«Ֆաջր» թատերական փառատոնում «Մեկ ժամ հիշողություն» ներկայացումն արժանացել է բարձր գնահատանքի

Հունվարի 26-ից 31-ը Վանաձորի դրամատիկական թատրոնը իրանական «Ֆաջր» թատերական փառատոնին ներկայացել է Կարինե Խոդիկյանի «Մեկ ժամ հիշողություն» պիեսի բեմադրությամբ. ռեժիսորը ՀՀ ժողովրդական արտիստ Վահե Շահվերդյանն է։

Թատրոնի դերասաններն այս ներկայացմամբ «Սանգելաջ» թատերական սրահում անցկացված փառատոնին հանդես են եկել 3 անգամ, որից մեկը` ժյուրիի համար։ Ներկայացումը ենթարկվել է ընդամենը մասնակի փոփոխությունների` կերպարների հագուստների որոշ դետալներ պետք է համահունչ լինեին իրանական մշակույթին և նկատի առնվեր միմյանց ձեռք բռնելու, հպվելու անթույլատրելիությունը։

Փառատոնին ներկա էին Իրանի Իսլամական Հանրապետությունում Հայաստանի Հանրապետության արտակարգ և լիազոր դեսպան Գրիգոր Հակոբյանը, դեսպանատան աշխատակիցներ, Հայ մարզամշակութային «Նաիրի» միության վարչության նախագահ Սերոժ Օհանյանը, նրա տիկին Կլարա Աղախանյանը, թատերագետներ Խոսրով Խոջավյանն ու Նավիդ Սաֆարյանը։ Նրանք կիսվեցին իրենց էմոցիոնալ տպավորություններով, մասնավորապես նշելով, որ «Մեկ ժամ հիշողություն» ներկայացումը պե՛տք էր «Ֆաջր» փառատոնի խաղացանկին, քանի որ այն իր գեղագիտությամբ առանձնանում է մնացած ներկայացումներից։ Հյուրերը տպավորված էին ներկայացման դերասանական կազմի տաղանդով։ Նրանց ուշադրությունը գրավել էր ներկայացման բարձրակարգ ռեժիսուրան ( ՀՀ ժողովրդական արտիստ Վահե Շահվերդյան) և երաժշտական ձևավորումը (Սեդրակ Զարգարյան)։

Աբելյանցիները հյուրընկալվեցին Թեհրանի Դրամատիկ արվեստի կենտրոնում, որտեղ կենտրոնի նախագահ Աթաբեկ Նադարին, կարևորելով երկու երկրների մշակութային երկխոսությունը, իր շնորհակալությունը հայտնեց և պատվոգրեր ու նվերներ հանձնեց խմբի անդամներից յուրաքանչյուրին։ Թատրոնի տնօրեն Լուսինե Սահակյանը շեշտեց, որ այս ներկայացումը, որտեղ պատկերված է մեկ մարդու, մեկ գերդաստանի, մեկ ազգի ցեղասպանված անցյալ, այսօր համամարդկային արժեք ունի, որովհետև ժամանակակից աշխարհում փոթորկված փոխհարաբերությունների մեջ քիչ չեն ազգերի ու առանձին մարդկանց կործանվող ճակատագրերը։ Աբելյանցիները փառատոնին նվիրեցին Հովհաննես Աբելյանի 150֊ամյա հոբելյանական հուշամեդալը, թատրոնի տարեգրությունը ամբողջացնող պատկերագիրք, շնորհակալանքի ուղերձ, հայկական կարպետի փոքրիկ մի նմուշ և Հայոց մանրանկար այբուբենը (Գեղագիտության ազգային կենտրոնի աշխատանքներից)։

«Շնորհակալություն ենք հայտնում բոլոր ներկաներին, «Ֆաջր» միջազգային թատերական փառատոնին, Իրանի «Արտ» դրամատիկական կենտրոնի միջազգային բաժնի աշխատակից Ալբերտ Բեգջանյանին` բոլոր հարցերում օգնելու, և մեր կողքին լինելու համար։ Շնորհակալությո'ւն, Իրա՜ն…», - ասված է թատրոնի հրապարակած հաղորդագրության մեջ: