ՐԱՖՖԻ ՀՈՎՀԱՆՆԻՍՅԱՆՆ ԻՐ «ՏԱՆԸ»` ՓՈՔՐԱՄԱՍՆՈՒԹՅԱՆ ՆԵՐԿԱՅԱՑՈՒՑԻՉ

ՐԱՖՖԻ ՀՈՎՀԱՆՆԻՍՅԱՆՆ  ԻՐ «ՏԱՆԸ»`

ՓՈՔՐԱՄԱՍՆՈՒԹՅԱՆ ՆԵՐԿԱՅԱՑՈՒՑԻ՞Չ

«Իրավունքը» երեկ տեղեկացրել էր Ազատության հրապարակում «Չեք անցկացնի» քաղաքացիական նախաձեռնության հանրահավաքի մասին: Գրել էինք, որ հանրահավաքին խոսքով հանդես եկավ նաեւ «Ժառանգություն» կուսակցության փոխնախագահ Արմեն Մարտիրոսյանը, բացի իշխանություններին քննադատելուց, քննադատական խոսք ուղղեց ընդդիմությանը` կոչ անելով միավորվել եւ միասնական լինել:

«Իրավունք»-ը պրն Մարտիրոսյանից պարզեց` «Ոչ»-ի մյուս հանրահավաքներում հնարավո՞ր է հանդես գան նաեւ ՀԱԿ-ի եւ «Ժառանգության» լիդերները`Րաֆֆի Հովհաննիսյանն ու Լեւոն Տեր-Պետրոսյանը: «Այս պահին նման հարց քննարկված չէ, բայց Րաֆֆի Հովհաննիսյանը Գյումրիում ելույթ ունեցավ»,-ասաց  փոխնախագահը:

Եթե «Ժառանգության» ներսում միասնականություն չկա, ի՞նչ տրամաբանությամբ է Արմեն Մարտիրոսյանը այլոց միասնական լինելու հորդոր հղում: ««Ժառանգությունը» եթե կտրված լինեն հայկական իրականությունից, ձեր հարցը տեղին կլիներ: Բայց մեր կուսակցությունը հայկական իրականության շրջանակներում  է գործում: Այն խնդիրները, որոնց մասին խոսեցի (նկատի ունի ընդդիմության միասնական չլինելուն-խմբ.) վերաբերում է  նաեւ «Ժառանգությունը»: Եթե  կարծում  եք, որ իշխանությունը պետք է  ձեռքերը ծալած նստի ու սպասի, թե ինչպես են միավորվում, սխալվում եք: Դրա համար տարբեր քայլեր են իրականացնել` սկսած կուսակցությունների պառակտումից  մինչեւ հանրային դեմքերին իշխանական դաշտ ներգրավվելով: Ներգրավվումը տարբեր եղանակներով է լինում` նյութական աջակցություն,  պաշտոններ, հետազոտական կենտրոններ բացում, քաղաքացիական շարժումների ստեղծում: Այս ամենը հաշվի առնելով` «Ժառանգությունը» տրոհման քաղաքականությունից չէր կարող խոսել»,- պատասխանեց Մարտիրոսյանը:

Հետաքրքիր է, օրինակ, ի՞նչ կարող էր առաջարկել իշխանությանը «Ժառանգություն»   խմբակցության նախկին ղեկավար Ռուբեն Հակոբյանին: Կուսակցության փոխնախագահը հիշեցրեց «Ժառանգության» մամլո խոսնակը հայտարարություն արել է: «Ավելացնելու ոչինչ  չունեմ»,- ասասց քաղաքական գործիչը:

Կուսակցությունից արտահոսքը կարող է պայմանավորված լինել ներքին այն բռնատիրությամբ, որի մասին «Իրավունք»-ի հետ զրույցում հայտարարել էր  նախկին «Ժառանգական» Դանիել Իոաննիսյանը:  «Ես Դանիել Իոաննիսյանի շատ ասածների թե՛ նախկինում, թե՛ հիմա համաձայնում եմ, բայց այդ ասածը միանշանակ ճիշտ չէ: Կուսակցությունում բազմաթիվ են եղել դեպքեր, երբ Րաֆֆի Հովհաննիսյանը եղել է փոքրամասնության ներկայացուցիչ»,- եզրափակեց  «Ժառանգության» փոխնախագահը:

ՍՈՆԱ ԴԱՎԹՅԱՆ