«Որոշ ժամանակ առաջ մամուլն ինձ նշանակել էր Շիրակի մարզպետ». Տիգրան Վիրաբյան

Երեւանի փոխքաղաքապետ ՏԻԳՐԱՆ ՎԻՐԱԲՅԱՆԸ դեռեւս շաբաթներ առաջ սոցցանցում անդրադարձել էր ՀՀ մշակույթի նախարարի պաշտոնակատար Նազենի Ղարիբյանի այն հայտարարությանը, թե «Համազգային թատրոնի միակ առանձնահատկությունը Սոս Սարգսյանի կողմից հիմնված լինելն է»: Փոխքաղաքապետը մասնավորապես նշել էր. «Միտք, որն արտահայտում է երկրիս մշակութային քաղաքականությունն ի պաշտոնե մշակողը: Մտահոգի՞չ, չէ,, արդեն վախեցնող է: Դատապարտելի է Համազգայինի լինելիությունը կապել միայն Սոս Սարգսյանի հիմնադրած լինելու փաստի հետ: Եթե այս միտքն արտահայտեր մեկը, ով ոչ մի կապ չունի մշակույթի կամ թատրոնի հետ, երեւի կհասկանայի ու կանցնեի առաջ, բայց տիկինը, գոնե ի պաշտոնե, այսօր նախարարի աթոռն է զբաղեցնում...»:

Ինչեւէ, ի վերջո, ամեն ինչ ավարտվեց Նազենի Ղարիբյանի ու Համազգային թատրոնի ղեկավարների վիսկի խմելով, բայց իշխող քաղաքական ուժի բարձրաստիճան պաշտոնյաների միջեւ նման բացահայտ հակասություն, թերեւս շատ քիչ դեպքեր կարելի է հիշել: Իսկ թե այս ամենն ինչ արձագանք ու հետեւանքներ ունեցավ, «Իրավունքը» հետաքրքրվեց հենց Երեւանի փոխքաղաքապետից, որի արձագանքը մամուլում տեւական ժամանակ քննարկվում էր, որ ամենեւին էլ պատահական չէ:

ԻՇԽԱՆՈՒԹՅՈՒՆՈՒՄ ՄԻՄՅԱՆՑ ՀԱՆԴԵՊ ԸՆԴԴԻՄՈՒԹՅՈՒՆ

– Պարոն Վիրաբյան, Նազենի Ղարիբյանի հայտարարությանը Ձեր կողմից բավական կոշտ արձագանք եղավ: Ի վերջո, այն ազդե՞ց Ձեր միջանձնային հարաբերությունների վրա, թե` ոչ:

– Որեւէ հետեւանք չունեցավ, հուրախություն ինձ` մենք հիմա ապրում ենք մի երկրում, որտեղ ցանկացած ոք, այդ թվում` նաեւ պաշտոնյաներն ունեն իրենց կարծիքը եւ դիրքորոշումը` հայտնելու իրավունք եւ հարգվում է այդ իրավունքը: Գտնում եմ, որ մենք պետք է կարողանանք նաեւ այսպես լինել` միմյանց հանդեպ ընդդիմություն, եւ եթե որոշակի գործողություներում կան որոշակիորեն նկատված թերություններ, պիտի խոսենք:

– Բայց այդպես հրապարակայի՞ն պետք է խոսել, թե՞ դրա համար են հենց աշխատանքային քննարկումները:

– Առաջինը ճիշտ է, որ խոսում ենք մենք փոքր շրջանակում, բայց հարցեր կան, որոնք ավելի մեծ հնչեղություն ունեն, եւ դրանց պետք է արձագանքվի հանրային, ինչը եւ տեղի ունեցավ, եւ որեւէ բացասական արձագանք չի եղել:

– Այսինքն` այդ մասին չեք էլ խոսե՞լ Նազենի Ղարիբյանի հետ...

