ԿԱՐՃ ԼՈՒՐԵՐ

«Միշտ էլ կտրուկ դեմ եմ արտահայտվել Եվրոպայից Հայաստան ներմուծվող այդ արհեստական տրանսպլանտացիաներին»

15.09.2017 20:30 ՕՐՎԱ ՊԱՏԿԵՐ ՔԱՂԱՔԱԿԱՆ ՀԱՆԴԻՊՈՒՄ
«Միշտ էլ կտրուկ դեմ եմ արտահայտվել Եվրոպայից Հայաստան ներմուծվող այդ արհեստական տրանսպլանտացիաներին»

Այս շաբաթ քաղաքական առանցքային թեմաների թոփ 10-յակի առաջին տեղում, կարծես, ԱԺ «Ծառուկյան» խմբակցության ղեկավար, ԲՀԿ նախագահ Գագիկ Ծառուկյանի պատասխաններն էին` հնարավոր կոալիցա կազմելու, ԵՏՄ-ում Հայաստանի մնալու կամ դուրս գալու վերաբերյալ, որոնք դարձան լայն քննարկման առարկա: Այս մասին «Իրավունքը» զրուցեց ԱԺ «Ծառուկյան» խմբակցության պատգամավոր ԳԵՎՈՐԳ ՊԵՏՐՈՍՅԱՆԻ հետ, որը քաղաքական որոշակի փակագծեր բացեց:

Այսօր Արմեն Սարգսյանի ծննդյան օրն է. նախագահը 65-ամյակը կտոնի ընտանեկան միջավայրում

«ԿՈԱԼԻՑԻԱ ՄՏՆԵԼՈՒ ԵՎ ԻՇԽԱՆԱՏԵՆՉՈՒԹՅԱՆ ՄԱՐՄԱՋՈՎ ՉԵՆՔ ՏԱՌԱՊՈՒՄ» 

– Պարոն Պետրոսյան, որպես ընդդիմադիր առաջնորդ, ուշագրավ էր, որ Գ. Ծառուկյանն իր խոսքում բավական լոյալ գտնվեց իշխանությունների նկատմամբ: Կարելի՞ է ասել, որ ընդդիմադիր «Ծառուկյան» դաշինքում իրավիճակ է փոխվել:

– Չեմ կարծում, թե այդտեղ լոյալություն է դրսեւորվել, այլ պարզապես` իրատեսություն: Պարոն Ծառուկյանը, ինչպես միշտ, չի խոսում այն մասին, ինչն իրականություն չէ, ժամանակավրեպ կամ անժամանակ հայտարարություններով հանդես չի գալիս: Իրեն ուղղված հիմնական հարցադրումները վերաբերում էին ԵՏՄ-ին միանալուն կամ դուրս գալուն եւ կոալիցիա կազմելուն, եւ պարոն Ծառուկյանը հստակ ասաց, որ ԵՏՄ-ից դուրս գալը նպատակահարմար կլինի այն ժամանակ, երբ այդ առաջարկության հեղինակները կարողանան խելամիտ այլընտրանք առաջարկել:  Դժբախտաբար, ունենք մի սովորություն` հրաժարվում ենք հնից` չունենալով նորը, սա է խնդիրը: Եվ պարոն Ծառուկյանը, որը լիարժեք տիրապետում է մեր տնտեսության բոլոր խութերին ու խնդիրներին, հասկանում է, որ 200 միլիոնանոց շուկան հենց այնպես թողնել եւ անորոշ ակնկալիքով դուրս գալ այդ միությունից, գնալ անորոշ ուղղությամբ, անընդունելի է: 

– Անդրադառնանք նաեւ իշխանական կոալիցիայի մաս դառնալու «Ծառուկյան» դաշինքի հնարավորությանը: Ի վերջո, այս հարցը քննարկվո՞ւմ է դաշինքում, թե` ոչ:

– Պարոն Ծառուկյանն այստեղ եւս շատ հստակ պատասխանեց` այս պահին նման հարց չկա օրակարգում: Հիմա խորհրդարանական ընդդիմություն ենք, իրականացնում ենք մեր գործառույթները: Իսկ երբ կգա այն պահը, որ հրապարակի վրա կհայտնվի այդ խնդիրը, եւ նպատակահարմար կգտնենք մեր մուտքը կոալիցիա, մեր կարծիքը կասենք: Ինչպես գիտեք, կոալիցիա առաջարկելու իրավունքը պատկանում է խորհրդարանական, քաղաքական մեծամասնությանը, հետեւաբար նման խնդրի մասին իրենց լռության պայմաններում որքանո՞վ է խելամիտ, որ մենք խոսենք կոալիցիայի մասին: Կոալիցիա մտնելու եւ իշխանատենչության մարմաջով չենք տառապում, այլ պարզապես, պարոն Ծառուկյանն ընդգծել է, որ ոչինչ ինքնանպատակ չենք ուզում անել: 

«ԵԹԵ ԱՆԳԱՄ ԱՅԴՊԻՍԻ ՈՐՈՇՈՒՄ ԿԱՅԱՑՎԻ, ԱՅՆ ՉԻ ԼԻՆԵԼՈՒ ՈՏՔԻ ՎՐԱ ԵՎ ՄԻԱՆՁՆՅԱ»

– Բայց նաեւ Գ. Ծառուկյանը չի բացառել, որ «Ծառուկյան» դաշինքը հնարավոր է իշխող Հանրապետական կուսակցության հետ կոալիցիա կազմի...

