Լավրովը հայտարարել է Ուկրաինայի վերաբերյալ համաձայնագիր կնքելու Ռուսաստանի պատրաստակամության մասին

Միջազգային 25 Ապրիլ, 2025 10:32

Ռուսաստանը պատրաստ է Ուկրաինայի վերաբերյալ համաձայնագիր կնքել Միացյալ Նահանգների հետ՝ ապագա համաձայնագրի առանձին մանրամասները «ճշգրտելուց» հետո, հայտարարել է Ռուսաստանի արտգործնախարար Սերգեյ Լավրովը։

«Միացյալ Նահանգների նախագահը [Դոնալդ Թրամփը] և կարծում եմ՝ արդարացիորեն հավատում է, որ մենք շարժվում ենք ճիշտ ուղղությամբ։ Նախագահն իր հայտարարության մեջ հիշատակեց համաձայնագրի մասին, և մենք պատրաստ ենք համաձայնագրի հասնել։ Սակայն կան որոշակի մանրամասներ, որոնք պետք է մշակվեն։ «Մենք զբաղված ենք հենց այս գործընթացով», -ասել է Լավրովը CBS News-ին տված հարցազրույցում։ Նա Թրամփին անվանել է «հավանաբար Երկրագնդի վրա միակ առաջնորդը», որը գիտակցում է պատերազմի «արմատական պատճառները» լուծելու անհրաժեշտությունը։

Լավրովի հայտարարությունը հնչեց Կիևի բնակելի թաղամասերի վրա 2014 թվականի ամռանից ի վեր ռուսական հրթիռային ամենամահացու հարվածից հետո, որի հետևանքով զոհվել էր առնվազն 12, վիրավորվել էր 90 խաղաղ բնակիչ։ Մեկնաբանելով Ուկրաինայի մայրաքաղաքի վրա հարձակումը՝ Թրամփն ասել է, որ դա տեղի է ունեցել «շատ անպատեհ ժամանակում»։ «Վլադիմիր, կանգնի՛ր»։ — գրել է Սպիտակ տան ղեկավարը իր Truth Social սոցիալական ցանցում։ Ի պատասխան՝ Լավրովը նշել է, որ Ռուսաստանը հարվածում է միայն ռազմական թիրախներին կամ «զինվորականների կողմից օգտագործվող քաղաքացիական օբյեկտներին»։ Ռուսաստանի պաշտպանության նախարարությունը, իր հերթին, հաղորդել է Ուկրաինայի ավիացիայի, հրթիռային և տիեզերական, մեքենաշինության և զրահատեխնիկայի արդյունաբերության ձեռնարկությունների վրա «մեծածավալ հարվածի» և անօդաչու թռչող սարքերի կիրառման մասին։

Ավելի վաղ Թրամփը հայտարարել էր, որ Ուկրաինայում պատերազմը դադարեցնելու բանակցությունները «հասնում են գագաթնակետին»։ Նա զգուշացրեց, որ ԱՄՆ-ն կհեռանա, եթե առաջընթաց չտեսնի։ Թրամփի խաղաղության ծրագիրը Կիևին է փոխանցվել անցյալ շաբաթ, հաղորդում է Axios-ը։ Մեկ էջանոց փաստաթղթում հստակ նշված է, որ սա «վերջնական առաջարկն» է։ Ըստ ծրագրի՝ Ղրիմը կճանաչվի որպես ռուսական, իսկ Դոնեցկի, Լուգանսկի, Զապորոժիեի և Խերսոնի մարզերի գրավված տարածքները կմնան ժամանակավոր օկուպացիայի տակ։ Միաժամանակ, Ռուսաստանը Ուկրաինային կվերադարձնի Խարկովի մարզի մի մասը։ Զապորոժյեի ատոմակայանը նույնպես կանցնի Կիևի վերահսկողության տակ, սակայն այն պայմանով, որ կայանը կկառավարվի Միացյալ Նահանգների կողմից։ Բացի դրանից, Կիևը ստիպված կլինի հրաժարվել ՆԱՏՕ-ին անդամակցելու իր ծրագրերից և ամերիկացիների հետ կնքել Ուկրաինայի բնական պաշարների համատեղ զարգացման մասին համաձայնագիր։ Միաժամանակ, Թրամփը պատրաստ է չեղարկել Ռուսաստանի դեմ 2014 թվականին Ղրիմի բռնակցումից ի վեր սահմանված բոլոր պատժամիջոցները։