«Իրականում շատ ավելի սարսափելի օրակարգ կա այդ վարույթում». 70-ամյա արցախցի գիտնականի փաստաբանը փակագծեր է բացում

Փետրվարի 1-ի երեկոյան միջնորդություն էր ներկայացվել դատարան՝ 70-ամյա արցախցի գիտնական Ղարիբ Բաբայանին կալանավորելու վերաբերյալ, քանի որ նա օրերս հրապարակել էր Հանրապետության հրապարակում ադրբեջաներեն «Ղարաբաղ» երգող անհայտ անձանց մասնակցությամբ տեսանյութ։ Այդուհանդերձ, մի քանի ժամ տեւած նիստից հետո դատարանը որոշեց չկալանավորել Ղարիբ Բաբայանին՝ բավարարվելով միայն վարչական վերահսկողությամբ։ Ի վերջո, ովքե՞ր էին հրապարակում երգում ադրբեջաներեն, օրերս ՀՀ-ում Իրանի Իսլամական Հանրապետության դեսպան Մեհդի Սոբհանին փակագծեր է բացել: Նա մասնավորապես նշել է, որ տեսանյութը նայել է, սակայն շատ հստակ չի էլ լսվում, թե ինչ են նրանք ասում: «Ովքեր ռասիստական եւ ազգային լոզունգներով են հանդես գալիս, նրանք ոչ Իրանի ժողովրդի ներկայացուցիչն են, ոչ էլ Իրանի Իսլամական Հանրապետության պաշտոնական դիրքորոշումներն արտահայտողներ են», - ընդգծել էր դեսպանը:

Անդրադառնալով վերոնշյալին՝ «Իրավունք»-ը զրուցել է Ղարիբ Բաբայանի շահերի պաշտպան փաստաբան ԱԲԳԱՐ ՊՈՂՈՍՅԱՆԻ հետ:

— Պարոն Պողոսյան, Իրանի դեսպանի հնչեցրած հայտարարության վերաբերյալ ի՞նչ տեսակետ կհայտնեք:

— Տեսեք, ես չգիտեմ, թե ինչպես է ընկալվել Իրանի դեսպանի հայտարարությունը: Իմ կարծիքով՝ դեսպանը պարզապես ասաց, որ իր ժողովրդի ներկայացուցիչները չեն այն առումով, որ եթե անգամ Իրանի քաղաքացիներ են՝ միեւնույնն է, չեն ներկայացնում Իրանի դիրքորոշումը: Ամեն դեպքում, ես ինքս դեսպանի հայտարարությունն այդպես եմ ընկալել: Բնականաբար, դա նորմալ է: Այդպես էլ պետք է հայտարարեր, քանի որ դա պաշտոնական Իրանի դիրքորոշումը չէ: Այսինքն, մի քանի անձով պայմանավորված, չի կարելի դա ընկալել որպես ողջ իրանյան ժողովրդի դիրքորոշում:

— Ինչպես գիտենք, պարոն Բաբայանը նաեւ հրապարակային խոսքով հանդես գալու իրավունք այժմ չունի: Արդյո՞ք կարող ենք ասել, որ իրականությունը փոքր-ինչ այլ է, սակայն այլ կերպ է ներկայացվում նրա փոխարեն:

— Այո, պարոն Բաբայանը հրապարակային խոսքով հանդես գալու իրավունք չունի: Իրականում շատ ավելի սարսափելի օրակարգ կա մեր կարծիքով այդ վարույթում, եւ իրական նպատակները գրված չեն վերադասի որոշման մեջ ու այս առումով, կարծես թե, դեպի երկրորդ պլան է մի պահ մղվում խոսքի ազատության իրավունքը: Ըստ էության, պարոն Բաբայանի կողմից կատարված հայտարարության մեջ որեւէ թշնամանքի կամ ատելության խոսք չկա: Գրեթե քննություն չպարունակող քննադատական խոսքեր են: Թեեւ շատ-շատ ավելի սուր քննադատություններին իրավապահ մարմինները չեն արձագանքում: Այսինքն՝ սրանից հետեւություն, որ սա իրենց համար առանձնահատուկ դեպք էր, եւ դրա հետ մեկտեղ նաեւ պարտադիր պետք էր արձագանքել:

ԴԻԱՆԱ ՄԱՆՈՒԿՅԱՆ