«ՀԵՐՈՍԱԲԱՐ ԶՈՀՎԵԼ Է ՄԱՐՏԱԿԱՆ ԴԻՐՔՈՒՄ ԻՐ ԱՌՋԵՎ ԴՐՎԱԾ ԽՆԴԻՐՆԵՐԸ ԱՐԻԱԲԱՐ ԿԱՏԱՐԵԼԻՍ». ԱՆՄԱՀ ՀԵՐՈՍ ԱՐՄԵՆ ՀՈՎՀԱՆՆԻՍՅԱՆ

Երեկ, հունվարի 20-ը, անմահ հերոս, Արցախի ՊԲ զինծառայող, կրտսեր սերժանտ ԱՐՄԵՆ ԼԵՎՈՆԻ ՀՈՎՀԱՆՆԻՍՅԱՆԻ հիշատակի օրն էր, արդեն 11 տարի է անցել։ 2014 թվականի հունվարի 19֊ի լույս 20֊ի գիշերը ադրբեջանական հակամարտ զորքերի շփման գծի հյուսիսարևելյան և հարավարևելյան Կորգան ուղղություններում արձանագրվել են հակառակորդի դիվերսիոն խմբերի ներթափանցման միաժամանակյա փորձեր։ Արմենը մարտական ընկերների հետ միասին հակառակորդին պատճառել է զգալի մարդկային և նյութական կորուստներ ու հետ շպրտել իր ելման դիրքերը։ Ցավոք, հակառակորդի կողմից ստացած հրազենային վիրավորումից, հյուսիսարևելյան ուղղությամբ տեղադրված մարտական դիրքում իր առջև դրված խնդիրը արիաբար կատարելու ժամանակ հերոսաբար զոհվել է Արմեն Հովհաննիսյանը։ Հետմահու պարգևատրվել է «Արիության համար» և «Հայրենիքին մատուցած ծառայությունների համար 1֊ին աստիճանի» մեդալով։ Եռաբլուր զինվորական պանթեոնում գտնվող անմահ հերոս Արմեն Հովհաննիսյանի հուշարձանին են այցելել ծնողներ, հարազատներ, ընկերներ, Երևանի համար 141 դպրոցի աշակերտներ, ուսուցիչներ, ծաղիկներ խոնարհել ու խնկարկել, քահանան էլ աղոթել է։

Անմահ հերոսի մայրը տիկին ՄԱՐԻՆԵՆ, Iravunk. com -ի հետ զրույցում խորը ցավը սրտում նշեց.

- «Դարձյալ հունվարի 20֊ն էր։ Օր, որ գլխիվայր շուռ տվեց կյանքս հիմնահատակ փոխելով բառացիորեն ամեն ինչ։ Պետք է խոստովանեմ, որ ապագայի նպատակներն ու անգամ իրադարձությունները կապված էին Արմենիս հետ։ 11 տարի առաջ, կյանքիս ընթացքը դադարեց, դատարկվեց, գրեթե կանգ առավ։ Կյանքս վերջացած էի համարում որդուս նահատակությունից հետո և միայն վերերկրային ուժով Արմենի անպարագիծ սիրով առ Աստված ու հայրենիք, փորձեցի և սկսեցի ապրել։

Ճշմարիտ և միակ ճանապարհը Աստծուն մոտենալու ճանապարհն էր։ Ստվերի պես ինձ հետապնդող զավակիս հանդեպ կարոտն այդպես էլ չպարպվեց, բայց հույսս բաղձալի հանդիպումն է հավերժալույսի ճանապարհին։ Իմ խորին երախտագիտությունն եմ փոխանցում Ավան համայնքի հոգևոր հովիվ Տեր Հարություն քահանա Ավագյանին, մշտապես ընտանիքիս կողքին գտնվելու համար, թե տխրության և թե ուրախության պահերին։

Շնորհակալ եմ բոլոր նրանց, ովքեր իրենց ներկայությամբ, զանգերով, հաղորդագրություններով կողքիս էին։ Աստված օրհնի բոլորիդ»։

Նշենք, որ հերոսի հարազատ Երևանի թիվ 141 դպրոցում էլ կայացել է Արիության դաս, նվիրված անմահ հերոս Արմենին։

ՀԱՎԵՐԺ ՓԱՌՔ ՔԵԶ, ԱՆՄԱՀ ՀԵՐՈՍ ։ՔՈ ՍԽՐԱՆՔՆ ԱՆՄԱՀ Է, ՔՈ ԱՆՈՒՆԸ ՄԵՐ ՍՐՏԵՐՈՒՄ....

Պատրաստեց ՀՈՎՀԱՆՆԵՍ ՍԱՐԳՍՅԱՆԸ