ՀԱՄԱՏԱՐԱԾ ԹԱԼԱՆ ԳԱԶԱԼՑԱԿԱՅԱՆՆԵՐՈՒՄ

Նիկոլի մեծ-մեծ խոստումներից մեկն էլ գազալցակայանները կարգի բերելն էր: Հիշո՞ւմ եք, հանուն իր այդ խոստման «կատարման» նա անգամ գնաց «դարակազմիկ» փոփոխության. օրենսդրորեն պարտադրեցին գազալցակայաններին՝ գազը վաճառել ոչ թե խորանարդ մետրային չափումով, այլ՝ կիլոգրամներով: Արդյունքում, տեղի ունեցավ գնի արհեստական բարձրացում: Նիկոլական վարչախումբը, չկարողանալով այդ ակնհայտ փաստը հերքել, այլ խոստում տվեց. պարզել իրենց բնութագրմամբ՝ «արհեստական թանկացումներ իրականացրած առանձին գազալցակայանները» եւ պատժել: Այդ ժամանակահատվածում առնվազն մեկ տասնյակի չափ կոնկրետ գազալցակայաններ մատնանշեցինք, նաեւ հստակ փաստեր, որ նրանց մոտ կան արհեստական թանկացումներ: Սակայն, բնականաբար, ո՛չ նրանց ուսումնասիրող եղավ եւ ո՛չ էլ, առավել եւս, պատժող: Կամաց-կամաց հանրությունը սկսեց հարմարվել այդ արհեստականորեն թանկացված գներին: Մինչեւ որ, վերջին շաբաթներին սկսեցին ի հայտ գալ հերթական արհեստական թանկացումների մասին նոր ահազանգերը: Չէ, այս անգամ թալանն ավելի «թաքնված» տեսք ունի: Գազալցակայաններում, ըստ ցուցիչների, նույն գնի դիմաց լիցքավորում են նույն չափով: Ամենատարածված տարբերակը. վճարում ես 3000 դրամ ու ստանում 10 կգ գազ: Բայց եթե, ասենք, երկու ամիս առաջ այդ 10 կգ գազով կարող էիր մեքենադ վարել, ասենք, 100 կմ, հիմա արդեն 90, անգամ՝ 80 կմ-ից այն սպառվում է: Նկատենք, բողոքները բազմաթիվ են, հանրապետության տարբեր վայրերից, ինչը ակնարկ է, որ խոսքը համատարած թալանի մասին է: Եվ ահա ստուգելու համար ավտոմեքենան լիցքավորեցինք նույն չափով: Այսինքն, դրա ամբողջական լիցքավորման համար նախկինում պահանջվում էր մոտ 15 կգ գազ՝ 4500 դրամով, եւ դրանով կարող էիր երթեւեկել 200-210 կմ ¥կախված գազի ծախսի այդ պահին մեքենայի տեխնիկական վիճակից¤: Այս անգամ էլ լիցքավորեցինք ճիշտ նույն չափով. 4500 դրամի: Բայց ահա՝ 200-210 կմ-ի փոխարեն հազիվ անցանք ուղիղ 176 կմ. գազը վերջացավ: Դիմեցինք կրկնակի փորձարկման. այս անգամ նույն չափով լիցքավորում կատարեցինք այլ լցակայանից: Արդյունքը մի փոքր փոխվեց. 181 կմ, այսինքն՝ խոսքն առնվազն 10 տոկոսանոց խաբեության մասին է, որը ֆինանսական արտահայտությամբ կազմում է մոտ 450 դրամ: Չէ, այս անգամ լավատես չենք, անգամ հույս չունենք, որ պատկան մարմինները կփորձեն արդարանալ: Ընդամենը ֆիքսում ենք՝ տեղի է ունենում գազի համատարած թալան: Սա է նիկոլական խոստումների ռեալ արդյունքը:

Ս. ԱԲՐԱՄՅԱՆ

Այս թեմայով Ունի Հայաստանը գազի այլընտարանք. Մեկնաբանում է տնտեսագետը Կառուցապատողի «թույլտվությունը» կարող է վերանալ․ ՀԾԿՀ-ն փոխում է գազին միանալու կանոնները Մահացած զինծառայողի ընտանիքին արդարություն է պետք, ոչ թե արագ հայտնաբերված մեղավոր կամ քավության նոխազ․ Բացառիկ զրույց հայտնի իրավապաշտպանի հետ Ռուսական էներգոռեսուրսները Հայաստանը չի կարող ոչնչով փոխարինել. ռուսաստանցի փորձագետ Հայաստանն առաջիկա օրերին կվերսկսի հեղուկ գազի ներմուծումը Իրանից