«Ժողովուրդ». Շինարարությունը նոր է ավարտվել, բայց դպրոցը ցանկանում են քանդել

«Ժողովուրդ» օրաթերթը գրում է. «ArmLur.am-ին ահազանգում են այն մասին, որ փակվում է հերթական դպրոցը։

Այս անգամ հերթը հասել է Վայոց ձորի մարզի Եղեգիս համայնքի Քարագլուխ բնակավայրի միջնակարգ դպրոցին։

ArmLur.am-ին ահազանգած բնակչի խոսքով՝ այս պահի դրությամբ պատրաստի շինությունը, որի միակ թերությունը այն է, որ ջեռուցման համակարգը կա, բայց չի ջեռուցվում, ուզում են քանդել։ Հին դպրոցն ուզում են քանդել և փոխարենը կառուցել նորը։ ArmLur.am-ի զրուցակցի խոսքով՝ նման ամուր շինություն այլևս չեն կարող կառուցել։

«Դպրոցը պետք է դառնա կրթահամալիր։ Հին դպրոցը չի համապատասխանում կրթահամալիրի չափանիշներին, դրա համար քանդում են դպրոցը՝ նոր կրթահամալիր կառուցելու համար։ Այդ պրոցեսի համար մենք դպրոցականներին տեղափոխում ենք տարբեր շենքեր՝ գյուղապետարանի շենքը, մշակույթի, արվեստի կենտրոնի շենքերը, որտեղ դաս պետք է անցկացվի», – ArmLur.am-ի հետ զրույցում նշեց դպրոցի տնօրենը։

«2 տարի ժամկետ են տվել կրթահամալիրի կառուցման համար։ Շինարարական աշխատանքներից մենք հեռու ենք։ Այսինքն, որ տեղափոխվում ենք գյուղապետարանի, արվեստի կենտրոնի և մշակույթի կենտրոնի շենքեր, որտեղ դասերը անցկացվելու են, դասապրոցեսն ընդհանրապես չի տուժելու։ Ամբողջովին իրականացվելու են, և պահպանվելու է ամեն բան՝ կրթության որակից սկսած»,- նշեց Արամ Հովհաննիսյանը։

Այն դիտարկմանը, թե կրթահամալիրի կառուցումից հետո պահպանվելո՞ւ է ուսուցչական անձնակազմը, թե՞ ոչ, Արման Հովհաննիսյանը, եզրափակելով զրույցը, պատասխանեց․

«Ուսուցչական անձնակազմի մասով բան չեմ կարող ասել, քանի որ շրջակա 5 գյուղերի դպրոցների հետ միավորվելու է, և չեմ կարող ասել՝ ինչ չափանիշներ են գործելու»։

Հիշեցնենք, որ 2024 թվականի մայիսի 23-ի Կառավարության նիստի ժամանակ վարչապետ Փաշինյանն ասել էր, որ վտանգավոր է համարում շրջանառվող խոսակցությունները՝ դպրոցների փակվելու մասին։

«Մարդկանց պետք է ասենք, որ հանրապետությունում ոչ մի դպրոց չի փակվում, ընդհակառակը՝ գյուղերի համար կառուցվում են նոր դպրոցներ, որոնք կունենան պատշաճ մարզադահլիճ, մարզագույք, շենքային նորմալ պայմաններ և այլն։ Շատ վտանգավոր խոսույթ է, թե՝ «մեր գյուղի դպրոցը փակվում է»։ Հանրապետությունում ոչ մի դպրոց չի փակվում, Հանրապետությունում կառուցվում են նոր դպրոցներ բոլոր գյուղերի համար, բոլոր բնակավայրերի համար»,- ասել էր Նիկոլ Փաշինյանը։

Ստացվում է այնպես, որ փակվելու են մի քանի դպրոցներ՝ 1 կրթահամալիր բացելու անվան տակ»:

Առավել մանրամասն թերթի այսօրվա համարում