Գերմանիայի գրեթե բոլոր օդանավակայաններում աշխատանքի խափանումներ են սկսվել՝ աշխատողների գործադուլի պատճառով

Գերմանիայի գրեթե բոլոր օդանավակայաններին, այդ թվում՝ երկրի խոշոր օդային հանգույցներին Ֆրանկֆուրտում, Մյունխենում և Բեռլինում, մարտի 10-ին աշխատանքի խափանումներ են սպառնում այն բանից հետո, երբ Ver.di արհմիությունը կոչ է արել ցամաքային անձնակազմին, ուղեբեռի սպասարման և անվտանգության ծառայության աշխատակիցներին մեկօրյա գործադուլ սկսել, տեղեկացնում է Bloomberg-ը։

Նշվում է, որ սպասվում են թռիչքների լուրջ սահմանափումներ, այդ թվում՝ մեծ թվով չվերթների չեղարկումներ։

Արհմիության տարածած հայտարարության մեջ ասվում է, որ գործադուլները սկսվելու են այսօր երեկոյան և ավարտվելու են 24 ժամ հետո, իսկ Համբուրգի օդանավակայանն արդեն փակ է գործադուլի պատճառով։

ADV օդանավակայանների ասոցիացիայի կառավարիչ տնօրեն Ռալֆ Բեյզելն ասել է. «Գործադուլներն ամբողջ երկրին զրկում են օդային հաղորդակցությունից: Մենք կոչ ենք անում Ver.di-ին հաշվի առնել ուղևորների շահերը և խաղաղ լուծում փնտրել բանակցությունների սեղանի շուրջ»:

Ըստ Associated Press-ի՝ Համբուրգի օդանավակայանում կիրակի օրը աշխատողների անսպասելի գործադուլի հետևանքով չվերթների չեղարկումից տուժել է ավելի քան 40․000 ուղևոր:

Արհմիությունը, որը ներկայացնում է մոտ 2 միլիոն աշխատողի, անցյալ շաբաթ իր աջակցությունն է հայտնել Գերմանիայի ապագա կանցլեր Ֆրիդրիխ Մերցի առաջարկած ֆիսկալ բարեփոխումների ծավալուն ծրագրերին՝ հայտարարելով, որ դրանք կօգնեն արդիականացնել երկրի քայքայվող ենթակառուցվածքը:

Եվրոպայի խոշորագույն տնտեսությունը 10 տարվա ընթացքում 500 միլիարդ եվրոյի չափով ներդրումներ է հատկացրել փոխառու միջոցների հաշվին և նախատեսում է զգալիորեն ավելացնել պաշտպանական ծախսերը:

Արհմիության պահանջները ներառում են աշխատավարձի բարձրացում, արձակուրդային օրերի թվի մեծացում և ժամանակավոր պայմանագրերի սահմանափակումներ: