« 4+4+4 ֆորմատի շրջանակներում, կարծում եմ, կլինի միասնական հայտարարություն». Վահրամ Բաղդասարյան

Կենտրոնական ընտրական հանձնաժողովն արտահերթ նիստում չեղյալ է համարել 4+4+4 ֆորմատի շրջանակներում  2016թ. հունիսի 30-ին ԱԺ-ի կողմից ընդունված Ընտրական օրենսգրքի փոփոխությունների օրինագիծը: Նման որոշման պատճառն այն է, որ այն անհրաժեշտ տեխնիկական միջոցները, որոնք պետք է ներդրվեին մինչև ընտրությունները, ըստ Կառավարության գրավոր պատասխանի, նշված ժամկետում հնարավոր չի եղել ապահովել։  ԿԸՀ-ի այս հայտարարությունից  հետո  ՀՀԿ-ի գործադիր մարմնի անդամ,  ԱԺ փոխնախագահ Էդուարդ Շարմազանովը հայտարարեց`  նոր բանակցություններ  գուցե լինեն իշխանության եւ ընդդիմության միջեւ:  

«Իրավունք»-ը ՀՀԿ խմբակցության ղեկավար Վահրամ Բաղդասարյանից պարզեց` ինչ բանակցությունների մասին է խոսքը, ԿԸՀ-ի այս հայտարարությունից հետո ինչ հարցեր պետք է քննարկվեն 4+4+4 ֆորմատի շրջանակներում: «Քննարկումները շարունակվում են: Վաղն էլ դրանք կլինեն: Սեպտեմբերի մեկից  հետո կլինեն համաձայնեցված հայտարարություններ: Քննարկումների ժամանակ  պետք է հասնենք այնպիսի արդյունքի, որ  ընտրություններին առնչվող բոլոր կասկածները  կարողանանք փարատել եւ բարձրացնել հանրության վստահությունը»,- ասաց Բաղդասարյանը:

 - Փաստորեն, քննարկումները 4+4+4 ֆորմատի շրջանակներում  շարունակվում են:

- Այո: 

- Քաղաքացիական հասարակության ներկայացուցիչները մասնակցո՞ւմ են 4+4+4 ֆորմատի շրջանակներում շարունակվող քննարկմանը:

- Այո, նաև նրանց հետ:

 - ՀԱԿ խմբակցության քարտուղար Արամ Մանուկյանը հայտարարել է, որ Տիգրան Մուկուչյանի հայտարարությունը չի համարում իշխանության հայտարարություն: Այսինքն` Արամ Մանուկյանի խոսքից կարելի է ենթադրել` 4+4+4 ֆորմատի շրջանակներում   ձեռքբերված պայմանավորվածությունը կարող է կյանքի կոչվել: 

- Քանի որ քննարկումները շարունակվում են, Արամ Մանուկյանի կուսակցությունը այս ֆորմատում է: Քննարկումների ավարտից հետո կարծում եմ միասնական հայտարարություն կհնչի:

- ԸՕ-ի դրույթները կյանքի կոչելու համար անհրաժեշտ գումարների  մասին հակասական տեղեկություններ կան:  Արամ Մանուկյանը հայտարարել է` կան գումարները,  իսկ իշխանության ներկայացուցիչները կարծես հակառակն են պնդում:

- Եթե ոչ այս ընտրություններին, ապա մյուս ընտրություններին պետք է  ԸՕ-ի դրույթները կյանքի կոչվեն:Ինչ վերաբերում է  գումարներին, ապա դրանք փաստացի մեր ձեռքի տակ չեն եղել:

- Ընդդիմադիր որոշ ուժեր վստահ են` ՀՀԿ-ը ՏԻՄ ընտրություններում պարտվելու է: Հատկապես Գյումրիում եւ Վանաձորում ՀՀԿ-ի պարտությունը, որոշ ընդդիմադիրների խոսքով, անխուսափելի է...

- Թույլերն իրենց ուժը ոնց պետք է ցույց տան: Կարծում եք` պետք է հայտարարեն, որ մասնակցում են պարտվելու համա՞ր: Փոխանակ իրենց ուժերը գնահատեն, գնահատում են ՀՀԿ-ի ուժերը:  

- Այս  ամենը հաշվի առնելով` քաղաքական ի՞նչ աշուն եք կանխատեսում:

- Չեմ ցանկանում կանխատեսումներով առաջնորդվել: Ընտրությունները սարերի ետեւում չեն: Արդյունքներից ամեն ինչ պարզ կլինի: Մեզ համար կարեւորն այն է, որ լինի քաղաքական պայքար:

Սոնա Դավթյան