Հայաստանից իր հետ ինչ կտանի հայտնի «Հայկական վալսի» հեղինակը (տեսանյութ)

Երբ աշխարհահռչակ շանսոնյե Շառլ Ազնավուրի հրաժեշտի արարողության ժամանակ Ֆրանսիայի հանրապետական գվարդիայի երգչախմբի տենոր Ժերեմի Դելվերը երգեց «Հայկական վալս» ստեղծագործությունը, աշխարհի ծայրերում ու հատկապես Հայաստանում բնակվող հայերին միանգամայն հետաքրքրեց, թե ով է երգի հեղինակը: Սակայն, որքան արագ պարզվեց, որ երգի հեղինակը ֆրանսահայ հայտնի երաժիշտ, Bratsch խմբի հիմնադիրներից ԴԵՆ ՂԱՐԻԲՅԱՆՆ է, նույնքան արագ էլ` նա առավել հայտնի դարձավ Հայաստանում: Ավելին` պարզվեց, որ «Հայկական վալսը» Ղարիբյանը գրել է դեռեւս 1970-ական թվականներին:

ՀԱՅՏՆԻ Է ԴԱՐՁԵԼ «ՉԱՆԴՐԱՅԱՆ 2» ԼՈՒՍՆԱՅԻՆ ԾՐԱԳՐԻ ՄԵԿՆԱՐԿԻ ԺԱՄԿԵՏԸ

Օրերս Դեն Ղարիբյանը ոչ միայն ժամանել էր Հայաստան, այլ նաեւ մի քանի փոքրիկ համերգներով ներկայացավ իր արվեստի հայաստանյան երկրպագուներին: Համերգին ներկա էր նաեւ Հայաստանում Ֆրանսիայի դեսպան Ջոնաթան Լաքոտը: «Իրավունքը» Ղարիբյանին հանդիպեց Սիրահարների այգում` մենահամերգից հետո. «Շատ տպավորված եմ հայ հանդիսատեսից, նրանք մի փոքր հեռու էին, բայց նրանցից ջերմություն ու մեր արվեստի հանդեպ հետաքրքրություն զգացի»,- համերգից հետո իր տպավորություններով կիսվեց Ղարիբյանն ու շտապեց տեղեկացնել, որ իր հայաստանյան այցելությունը միայն այս համերգով չի սահմանափակվել. «Հայաստան ժամանելու հենց երեկոյան երեւանյան փաբերից մեկում համերգ ունեցանք, հետո` եղանք Իջեւանում, այնտեղ նվագեցինք, ապա` Արագած գնացինք, այնտեղ բարեկամ ունենք, մի քիչ պտտվեցինք, այնտեղ էլ նվագեցինք: Գեղարդի վանքում էլ եղանք: Պիտի ասեմ, որ մեր` Հայաստան կատարած կախարդական պահերից էր, երբ հենց Գեղարդի վանքում Սայաթ-Նովայի «Քանի վուր ջանիմ» երգեցի, չեք պատկերացնի` ինչ հրաշալի ու աստվածային զգացողություն ունեցանք: Իսկ հիմա արդեն Երեւանում ենք, այստեղ էլ մի բարեկամ ունեմ, իր տանը ճաշեցինք, նվագեցինք եւ այսօր Սիրահարների այգում երգեցինք, վաղն էլ` արդեն կլինենք Ֆրանսիայում, իսկ հաջորդ օրն էլ` մի ուրիշ տեղում կլինենք: Մեր կյանքն է այդպիսին»:

Ինչու ազերիները Նախիջեւանից սկսեցին գնդակոծել հայկական գյուղը

 

«ԵՐԱԺՇՏՈՒԹՅՈՒՆԸ ՀԱՅԱՍՏԱՆՈՒՄ ԱՎԵԼԻ Է ԽՏԱՆՈՒՄ ՎԱՌ ԳՈՒՅՆԵՐՈՎ»

Ֆրանսահայ երաժիշտն ասաց, որ հայաստանյան այս այցը 8-րդն էր. «Առաջին անգամ հայրենիք եկա 2006 թվականին ու գաղափար անգամ չունեի, թե ինձ ինչպես կընդունեն այստեղ, բայց այցից հետո հասկացա` երաժշտությունը Հայաստանում ավելի է խտանում վառ գույներով: Վերջին անգամ հայրենիքում համերգով հանդես էի եկել 2013-ին` Կասկադ համալիրում, իսկ այս անգամ եւս ջերմ ու լուսավոր երկիր բացահայտեցի ինձ համար: Գուցե, այստեղ մարդկանց կյանքն ուրախ է, ես չեմ կարող դա ասել, որովհետեւ այստեղ չեմ ապրում, բայց տեսնում եմ, որ կամաց-կամաց փոխվում է Հայաստանը,  ավտոմեքենաներն են շատացել ու փոխվել, նախկինում հիմնականում հին մեքենաներ էին վարում, հիմա ավելի նոր մեքենաներ են վարում: Շատ բան չգիտեմ հայաստանյան կյանքի մասին, բայց հուսով եմ, որ կամաց-կամաց ամեն ինչ կփոխվի դեպի լավը»:

Բնապահպանության նախարարն իրե՞ն է հայտնի կենդանու տեղը դրել, կառավարությա՞նը, թե` ժողովրդին

 

«ՊԱՇՏՈՒՄ ԵՄ ՀԱՅԿԱԿԱՆ ԺՈՂՈՎՐԴԱԿԱՆ ԵՐԱԺՇՏՈՒԹՅՈՒՆԸ»

Անդրադառնալով իր «Հայկական վալսի» կատարմանը` Շ. Ազնավուրի հրաժեշտի արարողության ժամանակ` Դ. Ղարիբյանն ասաց, որ իր համար անակնկալ է եղել. «Ես անտեղյակ եմ եղել, որ պետք է իմ երգը կատարեին, ինչ ասեմ, ուրախ եմ, որ Ժերեմին կատարեց այդ երգը, երբ իմացա` շատ հուզվեցի: Այսօր էլ այստեղ կատարեցի այդ երգը եւ ջերմությամբ ու ծափերով ընդունվեց հայ հանդիսատեսի կողմից, ինչն էլ ինձ հաճույք պատճառեց»,- ասաց երաժիշտն ու մտովի գնալով տարիների հեռուն` մտաբերեց. «Այդ երգը երբ գրեցի, մի ֆրանսուհու էի սիրահարված, մտածում էի, թե ինչպես տպավորություն թողնեմ նրա վրա: Երաժշտությունն արդեն ծնվել էր, ու անընդհատ երգում էի, բայց շատ էի ուզում, որ խոսքերն էլ հայերեն լինեին: Եվ այդպես ընկերս` Ժիրայր Փափազյանը օգնեց ու ֆրանսերենից հայերեն թարգմանեց խոսքերը: Այդ երգի մեջ այնքան հույզեր ու զգացմունքներ կան»,- պատմեց Ղարիբյանն ու հավելեց. «Անկեղծ ասած, չեմ սիրում ժամանակակից երաժշտությունը, պաշտում եմ հայկական ժողովրդականը, քամանչան, դուդուկն ու թառն եմ սիրում, որովհետեւ դրանք բոլորն էլ սովորական մեղեդիները գեղեցիկ են համադրում: Ի դեպ, մի հայաստանյան երաժիշտ կա` Միքայել Ոսկանյանը, շատ կուզենայի, որ միասին նվագեինք: Նա թառ է նվագում եւ շատ լավ երաժշտական ճաշակ ու լսողություն ունի: Մի անգամ նա եկել էր Փարիզ, ու աղջիկս իր հետ նվագել է: Հուսամ, հաջորդ անգամ, երբ գամ, կհաջողվի դա իրականություն դարձնել: Շատ կուզենամ մեծ համերգով հանդես գալ համերգասրահում, եթե հրավեր լինի, անպայման կընդունեմ»:

Աշխարհի ամենահայտնի տեսարժան վայրերի ցանկում ընդգրկվել են նաև Հանրապետության հրապարակը, «Երգող շատրվանները»

Սակայն մինչ հաջորդ այցը հայրենիք Ղարիբյանն անկեղծացավ, որ իր հետ Հայաստանից տանում է դրական հիշողություններ. «Այն ամենը, ինչ պիտի տանեմ ինձ հետ, իմ գլխում է, իմ հետքերում, իմ հիշողության մեջ: Ես լուսանկարվել ու լուսանկարել չեմ սիրում, ամեն ինչ իմ հիշողության մեջ եմ տեղավորում, որ միշտ ինձ հետ լինի: Հայաստանում ինձ ապշեցրել է գյուղացիների անկեղծ հյուրընկալությունը: Մի խոսքով, ինչպես միշտ, այս անգամ էլ Հայաստանից ինձ հետ դրական տպավորություններ, ջերմություն ու անպայման տնական դեղձի օղի եմ տանում»:

​​​​​​​«Քոչարյանի անունը լսելով՝ Փաշինյանը կորցնում է տրամաբանելու ունակությունը»

Զրուցեց ԼԻԼԻԹ ԵՂԻԱԶԱՐՅԱՆԸ