Աղազարյանի օրին կարող է հայտնվել ամեն մի ՔՊ-ական

Այլեւս նախկին ՔՊ-ական անկախ պատգամավոր Հովիկ Աղազարյանի շուրջ կատարվողը բոլորովին զավեշտալի չէ: Ինչպես ավելի վաղ նշել էինք, Աղազարյանի յուրաքանչյուր որոշում, միեւնույնն է, Փաշինյան Նիկոլի իշխանական փլուզվող բուրգի մասին է փաստելու, դրա համար էլ վերջինս, ցուգցվանգի մեջ հայտնվելով, ասֆալտին է ծեփում օրենսդրությունը՝ միայն թե ամենակեղտոտ ռեպրեսիաներն իրականացնի անհնազանդ նախկին ՔՊ-ականի դեմ:

Այո՛, Փաշինյան Նիկոլին ցցուն օրինակ է պետք, թե ինչ է լինում, եթե հանկարծ որեւէ մեկը փորձում է իր լծից ազատվել: Իսկ հանուն այդ օրինակը ցույց տալու` նա պատրաստ է անցնել օրենքի ու յուրաքանչյուրի վրայով: Բայց արդյոք կհաջողվի վախեցնել Աղազարյանի օրինակով մյուս ՔՊ-ականներին, սա էլ թերեւս միանշանակ չէ: Չէ որ եթե ոչ այսօր, ապա վաղը հերթով, շարքով, կարգով բոլորի դռան առաջ էլ չոքելու է նույն ուղտը: Հետեւապես, չի բացառվում, որ մի շարք ՔՊ-ականներ ոչ թե վախենան Փաշինյան Նիկոլի ձեռքում հայտնված խայտառակ կոմպրոմատներից, այլ՝ համակերպվեն դրա հանրայնացման հետ:

Վերջիվերջո, չէ որ չի մնացել այնպիսի պիտակ, որը ՔՊ-ականների հասցեին չի հնչել՝ առնվազն 44-օրյա պատերազմից եւ Արցախի հանձնումից հետո: Հետեւապես, մնում է միայն անհնազանդ յուրայինների վրա քրեական գործեր կարելու ու նստեցնելու տարբերակը: Իսկ այս հարցում Փաշինյան Նիկոլը չեմպիոն է:

Այսպիսով՝ Հովիկ Աղազարյանը հեռացվեց «Քաղաքացիական պայմանագիր» կուսակցությունից՝ պետական եւ կուսակցական նշանակության կոնֆիդենցիալ տեղեկատվության արտահոսքերի, ինչպես նաեւ հանրության բարոյական նորմերի կոպիտ խախտումների պատճառով։ Համենայնդեպս, այսպես էր ասված իշխող «Քաղաքացիական պայմանագիր» կուսակցության պաշտոնական հաղորդագրության մեջ: Մի բան, որը կարելի է հարմարացնել յուրաքանչյուր ՔՊ-ականի հագով: Պարզապես, Հովիկ Աղազարյանի գլխավոր «հանցանք»-ն այլ էր՝ նա ի տարբերություն մյուսների՝ Փաշինյանի պահանջ-«խնդրանք»-ով իր պատգամավորական լիազորություններից չի հրաժարվել:

ԿՈՄՊՐՈՄԱՏՆԵՐԻ ԵՐԿԻՐ ՆԻԿՈԼՍՏԱՆ

Չնայած՝ եթե խորանում ենք արված հայտարության մեջ, մի շարք հարցեր են առաջանում: Օրինակ, այն, որ Հովիկ Աղազարյանը պետական գաղտնիք կրող չէ, կուսակցականը հասկացանք, բայց այդ ի՞նչ պետական գաղտնիքի է տիրապետել ու հրապարակել: Ավելին՝ եթե ունեցել է նման տեղեկատվություն ու «սլիվ» է արել, ապա ո՞ւր է քրեական հանցագործության մասին հարուցված համապատասխան քրեական գործը:

Ընդհանրապես, Աղազարյանի դեպքն էլ ավելի հատկանշական է՝ իր ամբողջ խայտառակության մասշտաբներով: Ըստ էության, ՔՊ-ական պատգամավոր Հովիկ Աղազարյանն Ազգային ժողովում բացահայտ խոստովանում է, որ իրեն ճնշումների են ենթարկում, որպեսզի մանդատը վայր դնի։ Ավելին՝ նա է ասում, որ իր հեռախոսից անձնական ինֆորմացիան հայտնվել է Նիկոլ Փաշինյանի մոտ։ Մի քիչ այլ գունազարդումով, սա չի հերքում նաեւ հենց ինքը Փաշինյան Նիկոլը:

Փաստացի, ի՞նչ է ստացվում, Աղազարյանն ահազանգ է հնչեցնում մյուս ՔՊ-ականներին, որ Նիկոլ Փաշինյանն ուժայինների միջոցով կոմպրոմատներ է հավաքել ու հավաքում իր թիմի անդամների դեմ, որպեսզի ցանկացած պահի կարողանա ճնշում գործադրել։ Իսրայելական «Պեգասուս» ծրագրի ականջն էլ կանչի…

«Ընդհանրապես կապ չունի՝ ով է այդ այլանդակության զոհը։ Եթե իրենց ընկերոջ նկատմամբ են օրենքն անտեսում, մյուսների նկատմամբ ինչպե՞ս կվարվեն»,- երիցս ճիշտ դիտարկում է անում իրավապաշտպան Ռուբեն Մելիքյանը, ինչի մասին, իսկապես, խորհելու կարիք ունեն բոլորը՝ նիկոլական, թե հականիկոլական:

