o C     06. 08. 2020   : :

ԿԱՐՃ ԼՈՒՐԵՐ

ՎԻԿՏՈՐ ՍՈՂՈՄՈՆՅԱՆ. ՄԵՆՔ ՆՊԱՏԱԿԱԴՐՎԱԾ ԵՆՔ ԽՈՐՀՐԴԱՐԱՆԱԿԱՆ ԸՆՏՐՈՒԹՅՈՒՆՆԵՐԻՆ

05.09.2018 21:15 ՀԱՆԴԻՊՈՒՄ
ՎԻԿՏՈՐ ՍՈՂՈՄՈՆՅԱՆ. ՄԵՆՔ ՆՊԱՏԱԿԱԴՐՎԱԾ ԵՆՔ ԽՈՐՀՐԴԱՐԱՆԱԿԱՆ ԸՆՏՐՈՒԹՅՈՒՆՆԵՐԻՆ

«Իրավունքի» «Ուղիղ կապ» խորագրի հյուրն էր ՀՀ 2-րդ նախագահ Ռոբերտ Քոչարյանի գրասենյակի ղեկավար ՎԻԿՏՈՐ ՍՈՂՈՄՈՆՅԱՆԸ: Մեր ընթերցողների եւ ֆեյսբուքյան օգտատերերի կողմից հնչած հարցերի մեծ մասը վերաբերում էր ՀՀ երկրորդ նախագահ Ռոբերտ Քոչարյանի դեմ հարուցված քրեական գործի եւ նախագահի քաղաքականությանը վերադառնալուն: Առաջին հարցը մերն էր՝ հաշվի առնելով Ռ.Քոչարյանի հետ կապված վերջին պատմությունը, որ ՀՀ երկրորդ նախագահի անձնագիրն իր տնօրինման տակ չէ: Ի՞նչ նորություն կա այդ մասին, խնդրեցինք ներկայացնել պարոն Սողոմոնյանին:

Ներկայիս ընդդիմադիրները մեջքից խփող չեն. Տիգրան Քոչարյան (Տեսանյութ)

 

«Նախագահը մեկնում էր բժշկական հետազոտության»

- Մեր փաստաբանները այսօր կհանդիպեն մամուլի ներկայացուցիչների հետ եւ մանրամասն տեղեկություններ կհաղորդեն` այս ամենի հետ կապված: Այնպես որ, հարցը դեռ ընթացքի մեջ է, հանդես կգանք բոլոր զարգացումների մասին: Նախագահն իրոք պատրաստվում էր մեկնել, այստեղ իրոք գաղտնիք չկա: Դուք տեսաք, որ մենք բացահայտ հայտարարեցինք, որ մի քանի օրով մեկնելու մտադրություն ունի: Հիմա էլ ունի, երբ այս տեխնիկական հարցերը լուծվեն, կարծում եմ՝ կմեկնի:

- Կարծում եք, որ երկրորդ նախագահին տեղաշարժի իրավունքից զրկելը գալիս է ՀՔԾ-ի՞ց, թե՝ ավելի վերեւներից:

- Ես չեմ կարող ասել, բայց մենք տեղյակ ենք գոյություն ունեցող պրակտիկայի մասին առ այն, որ մեղադրյալների, կասկածյալների վերաբերյալ նույնիսկ այն ժամանակ, երբ չկա խափանման միջոց, հաճախ տեղաշարժը սահմանափակվում է: Հիմա կասկած ունենք, բայց փաստաբանները վաղը օրենքի հիմնավորումներով կներկայացնեն:

- Գաղտնի՞ք է, թե ուր էր պատրաստվում մեկնել պարոն Քոչարյանը, հաշվի առնելով նաեւ, որ համառ խոսակցություններ են շրջանառվում, թե պարոն Քոչարյանը պատրաստվում էր մեկնել ՌԴ:

- Երեկ փաստաբաններից մեկը հայտարարել է, որ նախագահը մեկնում էր բժշկական հետազոտության, եւ պետք չէ այդտեղ ինչ-որ քաղաքական ելեւէջներ փնտրել:

 

«Քոչարյանը մարտի 1-ից մաքրվելու խնդիր չունի»

- Պարոն Սողոմոնյան, կարո՞ղ եք որոշակի փակագծեր բացել, թե ի՞նչ հիմքերով է պարոն Քոչարյանին, ի վերջո, նման մեղադրանք առաջադրվել:(Արմինե Սուքիասյան)

- Այս պահին ես, ցավոք, չեմ կարող բացահայտել որեւէ նոր բան` նախաքննական գաղտնիքը ինչպես եղել է այդպես էլ կա մինչեւ հիմա: Գործի մանրամասների մասին կարող է խոսել մարդ, ով ծանոթ է մանրամասներին հավուր պատշաճի եւ կարող է դրանք բացահայտել: Այս պահին ե՛ւ պարոն Քոչարյանը, ե՛ւ փաստաբանները, ովքեր մանրամասնորեն ծանոթ են գործին, իրավունք չունեն հրապարակել նախաքննության մանրամասները: Մենք, ինչպես նաեւ՝ հանրությունն իր տրամադրության տակ ունի ՀՔԾ հայտնի հայտարարությունը, որը հրապարակվեց հունիսի 5-ին, որով քրեական գործի նոր դրվագի մասին հայտարարվեց: Մենք բազմիցս դրա մասին խոսել ենք եւ ասել ենք, որ մեր կարծիքով` այս քրեական գործը իրավական նոնսենսի տարրեր է պարունակում եւ որեւէ քննադատության չի դիմանում: Այն պնդումները, որ մենք գործ ունենք քաղաքական հետապնդման հետ, նաեւ պայմանավորված է այդ գործի ակնհայտ շինծու էլեմենտներով, որտեղ որոշակի բառախաղի, որոշակի հասկացությունների օգտագործման միջոցով փորձ է արվում մեղսագրել նախագահ Քոչարյանին ծանրագույն մի հանցանք, որ ինքը իհարկե չի գործել: Բացի այդ, մենք բազմիցս ասել ենք, եւ հիմա էլ ուզում եմ կրկնել, որ ինչպես ՀՔԾ ղեկավարն էր իր հարցազրույցում ասել` Ռոբերտ Քոչարյանին ներկայացված չէ մեղադրանք` տասը մարդու սպանության համար: Խոսքը բոլորովին այլ` օրենսդրական, իրավական, իմ կարծիքով` հարմարեցված դրույթների արդյունքում հարուցված քրեական գործի մասին է:

- ՀՔԾ պետը անդրադարձավ նաեւ նախաքննության գաղտնիությունը բացահայտելու պարոն Քոչարյանի կոչին, բայց գոնե ես մինչեւ վերջ այդպես էլ հասկանալի չեղավ, թե ինչո՞ւ է գործը գաղտնի պահվում: (Անահիտ Առաքելյան)

- Իհարկե, նախաքննության գաղտնիքը չհրապարակելը, որպես կանոն, նախաքննության շահերից է բխում: Բայց մենք այս կոնկրետ գործով երկու հանգամանք պետք է ֆիքսենք: Նախ` ակնհայտ է, որ ՀՔԾ-ն հատվածական ձեւով է հանրությանն այդ գործից ինչ-ինչ դետալներ են ներկայացվում` տպավորություն ստեղծելով, որ նախագահ Քոչարյանը միանշանակ մեղավոր է եւ չի կարող լինել երկրորդ, երրորդ կարծիք: Երկրորդ խնդիրը, որի վրա ես ուզում եմ հրավիրել հանրության ուշադրությունը, այն է, որ մենք չունենք հանրությունից թաքցնելու որեւէ բան, պատրաստ ենք այս գործը հանրության առաջ քննարկել: Թե՛ մարտի 1-ին, թե՛ դրանից առաջ նախագահ Քոչարյանի գործողությունները հրապարակային են եղել, մենք այդ առումով որեւէ կաշկանդվածություն չունենք: Այդ գործողությունները որեւէ հանցակազմ չեն պարունակում, եւ մենք, ինչպես որ ասել ենք, այսօր վերահաստատում ենք, որ պատրաստ ենք այդ գործը հանրության աչքի առաջ քննարկել եւ պատմել բոլոր գործողությունների մասին: Մեզ համար այս պահին նախաքննության գաղտնիք ասվածը, ըստ էության, ստացվում է, որ խոչընդոտ է՝ հանրությանը տրամադրել իրական տեղեկատվությունը: Դրա համար մենք կոչ ենք անում՝ քանի որ սա հանրային հնչեղություն ունեցող գործ է, հանել այդ մտացածին շղարշը եւ հանրության տեղեկացնել քրեական գործի ողջ մանրամասները: Պարզ է, որ ՀՔԾ-ն կասի, որ նախաքննական գաղտնիք է եւ այն բացահայտել անհնար է: Բայց չէ՞ որ մի օր անխուսափելիորեն  բացահայտվելու է այդ քրեական գործը, եւ բոլորը իմանալու են, թե ինչ հանգամանքներում է երկրորդ նախագահին նման մեղադրանք առաջադրվել: Հուսով եմ՝ այդ օրը արագ կգա, եւ հանրությունը ի վերջո կիրազեկվի:

Նոր զարգացումները երկար սպասել չեն տա. կլինի «Կոնսեսուս մինուս 1». Մանասերյան

- Պարոն Սողոմոնյան, մարտի 1-ի հետ կապված, անկախ այն բանից, ով ինչ հրաման է տվել, ով ինչ է արել այդ օրերին, փաստն այն է, որ տեղի է ունեցել բախում, որի ժամանակ զոհվել են մարդիկ, այդ թվում՝ ոստիկանները: Ա՛յ, կարո՞ղ եք հիշել գոնե խոսակցությունների մակարդակով՝ ինչո՞ւ այդ մարդիկ զոհվեցին եւ ի՞նչպես զոհվեցին: Դուք` որպես անձ, ո՞ւմ կմեղադրեիք: (Սուրեն Կարայան)

- Եթե ամբողջ տեղի ունեցածը բաժանենք շրջափուլերի` գործ ունենք երեք մեծ շրջանի հետ: Առաջինը՝  Ազատության հրապարակում տեղի ունեցած գործողությունն է, որի արդյունքում ոչ ոք չի զոհվել: Դրանից հետո սկսվեց երկրորդ փուլը` բարիկադներով շրջափակեցին քաղաքի կենտրոնական հատվածները: Երկրորդ փուլը, իմ կարծիքով, կարող էր խաղաղ ավարտ ունենալ, եթե կոռեկտություն ցուցաբերեր հենց ցուցարարների կողմը` ի դեմս նույն Լեոն Տեր-Պետրոսյանի: Փաստերի շարանը այդքան չգիտեմ, բայց հստակ է, որ անգամ Վեհափառն է փորձել է մեղմել իրավիճակը: Դուք հիշում եք, որ պարոն Օսկանյանը եւս հանդես եկավ խոհեմություն ցուցաբերելու կոչով: Բայց այդ ամեն ինչով հանդերձ, երեկոյան տեղի ունեցավ բախում, արտակարգ դրություն մտցվեց: Հիմա ո՞ւմ մեղադրել այս բախման մեջ: Ես կարող եմ ասել նաեւ, որ այդ ճանապարհով գնացող մարդիկ իրենց հերթին պետք է հասկանային, որ դրա արդյունքը կարող էր տանել բախման, եւ գուցե հենց հասկանալո՞վ են արել, գուցե չհասկանալո՞վ, չեմ կարող ասել: Բայց երբ դու բարիկադներ ես կառուցում եւ մարդկանց տանում ես բախման, հասկանում ես, որ դա կարող է վատ ավարտ ունենալ: Այդքանից հետո շուռ գալ եւ ասել, որ պարտվող թեկնածուն հաղթել է եւ խաղաղ ցուցարարներ հանել փողոց... Ես բազմաթիվ կադրեր եմ տեսել, եւ շատ դժվար է այդ մարդկանց համարել խաղաղ ցուցարարներ: Այսօր փորձում են պատմություն վերաշարադրել, երեւույթի կոնտեքստն են փոխում, իրադարձությունների ընկալումն է փորձ արվում փոխել: Գիտեք, որ ՀԱԿ-ի կողմից պատրաստված տեսանյութեր կան, որտեղ տպավորությունն այնպիսին է, որ «սպիտակները» բարի, խաղաղ, առանց բռնության կոչերի, խաղաղ պայքարում էին, իսկ «չար սեւերը» եկան ու սկսեցին  իրեց դեմ պայքարել, ջարդել-փշրել. դա պատմության ակնհայտ խեղաթյուրում է:

- Բայց համացանցը դեռ ողողված է Լեւոն Տեր-Պետրոսյանի հայտնի ելույթի տեսագրությունով, որտեղ նա նշում է, որ Պաշտպանության երկու փոխնախարար իրենց հետ են, բանակցում են նախարարի հետ: Դա, ըստ էության, քաղաքական գործընթացների մեջ բանակի ներքաշում չէ՞:

- Այո, դա հայտնի ելույթ է, հայտնի է նաեւ այդ օրերին «Երկրապահի» առնվազն մտադրությունները: Նաեւ խոսակցություններ էին շրջանառվում, թե գեներալներից մեկն ասում էր, որ 4 զանգով ամբողջ բանակը շուռ կտանք. այդ ամենը չենք մոռացել, ընդամենը 10 տարի է անցել: Այդ ամենով հանդերձ, ներկայացնել դա որպես իշխանության կողմից բանակի ներքաշում, եթե իրադարձությունները գլխիվայր շուռ տալու փորձ  չէ, ապա ինչ է:

-  Վերադառնանք մեր օրերը: Պարոն Քոչարյանի օգտին հայտարարությունը ընկալվեց Ռուսաստանի ԱԳՆ նախարարի վերջին հայտնի հայտարարությունը՝ Հայաստանի 10-ամյա վաղեմության քրգործերի մասին: Պարոն Քոչարյանի օգտին ընկալվեց նաեւ Վլադիմիր Պուտինի շնորհավորանքը՝ երկրորդ նախագահի ծննդյան օրվա առթիվ: Խոսվեց, որ այդ կերպ Ռուսաստանի նախագահը ցանկանում է ընդգծել Ռոբերտ Քոչարյանի դերը: Ա՛յ, դուք ինչպե՞ս եք դա մեկնաբանում:

- Անկեղծ ասած, ես չէի ցանկանա մեկնաբանել դա, կխնդրեմ ձեզ, որ այդ փաստն ընկալվի այնպես, ինչպես որ ընկալվում է:

- Այդ դեպքում ենթահարց. պարոն Քոչարյանի պաշտոնանկությունից հետո Պուտինի կողմից շնորհավորանքներ եղե՞լ են:

- Կարող եմ ասել, որ նրանք տարբեր տարիներին կոնտակտներ են ունեցել, եւ դրա մասին տեղեկությունները հայտնվել են նաեւ մամուլում:

- Խնդրում եմ ասեք, թե ինչի համար Քոչարյանը տասը տարի լուռ էր, հիմա որոշեց քաղաքականություն գալ: Բացի այդ՝ ինքը ուզում է, որ մարտի 1-ի գործով մաքո՞ւր դուրս գա: (Ամալյա Պետրոսյան)

- Այստեղ կարեւոր մի հանգամանք կա. մենք, ցավոք, այնպես է ստացվել, որ ապրում ենք կարծրատիպերի մի շրջանում: Այսինքն` կան կարծարտիպեր որոշակի երեւույթների, իրադարձությունների վերաբերյալ, որոնք ձեւավորվել են անցած տարիներին: Հիմա այս հարցը այդ դասական շարքից է, թե իբր Քոչարյանն ուզում է մարտի 1-ից մաքուր դուրս գալ: Ասեմ, որ մարտի 1-ից մաքուր դուրս գալու խնդիր Ռոբերտ Քոչարյանը չունի: Նույնը վերաբերում է, այսպես կոչված, միլիարդների մասին խոսակցություններին, որոնք վերագրվում են Ռոբերտ Քոչարյանին: Բայց ինքներդ տեսաք, թե ինչպես ընդամենը մի քանի օրում պարզվեց, ընդ որում՝ կոնկրետ հիշատակվող ընկերությունները հանդես եկան հերքումներով, որ որեւէ առնչություն չունեն պարոն Քոչարյանի հետ: Սա պրիմիտիվ հեքիաթ էր, որը հորինվել էր տարիներ առաջ՝ նախագահ Քոչարյանին վարկաբեկելու համար: Եվ այս հարցը եւս համարում եմ կարծատիպի արդյունք, ցավում եմ, որ այն կա: Միաժամանակ վստահ եմ, որ շուտով բոլորը ճշգրիտ տեղեկատվությունը կստանան եւ կհամոզվեն, որ Քոչարյանը մարտի 1-ից մաքրվելու խնդիր չունի:

Աշխարհն այս Ազգային ժողովի ընդունած որոշումները չի ընդունում. Նիկողոսյան

«Թվերը պետք արտահայտվեն մեր սառնարաններում եւ ոչ թե՝ հեռուստացույցներով»

- Քոչարյանի օրոք տնտեսական ի՞նչ զարգացումներ են եղել: Ինչքա՞ն է աճել ՀՆԱ-ն, խոսքը վերաբերում է իրական ՀՆԱ-ին: (Տիգրան Մկրտումյան):

- Այդ մասին բազմիցս է խոսվել, նախագահ Քոչարյանը իր վերջին հարցազրույցում կրկին անդրադարձել է այդ հարցին: Հիմա չեմ ուզում փորձել՝ ներկայացնել տարբերությունները մաքուրի եւ ոչ մաքուր ՀՆԱ-ի միջեւ, քանի որ մասնագիտությամբ տնտեսագետ չեմ: Բայց այսօր թվերը չեն հարցը, այլ հետեւյալը. այդ տարիներին շատ լավ ցուցիչ կար, թե մարդիկ ոնց էին ապրում, ինչ ձեռքբերումներ են ունեցել: Խոսքը տասնհինգ տարի առաջվա մասին է, հիշեք մանր ու միջին բիզնեսի զարգացումը, շինարարական բումը, որն այդ տարիներին կար, արտաքին առեւտրի ծավալների մեծացումը: Եվ, ընդհանրապես, սոցիալական կյանքի բարելավումը, որն այդ տարիներին դիտվել է: Ի ուրախություն մեզ, այդ հիշողությունները ջնջել չի լինի, մենք լավ հիշում եք, թե որքան աշխատավարձ էինք ստանում, եւ որքան էր այդ աշխատավարձը հերիքում: Գիտենք ինչ, խնդիրներ չկային տնտեսության մեջ, եւ որքան հեշտ էր, օրինակ, մանր ու միջին բիզնեսի համար: Վերջին օրերին իմ հանդիպումների, խոսակցությունների, հարցազրույցների ընթացքում կարմիր թելով  անցնում է այն ժամանակվա եւ ներկայիս տնտեսական իրողությունների հարցը: Խոսքը նրա մասին չէ, որ մենք ուզում ենք իշխանություններին ուղղակի քննադատել: Էլի թող աշխատեն, բայց այդ ռազմավարությունը գոնե պետք է տեսանելի լինի, թվերը պետք արտահայտվեն, ինչպես հիմա ընդունված է ասել՝ մեր սառնարաններում եւ ոչ թե՝ հեռուստացույցներով ու ուղիղ եթերներով:

- Պարոն Սողոմոնյան, խնդրում ենք ներկայացնել, թե ինչ տեսակետ ունի պարոն Քոչարյանը վերջին շրջանում լայն տարածում ստացած տարատեսակ աղանդների եւ համասեռամոլների ակտիվության հետ կապված: (Ռիտտա Գաբրիելյան)

- Այսպես ասեմ. պարոն Քոչարյանի կառավարման տարիները, նրա ընտանիքի ապրելակերպը, արժեքները մեզ հուշում են իր ավանդական արժեքներին նվիրված լինելու մասին: Այսքանը կարող եմ ասել, կարծում եմ` սրանով ամեն ինչ ասված է:

 

«Հերթեր, իհարկե, չեն գոյանում, բայց...»

- Վերջին շրջանում ակտիվ խոսվում է, որ պարոն Քոչարյանի քաղաքականություն վերադառնալուց հետո նրա գրասենյակում այցելուների հերթեր են կուտակված եւ, որ համախոհների մի հոծ զանգված համախմբվել է նրա շուրջ: Այդպե՞ս է:

- Հերթեր, իհարկե, չեն գոյանում, որովհետեւ մենք կազմակերպված ենք աշխատում: Բայց իրականում անցած մի քանի օրերի ընթացքում, ինչ պարոն Քոչարյանը ազատության մեջ է, գրասենյակը միշտ լի է մարդկանցով: Եվ պետք է ասեմ, որ շատ ուրախ եմ, որ մի շարք քաղաքական, հասարական գործիչներ, շարքային քաղաքացիներ ցանկանում են անձամբ իրենց ներդրումն ունենալ եւ իրենց աջակցությունը հայտնել նախագահ Քոչարյանին, իր գործունեությանը: Միաժամանակ պետք է ասեմ, որ շատ ուրախ ենք, որ պարոն Քոչարյանի շուրջ են համախմբվում կրթված, բարձր մարդկային արժանիքներ ունեցող, ավանտյուրիզմից հեռու, Հայաստանի, Ղարաբաղի ապագայով մտահոգված անձինք են: Չէի ցանկանա առիթը բաց թողնել՝ երախտագիտությունս փոխանցելով այն անձանց, ովքեր ծանր պահին փորձեցին համախմբվել եւ իրենց աջակցությունը հայտնել երկրորդ նախագահին:

