o C     08. 07. 2020   : :

ԿԱՐՃ ԼՈՒՐԵՐ

«Կինքնահրկիզվեմ, բայց դա երբեք չի լինի»,- ՀՈՎԻԿ ԱՂԱԶԱՐՅԱՆ

26.05.2020 15:50 ՕՐՎԱ ՊԱՏԿԵՐ ՔԱՂԱՔԱԿԱՆ
«Կինքնահրկիզվեմ, բայց դա երբեք չի լինի»,- ՀՈՎԻԿ ԱՂԱԶԱՐՅԱՆ

Ինչպես հայտնի է, արտակարգ դրության պատճառաբանությամբ, հրաժարվելով Սահմանադրական դատարանի խնդիրը հանրաքվեով լուծելու մեխանիզմից, իշխող ուժը որոշել է հարցը լուծել Աժ-ում: Կա՞ն արդյոք դրա համար մեխանիզմներ, փորձեցինք պարզել ԱԺ "Իմ քայլը" խմբակցության պատգամավոր ՀՈՎԻԿ ԱՂԱԶԱՐՅԱՆԻՑ:

90-60-90 գեղեցկության չափանիշ երբեք չի եղել. Գոհար Հարությունյան

- Ասում են, որ որոշել եք ՍԴ-ի հարցը լուծել ԱԺ-ում: Այդպե՞ս է:

- Այ՛ո, ավելին, այդ խոսակցությունները չէին լինի, եթե Սահմանադրությունը այդպիսի տարբերակ չնախանշեր: Որովհետեւ, ինչպես գիտեք, Սահմանադրության մեջ կան հոդվածներ, որոնք կարող են փոխվել միայն ու միայն հանրաքվեի միջոցով, եւ կան հոդվածներ, որոնք կարող են փոխվել նաեւ ԱԺ-ի կողմից` համապատասխան ընթացակարգով: Եվ այդ հոդվածների թվին է պատկանում նաեւ 213 հոդվածը, որն էլ դրվել էր հանրաքվեի փոփոխության:

- Եթե ԱԺ-ի միջոցով հնարավոր էր ՍԴ-ի ներկայիս կազմից ազատվել, ուրեմն էլ ինչի՞ էիք հանրաքվե ուզում անել:

- Իհարկե, հնարավոր էր, բայց հաշվի առնելով այդ հարցի քաղաքական բաղկացուցիչ մասը, որը շատ կարեւոր էր եւ էական ինչպես միջազգային կազմակերպությունների նկատմամբ ունեցած մեր պարտավորվածությունների, համագործակցությունների չափանիշները, այնպես էլ հասարակության կարծիքը:

- Փաստորեն, հիմա էլ հասարակության կարծիքը կարեւոր չի՞:

- Ոչ թե չի կարեւորվելու, այլ այս պահին, կորոնավիրուսով պայմանավորված, այս տարբերակն է քննարկվում, դրանք դեռ խոսակցություններ են: Այս թեմայով այսքանը:

- Պարոն Աղազարյան, Դուք մեկն էիք այն պատգամավորներից, ով կողմ քվեարկեց  "Լանզարոտեի" հայտնի կոնվենցիայի վավերացմանը: Ձեզ համար, փաստորեն, միեւնո՞ւյնն է այն, որ մեր տարրական դասարանների երեխաներին սեռական դաստիարակություն է դասավանդվելու:

- Եթե Դուք երդվեք, որ կարդացել եք կոնվենցիան ամբողջությամբ, ոչ թե կետ առ կետ, ես կպատասխանեմ Ձեր հարցերին, եթե ոչ, ուրեմն չեմ պատասխանի Ձեր հարցերին:

- Կարեւորը, որ Դուք կարդացած լինեք:

- Ես կարդացել եմ, իհարկե:

- Ու ոչ մի խնդրահարույց կետ չե՞ք գտել:

- Ոչ մի:

- Փաստորեն, որ 9-12 տարեկան երեխան կարող է սեռական հարաբերություն ունենալ, եւ եթե դա լինի փոխադարձ համաձայնությամբ, այլեւս քրեորեն պատժելի չէ՞:

- Հա, եթե փոխհամաձայնությամբ` 15-16 տարեկանների միջեւ, ուրեմն օրենքով պատժելի չէ: Հետո, Դուք լավ չեք հիշում երեւի, որ այդ կոնվենցիան ստորագրվել է 2010 թվականին:

- Ես շատ լավ հիշում եմ, պարոն Աղազարյան...

