Տղամարդու մոտ հայտնաբերվել է Արցախի նախագահի կողմից որպես պարգևատրում ստացած անվանական ատրճանակ

SHAMSHYAN.com-ի տեղեկություններով հունվարի 8-ին, զենքի, զինամթերքի կամավոր հանձնման դեպք է տեղի ունեցել Տավուշի մարզում։ ՀՀ Ներքին գործերի նախարարության ոստիկանության քրեական ոստիկանության գլխավոր վարչությունում և ՀՀ Ազգային Անվտանության ծառայությունում տեղեկություններ են ստացվել, որ Իջևան քաղաքի Սպանդարյան փողոցի բնակիչ 34-ամյա Շեկո Խ․-ն 2022թ. Արցախի Հանրապետության Մարտակերտի շրջանում հաշվառվելուց հետո Արցախի նախագահի կողմից ստացել է անվանական ատրճանակ, որը կրում է մինչ օրս և հիմնականում պահում է իր մոտ առկա կաշվե փոքր պայուսակի մեջ:

Ինչպես հայտնում է ֆոտոլրագրող Գագիկ Շամշյանը, ՀՀ ՆԳՆ ոստիկանության քրեական ոստիկանության գլխավոր վարչության Տավուշի մարզային վարչության ծառայողները՝ վարչության պետ Ռոբերտ Պետրոսյանի գլխավորությամբ ձեռնարկված միջոցառումների և տարված բացատրական աշխատանքների արդյունքում հունվարի 15-ին ժամը 17։00-ի սահմաններում Շեկո Խ․-ն ներկայացել է Տավուշի մարզային քրեակամ վարչություն և ներկայացրել «Գլոկ 17» տեսակի 9.19 մմ տրամաչափի ատրճանակ ու թույլտվության կտրոն։

Գ․ Շամշյանի տեղեկություններով նա ոստիկաններին հայտնել է, որ ատրճանակը որպես պարգևատրում ստացել է 2022թ. նոյեմբերի 18-ին Արցախի Հանրապետության նախկին նախագահ Արայիկ Հարությունյանի կողմից:

Դեպքի փաստով  փաստաթղթեր են կազմվել, որոնք Շեկո Խ․-ի հետ միասին ներկայացվել են ՀՀ Քննչական կոմիտեի Տավուշի մարզային քննչական վարչություն:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով
© https://shamshyan.com/hy/article/2025/01/19/1276859?fbclid=IwZXh0bgNhZW0CMTEAAR1WCHVqs-WUC-l0WylCGLAiD__vJKrE40qrOiv598dJw19j3lJsk1s9YmA_aem_-HtD9O07QXBTEdxFG0nH2g