ԱՄՆ-ի այս որոշումը Հայաստանի համար կարող է ունենալ անսպասելի և խորը ազդեցություն. Բալասանյան

Նոր մաքսատուրքերի սահմանման խնդիրը, որը նախագահ Դոնալդ Թրամփը ձեռնարկել է աշխարհի գրեթե բոլոր երկրների նկատմամբ, չի շրջանցում նաեւ Հայաստանը: Մի քանի օրվա ընթացքում հայկական ապրանքների Միացյալ Նահանգների շուկա ներմուծումը կդառնա ավելի թանկ, քանի որ սահմանվում է 10 տոկոսանոց մաքսատուրք: Հայ արտադրողները եւ գործարարները անհանգստացած են, քանի որ այս որոշման արդյունքում Միացյալ Նահանգներում վաճառվող հայկական ապրանքներն էապես թանկանալու են՝ առնվազն 10 տոկոսով: Շատերը նաեւ նշում են, որ դա հատկապես խնդիր կդառնա փոքր ու միջին ձեռնարկությունների համար, որոնք անկեղծորեն հույս ունեին, որ իրենց արտադրանքները կմնան նույն գների սահմաններում: Այս մասին «Իրավունք»-ը զրուցել է ԵՊՀ միջազգային հարաբերությունների եւ դիվանագիտության ամբիոնի դոցենտ, միջազգայնագետ ԳՐԻԳՈՐ ԲԱԼԱՍԱՆՅԱՆԻ հետ:

— Խոսքը վերաբերում է Միացյալ Նահանգներ Հայաստանից արտահանվող ապրանքների վրա 10 տոկոս մաքսային հարկի ներդրմանը, եւ այս որոշումը կարող է ունենալ անսպասելի եւ խորը տնտեսական ազդեցություններ։ Շատ հստակ է, որ նման հարկի կիրառումը կհանգեցնի հայկական արտադրանքի գների բարձրացմանը, հատկապես երբ հաշվի առնենք այն բոլոր ծախսերը, որոնք կապված են ապրանքների տեղափոխման եւ վաճառքի գործընթացի հետ Միացյալ Նահանգներում։ Մեծապես կավելանան լոգիստիկայի, բեռնափոխադրումների եւ մաքսային ընթացակարգերի հետ կապված ծախսերը, ինչը կարող է դարձնել հայկական արտադրանքը պակաս մրցունակ շուկաներում, որտեղ այսպես թե այնպես գոյություն ունեն մի քանի խոշոր տնտեսություններ։

Այս 10 տոկոսի մաքսատուրքը, որքան էլ փոքր թվա առաջին հայացքից, իր մեջ կրում է հսկայական տնտեսական բեռ՝ հատկապես փոքր եւ միջին ձեռնարկությունների համար։ Մրցունակության անկումը, որն առաջանում է այս գործոնների համադրմամբ, կարող է խոչընդոտել հայկական արտադրանքի ներմուծումն ու վաճառքը այլ շուկայում։ Նման զարգացումը կբերի նաեւ գործարարության եւ ներդրումների կրճատմանը, քանի որ բազմաթիվ ընկերություններ կվերանայեն իրենց գործունեությունը կամ նույնիսկ կդադարեցնեն արտահանումը այդ շուկա։

ԴԻԱՆԱ ՄԱՆՈՒԿՅԱՆ