- Իսկ մյուսները հիշո՞ւմ են, որ էսօր դրել-խոսում են:

- Բայց հենց Դուք այդքան հրատապ, առանց քննարկումների վավերացրիք:

- Դե դա բոլորը վավերացրել են, բացի Իռլանդիայից եւ Հայաստանից: Հիմա մենք էլ պետք է էդ հարցին անդրադառնայինք. հո չէի՞նք կարող առկախված թողնել:

- Բայց ո՞րն էր շտապողականության պատճառը:

- Արդեն պատասխանեցի, վերջ:

- Ի դեպ, կոնվենցիայի վավերացմանը նախորդել էր պատգամավորների հայտնի ծեծկռտուքը: Դրա՞ն ինչպես եք վերաբերվում:

- Դա վատ բան է, բնականաբար, բայց դա սարսափելի չէ, որովհետեւ բոլորն էլ մարդ են, բոլորն էլ կարող են դուրս գալ հունից:

- Բայց ԱԺ-ին ինչքանո՞վ էր հարիր նման տեսարանը:

- Աշխարհի բոլոր պառլամենտներում էլ նման բաներ լինում են, սա պետք է չի ողբերգություն սարքել: Մարդ են, էմոցիաներն են տեղիք տվել:

- Ո՞վ էր մեղավոր, ըստ Ձեզ:

- Իմ կարծիքով, հրահրեց պարոն Մարուքյանը, ինքը սառնասիրտ հաշվարկով դա արեց: Սասուն Միքայելյանը նպատակ չուներ վիրավորելու Էդմոն Մարուքյանին, բայց պարոն Մարուքյանը տեսաք, թե ինչ արեց:

- Ի դեպ, Մարուքյանն ասաց, որ նա է եկող իշխող ուժը: Դուք տեսնո՞ւմ եք նրանց` որպես եկող իշխանություն:

- Տեսականորեն, իհարկե, տեսնում եմ, ինչու ոչ, բավականին լավ թիմ ունեն, պատրաստված, մաքուր անցյալով մարդիկ են:

- Բա Ձեր թիմակիցներն ասում են, որ Մարուքյանը հեչ էլ մաքուր անցյալ չունի:

- Հիմա ես չասացի, որ կոնկրետ Մարուքյանը մաքուր անցյալ ունի: Ասացի, որ ունի լավ թիմ, եւ մեծ մասը մաքուր անցյալով է:

- Իսկ Մարուքյանը, փաստորեն, ո՞չ:

- Դե հիմա չեմ կոնկրետացնում, թե ով ոնց:

- Նիկոլ Փաշինյանը պարբերաբար ասում է, որ ինքը կգնա միայն ժողովրդի պահանջով: Փաստորեն, ինքն է՞լ է զգում, որ պետք է հեռանա:

- Այդպիսի բան տեսանելի ապագայում չի լինելու: Որովհետեւ Փաշինյանը կատարել է բոլոր այն խոստումները, որոնք որ տվել է ժողովրդին, մի բան էլ ավել:

Աղազարյան Հովիկը եւս թքած ունի Նիկոլի հրամանների վրա

- Կկոնկրետացնե՞ք, օրինակ, ո՞ր խոստումներն է կատարել:

- Բոլորը` ասացի:

- Օրինակ, պարոն Փաշինյանը ասում էր, որ պետք է արագաչափերը հանել, կարմիր գծերը վերացնել եւ էլի շատ ու շատ բաներ:

- Դա Դուք կարող եք հարցնել քաղաքացի եւ այն ժամանակվա պատգամավոր Փաշինյանին: Երբ ինքը այդ միտքը արտահայտել էր, դա չի նշանակում, որ դա ընդունելի էր ժողովրդի կողմից: Այնպես որ, պետք չի դրանով ենթադրություններ անել:

- Դրանք ենթադրություններ չեն, այլ կոնկրետ խոստումներ:

- Ասացի, այդ հարցը պետք էր տալ պատգամավոր Փաշինյանին:

- Բայց պատգամավոր Փաշինյանի կողքին էիք, չէ՞:

- Պետք չի սաղ խառնել իրար, վերջ, էլ չեմ պատասխանելու:

- Լավ, իսկ ի՞նչ կասեք պարոն Փաշինյանի հնչեցրած մտքերի վերաբերյալ` «ասֆալտին կփռեմ, պատերին կծեփեմ» եւ այլն: Դրանք ատելությանը նպաստող արտահայտություններ չե՞ն:

- Եթե Դուք, որպես փորձառու ժուռնալիստ, այդ խոսքերը բառի ուղիղ իմաստով եք հասկանում, այդ դեպքում ես ցավում եմ:

- Բա ի՞նչ իմաստով է ասում, պարո՛ն Աղազարյան:

- Փոխաբերական իմաստով: Օրինակ` «ասֆալտին փռել»  նշանակում է խստագույնս պատասխանատվության կենթարկենք: Կամ որ ասում է. «Պադյեզդներից կհանենք, ասֆալտին կփռենք», դա նշանակում է, որ թաքստոցներից կհանենք ու խստ պատասխանատվության կենթարկենք:

- Պարոն Աղազարյան, պարոն Փաշինյանի ընտանիքին մեղադրում են մաքսանենգ ծխախոտների բիզնեսում  ներգրավված լինելու մեջ...

- Ես ասել եմ, որ եթե պարզվի, որ Հրաչ Հակոբյանը որեւէ մասնակցություն ունի այդ սխեմաներին, ես կհրաժարվեմ իմ մանդատից: Բայց դա չի լինի:

- Իսկ եթե հանկարծ պարզվի, որ պարոն Փաշինյանն էլ այդ մասին իմացե՞լ է:

-Կինքնահրկիզվեմ, բայց համոզված եմ, որ դա երբեք չի լինի:

- Որտե՞ղ կինքնահրկիզվեք:

- Մի տեսանելի տեղ:

- Օրինա՞կ:

- Այդ օրը չի գա ախր, Նիկոլ Փաշինյանը այդ բաների մեջ չի մտնի երբեք:

- Այնուամենայնիվ, որտեղ եք պատրաստվում ինքնահրկիզվել:

- Ասենք` հրապարակում, բայց ասում եմ այդ օրը չի գալու: Իզուր լրատվամիջոցները թող չանհանգստանան:

- Պարոն Աղազարյան, բա ինչո՞ւ ԿԸՀ-ի Տիգրան Մուկուչյանից չեն ազատվում ներկայիս իշխանությունները: Չէ՞ որ ինքն էլ էր, պարոն Փաշինյանի խոսքերով, թվեր նկարում:

- ԿԸՀ նախագահը երկու անգամ է թիվ նկարել` 95-96 թվականներին,  մնացածը հանձնաժողովներն են նկարել:

- Այսինքն, Մուկուչյանը լրիվ արդա՞ր մարդ է:

- Բայց ես ո՞նց կարող եմ նման դատողություններ անել: Ես նկարելու մասին եմ ասում:

- Այսինքնª Լեւոն Տեր-Պետրոսյանի օրո՞ք են թվեր նկարել:

- Բա իհարկե, բայց էդ թեմայով վերջ:

- Բա գլխավոր դատախազի մասին ի՞նչ կասեք: Նիկոլ Փաշինյանն էր, չէ՞, որ ասաց` «Քուանշ, պարոն դատախազ»:

- Դե հանելու մեխանիզմները չկան: Եթե լինեին, դատախազին էլ հանելու խնդիր կարող է լիներ:

- Դե ՍԴ-ին էլ չկար, բայց փնտրում եք:

- Չէ, կարծեմ դատախազության դեպքում լրիվ ուրիշ մեխանիզմներ են: Համ էլ ՍԴ-ն լրիվ ուրիշ հարց է, ՍԴ-ն լրիվ իր իրավասությունների շրջանակից դուրս է եկել: Վերջ, էլ չեմ դիմանում հարցերիդ: Սպանեցիր խաչաձեւ հարցերով, վերջ...

Զրույցը` ԻԼՈՆԱ ԱԶԱՐՅԱՆԻ

 

КОМСОМОЛЬСКАЯ ПРАВДА