ՄԵԿՆԱՐԿՈՒՄ Է ՎԵՐԱԴԱՐՁԻ ԴԱՍԱԿԱՆ ԵՐԱԺՇՏՈՒԹՅԱՆ 8-ՐԴ ՓԱՌԱՏՈՆԸ

Արխիվ 12-16 5 Հոկտեմբեր, 2015 12:35

«Արվեստների պատկերասրահ» Մշակութային հիմնադրամը` Հայաստանի Հանրապետության նախագահի տիկին Ռիտա Սարգսյանի բարձր հովանու ներքո հոկտեմբերի 19-ից նոյեմբերի 7-ը ներկայացնում է Վերադարձի դասական երաժշտության 8-րդ փառատոնը` նվիրված Հայոց ցեղասպանության 100-րդ տարելիցին:

Փառատնը կոչ է, արդի հայաստանյան հասարակությունից եւ իրականությունից բխող ազդակ, որն ուղղված է աշխարհասփյուռ բոլոր հայերին: Մշակութային խոշոր միջոցառման իրականացմանը զուգընթաց, այն փորձ է համայն աշխարհի հայության ուշադրությունը հրավիրել հայրենադարձության խնդրին, սեփական հողում արարելու եւ ստեղծելու սերունդների երազանքի իրականացմանը:

Գեղարվեստական առումով փառատոնի անցկացումը նպատակ ունի`

Մեկ մասշտաբային ծրագրի շրջագծում հայաստանյան ունկնդրին ներկայացնել բարձրակարգ երաժիշտների կատարողական արվեստի վերջին ձեռքբերումները,ն ծրագրի համերգներում ընդգրկված հայ, ռուս, արևմտաեվրոպական կոմպոզիտորների` տարբեր ժամանաշրջանների եւ ուղղությունների նորովի կատարում,ժամանակակից հայ կոմպոզիտորների ստեղծագործությունների կատարման միջոցով` խրախուսել եւ օժանդակել նոր ստեղծագործական մտահղացումների կայացմանը, մասնակցել ժամանակակից ստեղծագործությունների հանդեպ հանրային պահանջի ձևավորման գործընթացին, ինչպես նաեւ`ծրագրի իրականացման միջոցով եւս մեկ անգամ բարձրաձայնել Հայաստանում դասական արվեստի եւ մշակույթի զարգացման խնդիրները, ապահովել օտարազգի արվեստասերների եւ արվեստագետների հարաճուն մասնակցությունը Հայաստանում կազմակերպվող մշակութային իրադարձություններին:

Այս տարի փառատոնային ծրագրում ընդգրկված են տաղանդաշատ հայ եւ օտարազգի երաժիշտներ Հայաստանից, Ֆրանսիայից, Բելգիայից, Ճապոնիայից, Մեծ Բրիտանիայից:

Փառատոնի 5 համերգների ընթացքում հայ հանդիսատեսին կներկայացվեն դասական երաժշտության տարբեր ուղղություններ եւ ժամանակաշրջաններ ընդգրկող ստեղծագործություններ:

Փառատոնի հանդիսավոր բացումը հոկտեմբերի հոկտեմբերի 19-ին`Արամ Խաչատրյան համերգասրահում, որի ընթացքում առաջին անգամ կհնչի Ստեփան Լուսիկյանի «Դեպի Գողգոթա» դաշնամուրային կոնցերտը` ՀՀ Ժողովրդական արտիստ Սվետլանա Նավասարդյանի մենակատարմամբ: Նույն համերգին հանդիսատեսը նաեւ հնարավորություն կունենա ունկնդրելու երկար տարիներ երեւանյան համերգասրահներում չկատարված Էդգար Հովհաննիսյանի «Կոնցերտ Բարոկոն»,մենակատար` Անի Բատիկյան, Մեծ Բրիտանիա, Ալֆրեդ Շնիտկեի թիվ 1 Կոնչերտո Գրոսսոն ,մենակատարներ` Անի Բատիկյան, Աստղիկ Վարդանյան, Տիգրան Մանսուրյանի Ֆանտազիա դաշնամուրի եւ լարայինների համար ստեղծագործությունը ,Սվետլանա Նավասարդյան: Փառատոնի հանդիսավոր բացման համերգի նվագախումբը Հայաստանի պետական կամերային նվագախումբն է`գեղարվեստական ղեկավար եւ գլխավոր դիրիժոր Վահան Մարտիրոսյանը հանդես կգա նաեւ որպես դաշնակահար` Յ. Ս. Բախի ֆա մինոր դաշնամուրային կոնցերտի կատարմամբ:

ԶՎԱՐԹ ԽԱՉԱՏՐՅԱՆ