ԱՂԱԶԱՐՅԱՆԸ ԵՐԿՈՒ ՃԱՆԱՊԱՐՀ ՈՒՆԻ

Հովիկ Աղազարյանի թեման որքան էլ համատարած խինդ ու զվարճանք է պատճառել, բայց ՎԵՏՕ շարժման առաջնորդ Նարեկ Մալյանն առաջարկում է ռացիոնալ մոտենալ այդ երեւույթին:

«Բոլորի համար պարզ է, որ Նիկոլը հոշոտելու է Աղազարյանին, եւ դա անելու է իրեն հատուկ ստորությամբ՝ ոչ իր, այլ ՔՊ-ական պատգամավորների ձեռքերով: Շուտով Աղազարյանին անձեռնմխելիությունից զրկելու հարցով ԱԺ նիստ կհրավիրեն», - զգուշացնում է Մալյանը եւ ընդգծում, որ Աղազարյանը երկու ճանապարհ ունի.

1. Չդիմադրել Նիկոլին եւ հաստատապես խժռվել վերջինիս կողմից: Հիշեցնենք՝ որեւէ մեկին չի հաջողվել Նիկոլի հետ պայմանավորվել, նա բոլոր նման փորձ անողներին լափել է:

2. Դիմադրել, պահելով մանդատը` իմպիչմենտին ակտիվորեն մասնակցելու խոստումով ու ստանալ հանրության աջակցությունը:

«Թե որ տարբերակը կընտրի արդեն անկախ պատգամավոր Աղազարյանը, ցույց կտա ժամանակը: Համենայնդեպս, փաստենք, որ վերադարձ դեպի ՔՊ նա այլեւս չունի, որքան էլ այս փուլում նրան լռեցնելու համար փորձեն «ընկերաբար» խոստանալ որոշ ճարպիկ ՔՊ-ականներ», - նշում է Մալյանը:

ՈՎ ԷՐ ԱՂԱԶԱՐՅԱՆԸ ՄԻՆՉԵՎ ԴԱՐՁԻ ԳԱԼԸ

Իհարկե, տեղի ունեցողն ամենեւին էլ չի նշանակում, թե Հովիկ Աղազարյանն ամենասուրբն էր, ինքն էլ՝ նիկոլական ռեպրեսիաների թիվ մեկ զոհն է: Ավելին՝ սա գուցեեւ Աստծո պատիժ էր՝ առանց չափազանցության: Չէ՞ որ Աղազարյան Հովիկն էր կուռք դարձրել Նիկոլ Փաշինյանին, արդեն Հիսուսի հետ էր համեմատում եւ մեկ անգամ չէ, որ ցեխ է շպրտել եկեղեցու հասցեին:

Բայց, սա էլ մի կողմ. հիշենք նաեւ, որ Հովիկ Աղազարյանն իր քաղաքական կարիերայի ընթացքում երկու կուսակցության անդամ է եղել, երկու կուսակցությունից էլ հեռացվել է: 90-ականներին նա ՀՅԴ-ական էր, ընդ որում՝ ոչ շարքային, այլ՝ ԳԽ ՀՅԴ խմբակցության քարտուղար, ՀՅԴ գերագույն մարմնի նախագահ։ Իսկ 1998թ. հեռացվել է կուսակցությունից։

Ու հիմա հանկարծ, Աղազարյան Հովիկը դառնում է մամուլի թիվ մեկ հերոսը, ինչո՞ւ: Իսկ որեւէ մեկը հիշո՞ւմ է, որ խորհրդարանում 2025 թվականի բյուջեն էր քննարկվում եւ ՔՊ-ին հաջողվեց ընդունել այն: Բայց սա չդարձավ շաբաթվա գլխավոր թեման, չխոսվեց, թե ինչպես է բոլոր ոլորտներում տապալվել Նիկոլի կառավարությունը: Այս առումով «Համաձայնություն» կուսակցության նախագահ Արամ Հարությունյանն ուշագրավ դիտարկում է անում՝ անդրադառնալով ընդդիմադիր հեռուստաալիքներից մեկի լրատվությանը:

«Հիմնական թողարկման ժամանակ 45 րոպեից 12 րոպեն հատկացվել էր Հովիկ Աղազարյանի մասին պատմող ռեպորտաժին, որի ընթացքում Աղազարյան ազգանունը հնչեցվեց 31 անգամ: Համեմատության համար ասեմ, որ Արցախ բառը հնչեցվեց մեկ անգամ, այն էլ` Հայաստանում տների վարձակալության գների նվազման հետ կապված... Դե որ ընդդիմադիր պատգամավորներն էլ են Փաշինյանին Հովիկ Աղազարյանից հարցնում՝ էլ ասելու բան չկա... », - գրել է նա:

Եվ, իսկապես, Աղազարյանի վրա այսքան էներգիա ու ժամանակ ծախսելու փոխարեն՝ ժամանակն է վերադառնալ մեր երկրի առջեւ ծառացած սպառնալիքների դիմակայմանը, Արցախի հիմնախնդրին, գերիների վերադարձին: Չէ որ միայն այն բանի համար, որ հանրության համար առաջնահերթ չլինեն հենց այս օրակարգերը, Փաշինյանը պատրաստ է Հովիկ Աղազարյանի կողքին նստեցնել ամեն մի ՔՊ-ականի, ընդ որում՝ ոչ թե անկախ պատգամավորի աթոռին, այլ ճաղերի հետեւում:

ՀՐԱՆՏ ՍԱՐԱՖՅԱՆ