«ԱՆՄՆԱՑՈՐԴ ՆՎԻՐՈՒՄՈՎ ՄԱՐՏՆՉԵԼ Է ՆԵՆԳ ԹՇՆԱՄՈՒ ԴԵՄ, ԿՌՎԵԼ ՄԻՆՉԵՎ ՎԵՐՋԻՆ ՇՈՒՆՉԸ ՈՒ ՀԵՐՈՍԱԲԱՐ ԱՆՄԱՀԱՑԵԼ ՀԱՆՈւՆ ՀԱՅՐԵՆԻՔԻ». ԱՆՄԱՀ ՀԵՐՈՍ ՄՆԱՑԱԿԱՆ ԱՍՈՅԱՆ

2020 թվականի սեպտեմբերի 27-ին սկսված ադրբեջանա-թուրքական ահաբեկչական պատերազմում կորցրեցինք հազարավոր լուսավոր երիտասարդների, նրանցից մեկն էլ ՄՆԱՑԱԿԱՆ ՍԱՄՎԵԼԻ ԱՍՈՅԱՆՆ էր։

Այսօր, հոկտեմբերի 12-ը, նրա ծննդյան օրն է, կդառնար 24- տարեկան։ Անմահ հերոսի շիրիմին են այցելել հարազատներ, ընկերներ, համաքաղաքացիներ, ծաղիկներ խոնարհել ու խնկարկել։ Մնացական Ասոյանը ծնվել է 2000 թվականին, Շիրակի մարզի Արթիկ քաղաքում։ 9-ամյա կրթություն է ստացել տեղի թիվ 2 միջնակարգ դպրոցում, ապա ուսումը շարունակել է Արթիկի թիվ 7 ավագ դպրոցում։ Զբաղվել է սպորտով, մասնավորապես բասկետբոլով, տարբեր մրցույթների է մասնակցել ու արժանացել բազմաթիվ պատվոգրերի։ Հերոսի մայրը, տիկին ԼՈՒՍԻԿԸ, Iravunk. com -ի Շիրակի մարզի թղթակցի հետ զրույցում, խորը ցավը սրտում նշեց. «Որդիս 2019֊ի հունվարի 18-ին է զորակոչվել Հայոց բանակ։ Շատ լավ էր ծառայում, ոչնչից չէր դժգոհում, նա մասնագիտությամբ հետախույզ-գնդացրորդ էր։ Պատերազմի հենց առաջին իսկ օրվանից մասնակցել է ռազմական գործողություններին։ Հոկտեմբերի 4-ից, մասնակցել է Ջրականի կատաղի մարտերին։ Մնացականս, մեզ հետ վերջին անգամ խոսել է հոկտեմբերի 6-ին» ։«ՄԱ ՋԱՆ, ԵՐԿՈՒ ՕՐ ՄՆԱՑ, ԷՍ ԿՌԻՎԸ ԿՎԵՐՋԱՆԱ, ԱՄԵՆ ԻՆՉ ԼԱՎ ԿԼԻՆԻ, ՉՄՏԱԾԵՔ», - ասել է Մնացականը։ Հաջորդ օրը, հոկտեմբերի 7-ին, ծանր վիրավորում է ստացել ոտքերից ու զոհվել հերոսաբար։ Բայց, մինչև մարտի 8֊ը համարվել է անհետ կորած։ Մնացը տան ավագ որդին էր։ Հարազատների բնորոշմամբ, նրա տեսակն ինքնատիպ էր հասարակության մեջ։ Ով առիթ է ունեցել, թեկուզ միայն զրուցել նրա հետ, կհաստատի, որ շատ դրական մարդ էր։ Մնացը մարդկային մեծ արժանիքներով օժտված երիտասարդ էր, նրան շատ մեծ ապագա էր սպասվում, ցավոք մնաց հավերժի մարտիկ։ Ընդամենը 5 օր էր մնացել, որ բոլորեր ծննդյան 20 տարին։ Նա անմնացորդ նվիրումով մարտնչել է նենգ թշնամու դեմ, կռվելով մինչև վերջին շունչը ու անմահացել հանուն հայրենիքի։ Մնացականի մարմինը գտել են նրա զոհվելուց վեց ամիս անց միայն, ձեռքի դաջվածքով։ Անմահ հերոսի աճյունը հանգչում է հայրենի Արթիկ քաղաքի ընտանեկան գերեզմանատանը։ Հայրենիքի սահմանները պաշտպանելու համար, հետմահու պարգևատրվել է «Մարտական ծառայության» մեդալով։

ՇՆՈՐՀԱՎՈՐ ԵՐԿՆԱՅԻՆ ԾՆՈՒՆԴԴ, ԱՆՄԱՀ ՀԵՐՈՍ։ ՔՈ ՍԽՐԱՆՔՆ ԱՆՄԱՀ Է, ՔՈ ԱՆՈՒՆԸ ՄԵՐ ՍՐՏԵՐՈՒՄ... ՀԱՎԵՐԺ ՓԱՌՔ ՔԵԶ, ԱՆՄԱՀ ՀԵՐՈՍ։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