Հայտարարել են Redmi K80 առաջատար սմարթֆոնների նոր շարքի

Redmi ապրանքանիշի ղեկավար Վան Թեն Թոմասը և արտադրանքի մենեջեր Հու Սինսին Միան հայտարարել են Redmi K80 առաջատար սմարթֆոնների նոր շարքի մասին, հայտնում է XiaomiTime կայքը։

Ընկերությունը Redmi K80 սմարթֆոնների շնորհանդես դեռևս չի անցկացրել և չի բացահայտել դրանց դիզայնը, սակայն կիսվել է որոշ մանրամասներով։ Xiaomi-ի ներկայացուցիչներն անդրադարձել են K80 Pro մոդելի կատարողական հնարավորություններին, որն AnTuTu հարթակի թեստերում հավաքում է ավելի քան 3 միլիոն միավոր, ինչը վկայում է այն մասին, որ սարքն աշխատում է առաջատար Snapdragon 8 Elite չիպով։

Բացի դրանից՝ նոր շարքն այլևս չի ունենա երեք մոդել՝ այն բաղկացած կլինի Redmi K80 և K80 Pro սմարթֆոններից, իսկ K80E-ի բյուջետային տարբերակը չի լինի։ Նշվում է, որ դրանք կլինեն ապրանքանիշի առաջին սարքերը՝ HyperOS 2.0 ծրագրաշարով և նախապես տեղադրված Android 15 օպերացիոն համակարգով, որն առաջին անգամ կիրառվել է Xiaomi 15-ում։

Նշվում է, որ Redmi K80 շարքի ներկայացուցիչները կստանան բարձրորակ էկրաններ, ավելի մեծ մարտկոցներ և զգալիորեն բարելավված տեսախցիկներ՝ համեմատած իրենց նախորդների։ Նոր սարքերի դիզայնը զգալիորեն կտարբերվի K70-ից՝ կողային շրջանակը մետաղական կլինի։

Redmi K80-ի շնորհանդեսի ստույգ ամսաթիվը դեռ չի նշվում, սակայն սպասվում է, որ նոր արտադրանքները կներկայացվեն առաջիկա շաբաթներին։ Երկրպագուները զգուշացվել են, որ նոր արտադրանքը կարժենա ավելի թանկ, քան Redmi K70 շարքի մոդելները: