«ԵՍ ԱՆՊԱՅՄԱՆ ԾԱՌԱՅԵԼՈՒ ԵՄ, ԷԼ ԻՆՉ ՏՂԱ, ՈՐ ՉԾԱՌԱՅԻ, ՀԵՆՑ ՀԵՏ ԳԱՄ, ԼՐԻՎ ԼԱՎ Է ԼԻՆԵԼՈՒ»... ԱՆՄԱՀ ՀԵՐՈՍ ՍՈՒՐԵՆ ՓԻԼՈՍՅԱՆ

Մարտի 19-ը, անմահ հերոս ՍՈՒՐԵՆ ԽԱՉԱՏՈՒՐԻ ՓԻԼՈՍՅԱՆԻ ծննդյան օրն է, կդառնար 30 տարեկան։ Նրա շիրիմին են այցելել հարազատներ, ընկերներ, համագյուղացիներ, ծաղիկներ խոնարհել ու խնկարկել։ Անմահ հերոսի ընկերը, Iravunk. com -ի հետ զրույցում նշեց.

«Սուրենը ծնվել է 1995 թվականի մարտի 19-ին, Լոռու մարզի Սարահարթ գյուղում։ Ավարտել է հայրենի գյուղի միջնակարգ դպրոցը։ 2013֊ի հունիսի 19֊ին զորակոչվել է Հայոց բանակ ծառայության։ Ծառայել է Արցախի ՊԲ Հադրութի զորամասում։ Բնավորությամբ հանգիստ, հավասարակշռված, խելացի ու համեստ անձնավորություն էր, բոլորի կողմից շատ հարգված ու գնահատված երիտասարդ։ 2015 թվականի հունվարի 19֊ին և 20֊ին, նենգ թշնամին ցուցաբերում է ակտիվություն, տարբեր տրամաչափի զինտեխնիկաներով ռմբակոծության ենթարկում, գրանցվում է դիվերսիոն ներթափանցման փորձեր, որը մեր հերոս տղերքի շնորհիվ կանխվում է, ցավոք նրանցից մեկը ճակատագրական է լինում Սուրենի համար։ 2015֊ի հունվարի 20֊ին անմահանում է։ Սուրենը ծառայության ժամանակ պարգևատրվել է «Քաջարի մարտիկ» մեդալով և բազում պատվոգրերով, իսկ ցուցաբերած խիզախությունների համար, հետմահու պարգևատրվել է Արցախի Հանրապետության «Արիության» մեդալով, ԵԿՄ կողմից «Երկրապահ» հուշամեդալով։ Հայրենի գյուղի ներքևում կառուցվել է տաղավար, հուշաղբյուր, մատուռ ի հիշատակ Սուրենի և տեղադրվել է խաչքար, իսկ ծննդավայրի դպրոցը անվանակոչվել է նրա անվամբ։ Սուրենը ասում էր. «Ես անպայման ծառայելու եմ, էլ ինչ տղա, որ չծառայի, հենց հետ գամ, լրիվ լավ է լինելու...»

ՇՆՈՐՀԱՎՈՐ ԵՐԿՆԱՅԻՆ ԾՆՈՒՆԴԴ, ԱՆՄԱՀ ՀԵՐՈՍ, ՔՈ ՍԽՐԱՆՔՆ ԱՆՄԱՀ Է, ՔՈ ԱՆՈՒՆԸ ՄԵՐ ՍՐՏԵՐՈՒՄ....

Պատրաստեց ՀՈՎՀԱՆՆԵՍ ՍԱՐԳՍՅԱՆԸ