«Ցավոք, իմ հասանելիք դերերը ժամանակին խաղացել եմ»․ Ժենյա Ավետիսյան

Ազգի համար ամենակարեւոր գաղափարը ազգային միասնության գաղափարն է, այսինքն՝ ազգային ինքնագիտակցությունը, իրեն ամբողջի մասնիկը զգալու գիտակցությունը։ Ազգի մասին խոսելիս, ազգային գաղափարները եւ ազգային արժեքները տարբերակելուց առաջ պիտի հասկանանք, թե ինչով է դրսեւորվում անհատ-ազգ հարաբերությունը։ Ազգային արժեքների մեջ է մտնում նաև յուրաքանչյուր ազգի կրոնը, պետական լեզուն, մշակույթը, ընտանիքը և ի վերջո ազգային ու ավանդական էպոսը:

Հայ ազգային ավանդական էպոսը՝ «Սասնա ծռերը» ունի դարերի պատմություն, որը բազմիցս ենթարկվել է մշակման ու հղկվել տարբեր հեղինակների ու գրականագետների կողմից, որի մասին նկարահանվել են փաստավավերագրական, գեղարվեստական ֆիլմեր, բեմադրվել ներկայացումներ: 

Օրերս Գ․ Սունդուկյանի անվան ազգային ակադեմիական թատրոնում «Սասնա ծռեր» էպոսը ժամանակակից լուծումներով, Սամսոն Մովսեսյանի ռեժիսուրայով ներկայացվեց հանդիսականին։ Ներկայացման ավարտին, «Իրավունքի» հետ զրույցում ՀԽՍՀ վաստակավոր և ՀՀ ժողովրդական արտիստ ԺԵՆՅԱ ԱՎԵՏԻՍՅԱՆԸ, ով տարիներ առաջ մարմնավորած Իսմիլ Խաթունի կերպարով հանդիսականի հիշողության մեջ տպավորվել է իր անզուգական խաղով, շեշտեց, որ ժամանակակից լուծումներով «Սասնա ծռերի» վրա ահռելի աշխատանք է տարվել։

- Նախ, ահռելի աշխատանք է կատարված, իսկ ռեժիսորը շատ հետաքրքիր անձնավորություն է, ունի ուրույն մեկնաբանություն, հարուստ է նոր ասելիքներով: Նշեմ, որ ամբողջ աշխարհում չկա նմանատիպ էպոս, ինչպես հայկական «Սասնա ծռերն» է։  Շատ ուրախ եմ բոլորի համար, օրինակ՝ դերասաններից Անդրանիկը, շատ լավ Ձենով Օհան էր խաղում, նրա ամեն բառը հասկանում էի: Ներկայացման մեջ ընդգրկված են փայլուն դերասաններ, ինչպիսիք են՝ Արաքսյա Մելիքյանը, Ծովինար Մարտիրոսյանը, Խորեն Լևոնյանն, ում համար շատ ուրախ եմ:

- Ձեր կարծիքով՝ ի՞նչ բացթողումներ կան բեմադրության մեջ։

- Առհասարակ լավ ներկայացում է, սակայն մի փոքր «հում է»: Ռեժիսորին էլ եմ ասել այդ մասին, որ դերասաններից շատերի ձայներն ու բառերը չեմ լսել, բայց՝ կասեմ նաև հակառակը, որ կան դերասաններ, ում խոսքն ընկալվում ու հասկացվում է: Բայց շատ կարեւոր է, որ ռեժիսորը տեսել ու աշխատել է անսամբլային, ողջ անձնակազմն աշխատել է ճիշտ ու տեղին:

- Կնշե՞ք ներկայացման մեջ մի նորամուծությունն, որ ժամանակին Դուք չեք խաղացել:

 -Մենք ուրիշ սերունդ ենք, ներկայացումը բեմադրել ենք այլ կերպ, «ուրիշ ձեռագրով», ուրիշ խոսքով: Մեր ժամանակների բեմադրությունների հետ չեմ կարող համեմատել, չնայած՝ Իսմիլ Խաթունին մարմնավորած դերասանուհի Արաքսյա Մելիքյանի խաղը շատ եմ հավանել: Այնքան եմ ուրախանում, որ թատրոնում հաճախակի բեմադրվում են նոր ներկայացումներ:

-Տիկին Ժենյա, եթե Ձեզ այսօր դեր առաջարկեին «Սասնա ծռեր» ներկայացման մեջ, ո՞ւմ կերպարը կցանկանայիք մարմնավորել։

- Ցավոք, ես արդեն իմ հասանելիք դերերը ժամանակին խաղացել եմ․․․

ԳԱՐԻԿ ԱՎԵՏԻՍՅԱՆ

Այս թեմայով Բավական չէ՞ լռեք, եվրոյոնջանե՛ր. Նաիրա Զոհրաբյան Եթե դուք չեք կարողանում ղեկավարել, հեռացե՛ք, գնացե՛ք, բա՛վ է. Գուրգեն Մելիքյան Վերջին խոսքն ընդհատելը չեմ կարծում, որ կարող է գնահատվել ժողովրդավարական. Մելիքյան «Գոյ» թատրոնի դուռը կողպվեց ՀՀ կառավարության պատասխանը «Գոյ» թատրոնին