Ինչո՞ւ են մեզ ուզում ՀՀ բնակիչների աչքին վատ լույսի ներքո ներկայացնել, ներկայացնել որպես դասալիք, նախկին իշխանությունների հենարան և այլն․ Բորիս Առուշանյանը տալիս է պատասխանը

 Ազատության հրապարակում հավաքված մեր հայրենակիցների հիմնական պահանջը այն է, որ 40+10-ը այլընտրանք չունի։ Շատերը այս պահանջը համարում են ստամոքսակռիվ, իսկ այն արցախահայերը, որոնք տունդարձի հստակ պահանջ էին ներկայացնում նրանց հակադարձում են, թե ոչ ոք նրանց բռնի չի հանել իրենց տներից, ավելին այդ օրերին արցախահայերը ճամպրուկները հավաքած տնից դուրս էին գալիս ու Հայաստան գալու ելքեր փնտրում։ Այս եւ այլ հարցերի շուրջ զրուցել ենք Արցախյան շարժման ակտիվիստ, հասարակական-քաղաքական գործիչ Բորիս Առուշանյանից, ով նախ նկատեց․

-Այն, որ այդ գումարը նույնիսկ նվազագույն կարիքները չի բավարարում, պարզ է մաթեմատիկայից հեռու մարդուն անգամ։  Շատերը ստիպված են օգնություն խնդրել հարազատներից կամ ընկերներից ինչպես տեղական, այնպես էլ արտերկրում՝ նվազեցնելով սննդի, դեղորայքի, զվարճանքի և այլնի ծախսերը։ Չեմ կարծում, որ կառավարությունը չգիտի այս մասին։ Հարցն այլ է. Ինչո՞ւ են նման քաղաքականություն վարում արցախցիների նկատմամբ։ Ինչո՞ւ են մեզ ուզում ՀՀ բնակիչների աչքին վատ լույսի ներքո ներկայացնել, ներկայացնել որպես դասալիք, նախկին իշխանությունների հենարան և այլն։ Դրա պատճառները բազմաթիվ են՝ թե՛ քաղաքական, թե՛ հոգեբանական։

Նոյեմբերի 9-ի ամոթալի պայմանագրի տապալումն ու կնքումը, Հայաստանի Հանրապետության, Արցախի և ՌԴ իշխանությունների հետագա գործողությունները բազմաթիվ հարցեր են առաջացնում, որոնց ստույգ պատասխանները դեռ չկան, ուստի տեղի է ունենում մեղքերի մեջ միմյանց մեղադրելու գործընթաց, փորձեր են արվում մեղքը միմյանց վրա բարդելու և արդարացնելու իրենց գործողությունները։ Կողմերից ոչ մեկը չի ընդունում իր մեղքը. չկա ոչ միայն քաղաքական մշակույթ, այլեւ սովորական պարկեշտություն։

Ես կարող էի բազմաթիվ օրինակներ ու վկայություններ բերել արցախցիների սխրանքների, առաջադրված մեղադրանքների ու նախատինքների անհիմն լինելու մասին։ Բայց չեմ ասի հիմա, քանի որ մի մի քանի հարցազրույցներում ես խոսել եմ այս թեմայով։

- Արցախահայերը հայտարարեցին, որ կա հետագա քայլերի 2 տարբերակ. առաջին՝ կառավարությունն ունի 2 շաբաթ ժամանակ՝ փոխելու իր որոշումները, հակառակ դեպքում հավաքվելու ենք այստեղ՝ իրականացնելու հետագա անելիքները և 2-րդ տարբերակ՝ նախաձեռնող խումբը մնալու է Ազատության հրապարակում, ձևավորելու է շտաբ։ Իշխանութունը ունի մեկ շաբաթ ժամանակ, եթե ոչ՝ մենք կազմակերպելու ենք ավելի մեծ հանրահավաք եւ անցնելու ենք հստակ գործողությունների: Ի՞նչ հստակ գործողություններ սպասել։

-Հետագա գործողությունների մասին տեղյակ չեմ, բայց կարծում եմ, որ ՀՀ իշխանություններն այնքան էլ անհեռատես չեն, որ ամբողջությամբ անտեսեն արցախցիների օրինական պահանջները։ Եթե ​​գնան դրան, ապա կարծում եմ, որ պայքարը կշարունակվի ավելի ինտենսիվ մեթոդներով։ Ես կասկած չունեմ իմ հայրենակիցների համառության և հետևողականության վրա։ Կարծում եմ, որ ՀՀ խաբված : բնակիչները կհասկանան, թե որտեղ է ճշմարտությունը, որտեղ է սուտը, և կմիանան արցախցիներին

-Պարոն Առուշանյան, մինչ բազմահազար արցախահայեր շարունակում են անգամ օրվա հացը դժվարությամբ վաստակել, էլ չենք խոսում բնակվարձերի մասին, զուգահեռ իրականության մեջ ապրում են ծնուննդով արցախցի մեծահարուստներ, ովքեր ուղղակի անտեսում են անտուն ու անտեղ մնացած արցախահայերին, որոնք անգամ խուսափում են ակցիաներին ներկա լինել։ Սա ինչի՞ մասին է խոսում։

1994 թվականից հետո և հատկապես վերջին տարիներին ես չեմ ճանաչում մեր ժողովրդին. Մենք թույլ տվեցինք, որ մեր ուժերը մասնատվեն, ուրիշների ծրագրերը մեզ պարտադրվեն, տարբեր գործակալների, աղանդավորների, չարագործների ներմուծվեն մեր հասարակություն և մեր տաղանդավոր մարդկանց վերածվեն անկազմակերպ հասարակության։