Տարբեր ուժեր փորձում են ազատամարտիկներին վերահսկողության տակ վերցնել

– Իհարկե, չբացառեց, բայց ինչպե՞ս կարելի է քաղաքականության մեջ բացառել մի բան, չէ՞ որ կա հայտնի դոկտրին` քաղաքականության մեջ երբեք մի՛ ասա` երբե՛ք: Ընդամենն այս կանոնի տիրույթում` այո՛, ոչինչ չպետք է բացառել: Եվ եթե անգամ  այդպիսի որոշում կայացվի, այն չի լինելու ոտքի վրա, միանձնյա: Այդ հարցը պետք է քննարկվի կուսակցությունում, խմբակցությունում: Իսկ մեր կուսակցությունում, փառք Աստծո, ներկուսակցական դեմոկրատիան հիմա շատ բարձր հիմքերի վրա է, եւ պարոն Ծառուկյանը միշտ էլ նշանակալի հարցերը քննարկում է կուսակցության ներսում, ու մեր որոշումներն ընդունվում են համաձայնեցված: Այնպես որ, եթե այդպիսի խնդիր լինի, եւ մեր կուսակցությունը գա այն կարծիքին, այն իրական համոզմունքին, որ կոալիցիա մտնելով` ավելի շուտ կարող ենք կենսագործել մեր նախընտրական 15 կետերը եւ դրանց հետ կապված մեր մյուս անելիքները` չի բացառվում, որ այդ առթիվ դրական որոշում կայացվի: Բայց այս պահին սա անժամանակ հարցադրում է:

– Այսօր չե՞ք կարծում, որ «Ծառուկյան» դաշինքն ապացուցելու խնդիր ունի, որ ընդդիմադիր է: Օրինակ, անգամ Ձեր թիմակից գործարար Հակոբ Հակոբյանն է մտահոգված, որ «Ծառուկյան» դաշինքի պատգամավորները լղոզված քաղաքականություն են վարում:

– Հ. Հակոբյանի արտահայտությունները մեկնաբանելու ո՛չ իրավունք եմ ինձ վերապահում, ո՛չ էլ այդպիսի անհրաժեշտություն եմ տեսնում: Օրինակ, իմ ո՞ր ելույթն է լղոզված: Անձամբ ես եւ մեր շատ պատգամավորներ հստակ արտահայտված, պահանջատիրական առաջարկներով ու քննադատությամբ ենք հանդես գալիս: Ավելին ասեմ` ճիշտ հակառակը` շատ դեպքերում մեզ մեղադրում են ավելի սուր ելույթներ ունենալու մեջ, քան իբր թե կարելի էր: Եվ եթե Հ. Հակոբյանն այդպիսի արտահայտություն է արել, ես պարտավոր չեմ այն ընդունել որպես քննադատություն ու ամեն օր քնել-արթնանալուց դրա մասին մտածել: Թող իրենք մտածեն իրենց անելիքների մասին: Եթե Հ. Հակոբյանը չի հայտնվել Ազգային ժողովում, չի նշանակում, որ նա իրավունք ունի հեռվից, առանց մեր պատգամավորների աշխատանքային անցուդարձի մասին իրական պատկերացում կազմելու, այդպիսի մերկապարանոց հայտարարություններ անել: 

«ԱՌԻԹԸ ԲԱՑ ՉԵՄ ԹՈՂԵԼ ԵՎ ՄԻՇՏ ԿՏՐՈՒԿ ԴԵՄ ԵՄ ԱՐՏԱՀԱՅՏՎԵԼ»

– Ի դեպ, երբ արդեն հստակ է «Ծառուկյան» դաշինքի դիրքորոշումը ԵՏՄ-ում Հայաստանի անդամակցությունը չդադարեցնելու մասին, ինչպե՞ս եք վերաբերում Եվրամիության հետ ժամանակ առ ժամանակ ի հայտ եկող քաղաքական «սիրախաղերին»: 

«Մանվել Գրիգորյանի գիշատիչ կենդանիներ պահելու մեջ օրենքի խախտում չկա»