– Դրանից հետո մի քանի անգամ հանդիպել ենք տիկին Ղարիբյանի հետ, քննարկել ենք ստեղծված իրավիճակը, նաեւ տվել եմ պարզաբանում, թե ինչի համար եմ արել այդ գրառումը: Եվ կրկին` հուրախություն ինձ, տիկին Ղարիբյանը շատ նորմալ արձագանքել է եւ ընդունել է այն բոլոր փաստարկները, ինչն ինձ համար հիմք է հանդիսացել` նման հայտարարություն, գրառում անելու: Եթե որեւէ կերպ ես էլ իմ գործունեության մեջ որոշակի կա՛մ խնդիրներ կստեղծեմ, կա՛մ չեմ կարողանա այնքան հանրամատչելի բացատրել նախաձեռնությունը, որը դժգոհություններ կառաջացնի, եւ իմ գործընկերներից որեւէ մեկը նման գրառում կանի, նման արձագանք կտա, ես նույնպես շնորհակալ կլինեմ եւ կընդունեմ ի գիտություն: Ես, այսպես ասած, այդ դեպքում շնչառություն կզգամ իմ թիկունքում:

Ո՛Չ ՀԵՐՔԵՑ, Ո՛Չ ՀԱՍՏԱՏԵՑ

– Ի դեպ, արդեն տեւական ժամանակ է, ինչ մամուլում լուրեր են շրջանառվում այն մասին, որ Դուք նշանակվելու եք նոր վերաձեւափոխվող ՀՀ կրթության« գիտության« մշակույթի եւ սպորտի նախարարության փոխնախարար, որը կհամակարգի մշակույթի ոլորտը: Որքանո՞վ է այն համապատասխանում իրականությանը:

– Ինչպես տեսնում եք, ես քաղաքապետարանում եմ եւ կատարում եմ իմ լիազորությունները որպես Երեւանի փոխքաղաքապետ: Իհարկե, շատ բարձր պատիվ է, որ քննարկվում է այդ պաշտոնում իմ նշանակման հարցը: Իրոք, ինձ համար մեծ պատիվ է ծառայել մշակույթին, բայց հիմա ես ծառայում եմ Երեւան քաղաքին եւ մայրաքաղաքի զարգացմանը: Այս պահի դրությամբ` իմ օրակարգում նման հարց չկա:

– Իսկ առաջարկ, որպես այդպիսին, եղե՞լ է կամ լինելու դեպքում` կհամաձայնե՞ք:

– Տարբեր ժամանակաշրջաններում մամուլն ինձ տարբեր պաշտոններում է նշանակել, ազատել ու վերանշանակել: Որոշ ժամանակ առաջ մամուլն ինձ նշանակել էր Շիրակի մարզպետ, հիմա նշանակում է ՀՀ կրթության, գիտության, մշակույթի եւ սպորտի նախարարության փոխնախարար: Եթե լինի հստակ տեղեկատվություն, վստահեցնում եմ` Դուք կունենաք այն հենց առաջին ձեռքից:

Զրուցեց ՀՐԱՆՏ ՍԱՐԱՖՅԱՆԸ

Այս թեմայով Իշխող թեւը ամեն ինչ անում է նեղացնելու ընդդիմադիրների օղակը. անկախ ավագանիներին դուրս են թողել հանձնաժողովներից Իրավաբանություն չկա, տուժող չկա, վնաս չկա, ոչինչ չկա, բայց մարդն ազատազրկված է. Տիգրան Աթանեսյան Պառլամենտական երկրում պատգամավորի կարգավիճակն արդեն իսկ ամրագրված հեղինալություն է. Աբրահամյան Ակնհայտ է, որ Ադրբեջանի մեծ թափով սպառազինվելը տեղի է ունենում բոլորի աչքի առաջ. Տիգրան Աբրահամյան ԵՄ-ն «բլոկում է» ցանկացած խնդիր, որը կապված է ՀՀ-ում քաղբանտարկյալների հետ. Աբրահամյան