ԿԱՐԵՆ ԱՂԱՄԱԼՅԱՆ. ՊԱՅՔԱՐԵԼՈՒ ԵՆՔ ՄԵԴԱԼՆԵՐԻ ՀԱՄԱՐ

ԿԱՐԵՆ ԱՂԱՄԱԼՅԱՆ. ՊԱՅՔԱՐԵԼՈՒ ԵՆՔ ՄԵԴԱԼՆԵՐԻ ՀԱՄԱՐ

Բռնցքամարտի Հայաստանի հավաքականը հոկտեմբերի 2-ին մարզիչներ Կարեն Աղամալյանի եւ Մեխակ Ղազարյանի գլխավորությամբ կմեկնի Քաթարի մայրաքաղաք Դոհա` մասնակցելու հոկտեմբերի 5-ից 15-ը կայանալիք Աշխարհի առաջնությանը, որին մասնակցելու իրավունք են ստացել Բաքվի Եվրոպական խաղերի մեդալակիրներն ու Բուլղարիայում տեղի ունեցած Եվրոպայի առաջնությունում 1-6-րդ տեղերը գրաված մարզիկները:

Դոհայում Հայաստանի մարզական պատիվը կպաշտպանեն 52 կգ քաշային Կորյուն Սողոմոնյանը, 2015 թվականի Եվրոպայի բրոնզե մեդալակիր, 56 կգ քաշային Արամ Ավագյանը եւ 64 կգ քաշային Հովհաննես Բաչկովը: Աշխարհի առաջնությանը 40 մեդալ եւ 23 օլիմպիական ուղեգիր կխաղարկվի 10 քաշային կարգերում, առաջնությանը մասնակցելու են 40 երկրի 260 բռնցքամարտիկներ, ընդ որում` յուրաքանչյուր քաշային կարգում մեդալի համար կպայքարեն 24-27 բռնցքամարտիկներ: Այնպես որ, մրցակցությունը բավականին բարդ է լինելու: Հավելենք, որ Աշխարհի առաջնությունում 2 օլիմպիական ուղեգրեր են խաղարկվում 52 կգ քաշային կարգում, եւս 3-ական ուղեգրեր կվիճարկեն 56 եւ 64 կգ քաշային մարզիկները: Հայաստանի հավաքականի մարզավիճակի մասին «Իրավունքը» տեղեկացավ բռնցքամարտի Հայաստանի երիտասարդական հավաքականի գլխավոր մարզիչ Կարեն Աղամալյանից. «Տղաների մարզավիճակը լավ է, նորմալ: Ցավոք, մրցաշարին մասնակցում են միայն երեք բռնցքամարտիկներ, ովքեր վարկանիշ էին ձեռք բերել Եվրոպայի առաջնությունից: Դժվար կլինի, բայց կպայքարենք ամեն ինչի համար: Որովհետեւ օլիմպիական խաղերի ուղեգիր նվաճելու համար հարկավոր է առաջին կամ երկրորդ տեղի արդյունք գրանցել: Այսքանը կարող եմ ասել, մնացածը ցույց կտա ընթացքը»: Մրցաշարից ունեցած սպասելիքների մասին Կարեն Աղամալյանն ասաց. «Սպասելիքներ կան բոլորից, որեւէ մեկին առանձնացնել չեմ ուզում, ակնկալիքներ կան, պայքարելու ենք մեդալների համար»:
Հավելենք, որ հոկտեմբերի 5-ին տեղի է ունենալու առաջնության բացման հանդիսավոր արարողությունը: Հոկտեմբերի 7-10-ը կայանալու են նախնական փուլերի մենամարտերը, իսկ հոկտեմբերի 11-ին եւ 12-ին տեղի կունենան կիսաեզրափակչի մենամարտերը: Հոկտեմբերի 13-ին բռնցքամարտիկները կհանգստանան, իսկ հոկտեմբերի 14-ին եւ 15-ին հայտնի կդառնան մրցաշարի հաղթողներն ու բրոնզե մեդալակիրները:

ՔՐԻՍՏԻՆԵ ՊԵՏՐՈՍՅԱՆ