– Քաղաքական սիրախաղեր երբեք չենք տվել, այն ավելի շատ պետական մակարդակի սիրախաղ է: Իսկ այս պահին մենք պետական մակարդակը չենք ներկայացնում: Ճիշտ է, ներգրավված ենք Ազգային ժողովում, բայց ՀՀ Սահմանադրության, ԱԺ կանոնակարգ-օրենքի եւ Ընտրական օրենսգրքի համաձայն` «Ծառուկյան» դաշինքը համարվում է քաղաքական, խորհրդարանական ընդդիմություն: Իսկ ընդդիմությունը չի կարող նման սիրախաղերի մեջ մտնել, եւ մեզ ընդհանրապես չի հետաքրքրում այդ սիրախաղը ոչ մի բնագավառում, այդ թվում` եւ արտաքին քաղաքականության մեջ: Միեւնույն ժամանակ, այն կարծիքին ենք, որ չի՛ կարելի պատուհանները փակել բոլոր ուղղություններով ու մեկուսանալ ամբողջ աշխարհից: Հայաստանը չունի այն բնական ռեսուրսները, այն աշխարհագրական դիրքը, որ կարողանա մեկուսանալ աշխարհից եւ ինքնաբավ ապրել արժանավայել կյանքով: Ուստի` ստիպված ենք բարեկամական հարաբերություններ ունենալ եւ առավել քան ճիշտ դիվանագիտություն վարել ցանկացած երկրի հետ: Ի՞նչն է խանգարում, որ ե՛ւ Եվրոպական միության երկրների հետ բարիդրացիական եւ փոխշահավետ հարաբերություններ ունենանք, ե՛ւ ԵՏՄ անդամ պետությունների: Կարծում եմ` այսօր շատ հստակ դիրքորոշումներ ենք արտահայտում, որեւէ տարընկալման տեղիք չկա: Այնպես որ, եթե առանձին մարդիկ այդ դիրքորոշումները հակված են այլ կերպ մեկնաբանել, իրենց անձնական խնդիրն է:

– Այս դեպքում ինչպե՞ս կբացատրեք այն, որ ԱԺ Եվրաինտեգրման մշտական հանձնաժողովը փորձում է գոհացնել Եվրամիության պահանջները եւ հիմա էլ որոշել է «Ընտանեկան բռնության» օրենքի նախագիծը` իր մեջ պարունակող բոլոր «ականներով» հանդերձ, խորհրդարան բերելուն ընդառաջ` այդ թեմայով քննարկում իրականացնել` ինչ-որ ՀԿ-ների հետ:  

– Ընդհանրապես` ոչ միայն Ազգային ժողովում աշխատանքի այս կարճատեւ ընթացքում, այլեւ մինչեւ այդ էլ` նաեւ գործադիր իշխանությունում իմ աշխատած ժամանակահատվածում ու իմ գիտամանկավարժական գործունեության ժամանակ առիթը բաց չեմ թողել եւ մշտապես կտրուկ դեմ եմ արտահայտվել Եվրոպայից Հայաստան ներմուծվող այդ արհեստական տրանսպլանտացիաներին: Ոչ մի երեւույթ, եթե այն տեղայնացնելուց առաջ չես հաշվարկում եւ հաշվի չես առնում դրա սոցիալական, քաղաքական, տնտեսական, իրավական, ժողովրդագրական, ազգային մտածողության եւ այլ չափանիշները, չի կարող ցանկալի արդյունք տալ: Իհարկե, լինելով տղամարդ, լինելով իրավաբան` չեմ կարող կողմ լինել ընտանեկան բռնությանը, բայց արդյոք «ընտանեկան բռնություն» հասկացողությունը եվրոպական երկրներում նույն ընկալումն ունի, ինչ որ մեզ մոտ: Հիմա եթե որեւէ մեկն իր կնոջը դիտողություն անի, գուցեեւ մի փոքր բարձր ձայնով, սա մենք դիտարկե՞նք ընտանեկան բռնություն, թե՞ սա սովորական հայկական օջախին բնորոշ վարվեցողություն է: Էլի եմ ասում` իհարկե, կողմ չենք բռնություններին ոչ մի բնագավառում, այդ թվում` ընտանիքում, որը մեր հասարակության հիմնական բջիջն է` համաձայն ՀՀ Սահմանադրության: Սակայն ասել, թե այսպիսի օրենք կա Եվրոպայում, եկեք մեխանիկորեն տեղայնացնենք Հայաստանում, միշտ էլ այն կարծիքին եմ եղել, որ այդ մեխանիկական տեղայնացումները չեն կարող արգասաբեր լինել:

«Շախմատում եւ քաղաքականության մեջ լինում են անհավանական երեւույթներ»

ՀՐԱՆՏ ՍԱՐԱՖՅԱՆ

 

КОМСОМОЛЬСКАЯ ПРАВДА