Հունաստանը եւ Թուրքիան հայտարարել են Միջերկրական ծովի արեւելքում իրենց պահանջները պաշտպանելու մտադրության մասին

Հունաստանը եւ Թուրքիան լարվածության աճի պայմաններում հայտարարել են Միջերկրական ծովի արեւելքում իրենց պահանջները պաշտպանելու մտադրության մասին, հայտնում է AP-ը:

Հունաստանը հայտարարել է իր արեւմտյան ափի երկայնքով տարածքային ջրերն ընդլայնելու պլանների մասին եւ երկու օր զորավարժություններ է անցկացրել այն ջրերում, որտեղ Թուրքիան մարտահրավեր է նետում Աթենքի հայտարարած ծովային իրավասությանը:

«Թուրքիան հետ կվերցնի այն, ինչ իրեն է պատկանում Միջերկրական, Էգեյան եւ Սեւ ծովերում»,- ասել է Թուրքիայի նախագահ Ռեջեփ Թայիփ Էրդողանը: «Մենք երբեք փոխզիջման չենք գնա այն բանի շուրջ, ինչ մեզ է պատկանում: Մենք վճռական ենք անել անհրաժեշտ ամեն ինչ՝ քաղաքական, տնտեսական եւ ռազմական առումով»:

Էրդողանի կոշտ խոսքերը հնչել են, չնայած Գերմանիայի միջնորդական ջանքերին, որով արտգործնախարարը մեկ օր առաջ Աթենքի եւ Անկարայի միջեւ մաքոքային դիվանագիտություն էր վարել՝ փորձելով լիցքաթափել իրավիճակը:

Մինչդեռ Աթենքում վարչապետ Կիրիակոս Միցոտակիսն ասել է, որ Հունաստանը նախատեսում է իրականացնել արեւմտյան ափի երկայնքով տարածքային ջրերն ընդլայնելու իր օրինական իրավունքը՝ 6-ից հասցնելով մինչեւ 12 ծովային մղոնի:

Հունական ափամերձ հատվածի երկայնքով նախատեսվող ընդլայնումը ուղղակիորեն չի ազդի հույն-թուրքական վեճի կենտրոնում գտնվող տարածքի վրա: Բայց վարչապետը խորհրդարանին ասել է, որ Հունաստանը հրաժարվում է տասնամյակների «պասիվ» արտաքին քաղաքականությունից:

Միցոտակիսը Թուրքիայի գործողությունները որակել է որպես «ապօրինի եւ սադրիչ»՝ հավելելով, որ Աթենքը պատրաստ է բանակցություններ սկսել Թուրքիայի հետ՝ որպես գերմանական միջնորդության նախաձեռնության մաս, եթե դադարեցվեն թուրքական հետախուզական աշխատանքները: «Մեր դիրքորոշումը շատ հստակ է եւ կարող է ձեւակերպվել հետեւյալ խոսքերով՝ Երբ սադրանքները դադարեն, հնարավոր կլինի բանակցություններ սկսել»,- ասել է նա օրենսդիրներին:

Գերմանիայի արտաքին գործերի նախարար Խայկո Մաասը նախօրեին այցելել էր Հունաստան եւ Թուրքիա՝ երկխոսության եւ լարվածությունը մեղմելու կոչ անելու, նախազգուշացնելով, որ «ցանկացած կայծ, նույնիսկ ամենափոքրը, կարող է աղետի հանգեցնել»:

Մաասի հետ բանակցություններից հետո Հունաստանի եւ Թուրքիայի արտգործնախարարները երկխոսության պատրաստակամություն են հայտնել, սակայն միմյանց մեղադրել են առճակատման մեջ:

Այս թեմայով Էրդողանն ու Ալիևը հայտարարել են Թուրքիայի և Ադրբեջանի «անսասան դաշինքի» մասին ԱԲ-ն գուշակ չէ. Տեղեկատվական անվտանգության փորձագետը զգուշացնում է Ինչո՞ւ պետք է ժողովուրդը կրկին վստահի ձեզ, ինչի՞ համար եք պատասխանատվություն ստանձնել 11։11. Ի՞նչ է ուզում ճակատագիրը մեզ ասել, կրկնվող թվերի օրը Ալիևը հայտարարել է, որ հայկական կողմը նախկինում Ադրբեջանին «սպառնացել է» նոր պատերազմով՝ խոստանալով վերցնել նոր տարածքներ