդունի ՌԴ նախագահ Վլադիմիր Պուտինը, ով նշում է ծննդյան 72-ամյակը Այսօր ՌԴ նախագահ Վլադիմիր Պուտինի ծննդյան օրն է․ լրացավ նրա 72-ամյակը ԱՄՆ նախկին նախագահ Դոնալդ Թրամփի որդին՝ Բարոնը, հյուրերին տարակուսանքի մեջ է գցել «ոսկե գդալի» պատմությամբ