- Հնարավո՞ր է, որ առաջիկայում Քոչարյանի ղեկավարությամբ նոր կուսակցություն հիմնվի, թե՞ նրա շուրջ համախմբումը կլինի դաշինքի ձեւաչափով:

- Եթե մենք զուտ քաղաքագիտական տեսնակյունից դիտենք, ապա կուսակցությունը կամ այլ ձեւաչափով քաղաքական ուժը կամ քաղաքական պլատֆորմը  ձեւավորվում է համախոհներից, ովքեր մշակելով որոշակի ծրագիր, հանդես են գալիս միասնական: Ըստ էության, հիմա մենք համախոհների մի շրջանակ ենք ձեռք բերում, եւ ես կարծում եմ, որ մենք մի որոշ ժամանակ հետո, երբ, այսպես անվանենք, խորհրդատվությունների փուլը ավարտենք, մենք հանրությանը կներկայացնենք մեր թիմի եւ հետագա գործունեության վերաբերյալ: Բայց թե կոնկրետ ինչ ձեւաչափ կստանա, այսինքն` դա կուսակցությո՞ւն կլինի, շարժո՞ւմ, դաշի՞նք, թե` քաղաքական պլատֆորմ, որ պարզապես բաց ձեւաչափով կմասնակցի քաղաքական գործընթացներին, դեռեւս դժվարանում եմ ասել:

Փաշինյանը լկտիաբար ստում է. Էդուարդ Շարմազանով (Տեսանյութ)

- Խոսվում է, որ կուսակցությունների հետ եւս հանդիպումներ են տեղի ունենում: Այսինքն` դաշինքի տարբերակն առավե՞լ տեսանելի է:

- Այսպես ասեմ. կուսակցություն կամ ինչ-որ ձեւաչափ ստեղծելը ինքնանպատակ չի լինում, եւ նախագահ Քոչարյանն էլ երբեք դա ինքնանպատակ չի համարել: Եթե այդպես մտածեր, կարծում եմ, անցած տարիներին մի քաղաքական ուժ ձեւավորած կլիներ, որը կմասնակցեր քաղաքական գործընթացներին: Այնպես որ, մի փոքր ժամանակ տվեք, եւ մենք հանրությանը անպայման տեղյակ կպահենք, թե ինչ ձեւաչափով կներկայանանք:

-  ԲՀԿ առաջնորդ Գագիկ Ծառուկյանը հայտարարեց, որ պարոն Քոչարյանի հետ հանդիպում դեռեւս չի ունեցել:

- Այո, հաստատում եմ` որեւէ հանդիպում տեղի չի ունեցել:

- Կան նաեւ խոսակցություններ ՀՅԴ-ի հետ սերտ համագործակցության մասին:

- Բոլոր այս հանդիպումները, խորհրդատվությունները պետք է դիտվեն ընդհանուր կոնտեքստում: Այնպես որ, կրկին պետք է ժամանակ խնդրեմ, որպեսզի մենք այդ խորհրդատվությունների մասին որոշակի տեղեկատվություն տանք նաեւ հանրությանը:

- Բայց ժամանակ Դուք քիչ ունեք, որովհետեւ առաջիկայում մայրաքաղաքային ընտրություններն են, եւ արդեն քաղաքականության մեջ գտնվող պարոն Քոչարյանը պետք է գոնե դիրքորոշման մակարդակով մասնակցի ընտրություններին:

- Մենք, անպայման, մեր դիրքորոշումը կներկայացնենք շատ շուտով:

- Առջեւում նաեւ խորհրդարանական ընտրություններն են: Կհասցնե՞ք մասնակցել:

- Ես դեռ պատկերացում չունեմ, թե խորհրդարանական ընտրությունները երբ են լինելու, բայց կարող եմ միանշանակ ասել, որ մենք նպատակադրված ենք այդ ընտրություններին:

ԻԼՈՆԱ ԱԶԱՐՅԱՆ

 

 

КОМСОМОЛЬСКАЯ ПРАВДА