ՀԱՅԵՐԸ ՊԱՏՐԱՍՏ ԵՆ ԿԻՐԿՈՐՈՎԻՆ ԴԻՄԱՎՈՐԵԼ ԼՈԼԻԿՆԵՐՈՎ ՈՒ ՀԱՎԿԻԹՆԵՐՈՎ
Արխիվ 16-20Վերջին օրերին, երբ Երեւանն ընդունել է ֆրանկոֆոն երկրների ներկայացուցիչներին, ու կուլիսներում հատ ու կենտ թվարկվում է ֆրանկոֆոն երգիչների անուններ, ովքեր պետք է հանդես գան Ֆրանկոֆոնիայի շրջանակներում Հանրապետության հրապարակում կայանալիք մեծ համերգին, հանկարծ ասպարեզում հայտնվեց դավաճանի պիտակով նավթախավիարային պետության երկրպագու Ֆիլիպ Կիրկորովը: Արդեն մի քանի օր է Հանրապետության հրապարակում, մեծ համերգի բեմի կառուցման աշխատանքներին զուգահեռ հայտնվեցին Ֆիլիպ Կիրկորովի նկարներով բեռնատար մեքենաներ, որոնք մեծ քանակությամբ բեռնված էին տեխնիկայով:
Շատ արագ շրջանառվեց, որ Ֆրանկոֆոնիայի գագաթաժողովի գալա համերգին ֆրանսիացի երգիչների հետ ելույթ կունենա նաեւ հակահայ ֆիլիպ Կիրկորովը, ում տարիներ առաջ Հայաստանում համերգ ունենալու ցանկությունն ընդունվեց հավկիթներով ու լոլիկներով հարվածների պատրաստակամությամբ: Արդյունքում, Կիրկորովը տեղեկանալով այդ ամենի մասին ու տեսնելով համերգի հայտարարության երեւանյան պատռված պոստերները` հենց հայ էստրադային երգիչների կողմից ու նախաձեռնությամբ միանգամից չեղարկեց համերգն ու հրաժարվեց գալ Հայաստան: Իրականում, ռուս էստրադային երգիչ, ազգուրաց Կիրկորովի հանդեպ նման վերաբերմունքը օդից չէր վերցված, պարզապես հայ` Պետրոս Կիրկորովի (Կիրկորյան) որդին, ով, ի դեպ, հակառակ որդու չի ժխտում իր հայ լինելը, մինչ Բաքվում ունեցած համերգը, մի քանի անգամ հրաժարվել է համերգ ունենալ Հայաստանում եւ հայերի հետ կապված յուրաքանչյուր համերգից ու միջոցառումից: Սակայն, փոխարենը հաճույքով համերգներով մեկնել է Ադրբեջան, երգել է թուրք-ադրբեջանական դրոշն ուսերին գցած ու Հուդայի նման ուրացել իր արմատները, ասելով, թե ես հայ չեմ ու մշտապես անհաղորդ եղել հայերի թե՛ վշտին, թե՛ ուրախությանը: Այսքանից հետո Կիրկորովի նկարներով բեռնատարները միանշանակ չընդունվեցին հայ հասարակության կողմից ու, բուռն արձագանք ստանալով մեկը մյուսից, սկսեցին հետաքրքրվել, թե երբ է գալու այդ ազգուրացը, որպեսզի օդանավակայանում լոլիկներով ու հավկիթներով դիմավորեն նրան: Թեպետ ԱԳՆ-ից «Իրավունքի» հետ զրույցում հերքել են Կիրկորովի հնարավոր ելույթը հրապարակում կայանալիք Ֆրանկոֆոնիայի գալլա համերգին, ու այն բացատրել նրանով, որ ծառայություն մատուցող ռուսական կազմակերպությունը պայմանագիր ունի Կիրկորովի հետ, եւ իրենց մեքենաների վրա պետք է լինեն նրա նկարները, այնուամենայնիվ, սա եւս մեկ անգամ ազդակ էր, որ հայ հանրությունը Կիրկորովի նույնիսկ նկարները չի հանդուրժում Հայաստանում, ինչ մնաց, թե նրա ներկայությունը:
ԼԻԼԻԹ ԵՂԻԱԶԱՐՅԱՆ