Թույլ մի՛ տվեք, «մորմոնները» զբաղվում են հոգևորսությամբ եւ հակաքրիստոնեական քարոզչությամբ. Դանիելյան

«Հարգելի հայրենակիցներ, սիրելի երիտասարդներ,
Այսօր մեր երկրում մենք բախվում ենք բազմապիսի վտանգների և մարտահրավերների, որոնցից մի քանիսը լայն հանրությանը մնում են անհայտ։ Այդ խնդիրների շարքում հատկապես մտահոգիչ է կեղծ կրոնական խմբակների և աղանդների գործունեությունը, որոնց առաքելությունը ոչ միայն խեղաթյուրում է քրիստոնեական արժեքները, այլև ուղղակիորեն սպառնում է մեր ազգային ինքնությանը։
Այս խմբակներից առանձնանում են հատկապես «մորմոնները», որոնք զբաղվում են հոգեվորսությամբ և կեղծ մարգարեների ու մարգարեությունների քողի տակ իրականացնում հակաքրիստոնեական քարոզչություն։ Հավատը և հոգևոր արժեքները շահարկելով՝ նրանք փորձում են հեռացնել հայ երիտասարդներին Հայ Առաքելական Սուրբ Եկեղեցուց և մեր ազգային արմատներից։
Ավետարանը մեզ հստակ զգուշացնում է սուտ մարգարեներից. «Զգուշացեք սուտ մարգարեներից, որոնք գալիս են ձեզ մոտ ոչխարի կերպարանքով, բայց ներսից հափշտակող գայլեր են։ Իրենց գործերից կճանաչեք նրանց» (Ավետարան ըստ Մատթեոսի)։
Այս խմբակները տիրապետում են մեծ տեղեկատվական և ֆինանսական ռեսուրսների, ինչը թույլ է տալիս նրանց տարածել իրենց քարոզչությունը, հատկապես համացանցում։ Սիրելի երիտասարդներ, կոչ ենք անում լինել զգոն և չտրվել նման խաբկանքներին։ Ուսումնասիրեք, ճանաչեք և կարդացեք Իրական Քրիստոնեական Ավետարանը, որը մեզ փոխանցվել է մեր ինքնության, արժեհամակարգի և պետականության պահպանման հիմնական հենասյուն հանդիսացող Հայ Առաքելական Սուրբ Եկեղեցու միջոցով։
Հետևեք Հայ Առաքելական Սուրբ Եկեղեցու պատգամներին և համացանցում ծանոթացեք մեր եկեղեցու պաշտոնական քարոզչությանը։ Հայ Առաքելական Սուրբ Եկեղեցին եղել և մնում է հայ ժողովրդի ինքնության պահպանման կարևորագույն հենասյունը։ Այն առաջնորդում է մեզ դեպի ազգային և հոգևոր վերածնունդ՝ պահպանելով մեր հավատքն ու ինքնությունը։
Մեր առաքելությունն է՝ պաշտպանել մեր հոգևոր արժեքները և չտրվել կեղծ մարգարեների և առաքյալների խաբկանքներին։ Թույլ մի տվեք, որ ձեր հավատն ու ինքնությունը դառնան շահարկման առարկա։
Հետևեք Հայ Առաքելական Սուրբ Եկեղեցու պատգամներին՝ հավատարիմ մնալով մեր ազգային արժեքներին ու քրիստոնեական հավատքին։
