Գերմանիայում իշխող կոալիցիան փլուզվեց. հիմքն Ուկրաինան էր, պատճառը` Թրամփը

Գերմանիայում իշխող կոալիցիան կազմված էր Գերմանիայի սոցիալ-դեմոկրատական ​​կուսակցությունից (SPD), Ազատ դեմոկրատական ​​կուսակցությունից (FDP) և «Միություն 90/կանաչներից»:

Նախօրեին Շոլցը հայտարարեց Ֆինանսների նախարար եւ FDP-ի նախագահ Կ. Լինդների պաշտոնանկության մասին՝ կապված Ուկրաինային ֆինանսավորելու հետ:
Ի պատասխան՝ FDP-ի բոլոր նախարարները հրաժարական տվեցին Շոլցի կաբինետից: Դրանից հետո FDP կուսակցությունը դուրս եկավ կարմիր-կանաչ-դեղին իշխող կոալիցիայից։ Ինքը՝ ֆինանսների նախարարը, երեկ Շոլցին մեղադրել է դրա փլուզման մեջ։

Լինդները դաշնակիցներից պահանջել է նվազեցնել հարկերը, այդ թվում՝ հարուստ քաղաքացիների, ապակարգավորել տնտեսությունը, հավասարակշռել բյուջեն՝ կրճատելով սոցիալական ծախսերը և դանդաղեցնել անցումը դեպի ածխածնային չեզոք տնտեսության: Ֆինանսների նախարարը դրդեց «տնտեսական շրջադարձի»՝ Գերմանիայի նահանջող տնտեսությանը աջակցելու համար: Սակայն կոալիցիոն գործընկերները չհամաձայնվեցին` հատկապես սոցիալական ծախսերի կրճատման հետ։

Լինդները մերժել է նաև Շոլցի բյուջեի համապարփակ առաջարկը հրաժարականի նախօրեին։
Գերմանիայի ֆինանսների նախարար Կ. Լինդներն ասել է, որ կանցլեր Օլաֆ Շոլցը խնդիր է դրել Ուկրաինային տրամադրել 3 միլիարդ եվրո ֆինանսական աջակցություն, սակայն դա անհնար է երկրի ֆինանսական ծանր վիճակի պատճառով: Սրան Օ. Շոլցը կտրականապես մերժեց և Լինդներին հայտնեց իր հրաժարականի մասին։

Այնուհետ Լինդները մամուլին ասել է, որ մինչ իր հրաժարականը կանցլերը փորձել է ևս 15 միլիարդ դոլարի պարտք կուտակել՝ ուկրաինական պատերազմը ֆինանսավորելու համար։
(Այս հայտարարությունը ցավալի հարված է Շոլցին առաջիկա ընտրություններին ընդառաջ):

Շոլցն այժմ պետք է Բունդեսթագում քվեարկության դնի օրինագծեր, որոնք պահանջում են արագ ընդունում՝ արդյունաբերությանն հրատապ աջակցություն, ինչպես նաև կենսաթոշակների կայունացման միջոցառումներ: Բայց փաստ չէ, որ այժմ բավարար ձայներ են լինելու դրանք անցնելու համար։ Իսկ դա նշանակում է, որ Շոլցը ստիպված է գնալ արտահերթ ընտրությւոնների, որտեղ հաղթելու գործնականում զրոյական շանսեր ունի:
Համաձայն Գերմանիայի Սահմանադրության՝ խորհրդարանի վաղաժամկետ արձակումը թույլատրվում է, եթե կանցլերը Բունդեսթագ ներկայացնի իր կառավարությանը վստահության քվեի հարցը։ Եթե ​​այն այլեւս չի վայելում խորհրդարանի անդամների մեծամասնության անհրաժեշտ աջակցությունը, ապա Գերմանիայի Դաշնային Հանրապետության նախագահը, կանցլերի առաջարկով, կարող է ցրել Բունդեսթագը։ Օլաֆ Շոլցը հունվարի 15-ին Բունդեսթագում քվեարկության կդնի կառավարության վստահության հարցը, իսկ եթե քվեարկությունը ձախողվի, արտահերթ ընտրությունները կկայանան 2025 թվականի մարտին։

Իլոն Մասկը իր «X»-ում, մեկնաբանելով Գերմանիայից ստացված լուրերը, Օլաֆ Շոլցին հիմար է անվանել։ Չնայած, այն, որ Բայդենի հեռանալու պարագայում Շոլցն այլեւս անելիք չունի, հասկանում են բոլորը:

Այսպիսով, Ուկրաինայի երկու առանցքային արևմտյան գործընկերներն էլ՝ ԱՄՆ-ն և Գերմանիան, գտնվում են ներքաղաքական ծանր իրավիճակում։ Դրանցում իշխանության փոփոխության/վերափոխման գործընթացներ են սկսվում, մինչև գարուն կայուն իշխանություն չի լինի: Իսկ Ուկրաինային զգալի ֆինանսավորում հատկացնելու հարցը կախված է հենց այդ կայունությունից։