Զարմացած

Բոլորը հասցրել էին իրենց կարծիքը հայտնել նոր Սահմանադրության մասին, մնում էր ԱՐԹՈՒՐ ՍԱՔՈՒՆՑԸ: Սույն վարկաբեկված կերպարանքը` ներկայացնելով իր արտերկրյա տերերին մի հսկայական «լավաշ» զեկույց Սահմանադրության մասին, չբավարարվեց դրանով ու որոշեց հրապարակավ մի բան էլ անձնական կարծիք հայտնել. «Այսինքն` հիմա դուրս է գալիս, որ իրենք նույնիսկ ամենալավ փոփոխություններն առաջարկեն, մենք «ոչ» ենք ասելու: Այո: Պետք է ասենք` ոչ, որովհետեւ իրենք այսօրվա գործող Սահմանադրության հիմնարար սկզբունքները ոտնահարել են, եւ չենք կարող իրենց վստահել»: Դե ինչ ասես, եթե Սաքունցը դեմ է այդ նախագծին, ապա անգամ նախագծից ոչ մի տող չկարդացած լինելու դեպքում արժե կողմ քվեարկել: Սաքունց լինեմ, թե սուտ եմ ասում:

Ի դեպ, «Ոչ»-ի ճակատի բազում ներկայացուցիչներ պարզվում է, որ ոչ միայն շպիոնօնիկ են, այլեւ դա չեն էլ թաքցնում: Այսպես, «Չեք անցկացնի» նախաձեռնության անդամ ԴԱՎԻԹ ՀՈՎՀԱՆՆԻՍՅԱՆԸ պարզվում է ամբողջ հույսը դրել է փողոցային պայքարի վրա. «Մեզ մնում է միայն մի կողմ շրջել այս էջը եւ անցնել փողոցային պայքարի: Մենք 30-ից ավելի նախաձեռնությունների ու կազմակերպությունների հետ ենք համագործակցում, կհամագործակցենք բոլոր այն ուժերի հետ, ովքեր կհայտարարեն, որ դեմ են սահմանադրական փոփոխություններին եւ այս ռեժիմին: Սա պայքար է Հայաստանի քաղաքացու եւ այն վարչակազմի, ռեժիմի միջեւ, որը փորձում է քաղաքացուց խլած իշխանությունը պահել, վերարտադրվել եւ հավերժ մնալ իշխանության: Բնականաբար, քաղաքացին իր խոսքը պիտի ասի փողոցում, արտահայտվելու որեւիցե այլ տեղ չունի քաղաքացին, լրատվամիջոցները վերահսկվում են իշխանության կողմից, իսկ ԱԺ-ն գերեվարված է այդ վարչախմբի կողմից»: Եվ պարզվում է` ով է հիմնականում այդ աշխուժակների (ակտիվիստների) եւ աշխուժաչկեքի (ակտիվիստուհիների) հիմնական հույսը` օտարերկրյա դեսպանները. «Անընդհատ կապի մեջ ենք նրանց հետ, ե՛ւ դեսպանների հետ է հանդիպում եղել, ե՛ւ դեսպանատների ներկայացուցիչների հետ, նամակագրություն էլ է եղել, բոլորի հետ է համագործակցությունը»:  
Ի դեպ, գենդերի ու ֆեմինիզմի գծով աշխուժակություն անող ՀԿ-ների դարդը քիչ էր, որ «Ընտանեկան բռնության մասին» օրենք անցկացնելու գծով ո՛չ լոբբինգն է ստացվում, ո՛չ ակցիաները, ո՛չ էլ լրատվամիջոցներն իրենց շան տեղ են դնում, հիմա էլ զարմանալիորեն մի դաժան հարված նրանց հասցրեց ՀՀԿ խմբակցության անդամ ԿԱՐԻՆԵ ԱՃԵՄՅԱՆԸ. «Ես սա համարում եմ շատ նուրբ թեմա, մամուլում շատ կարդացել եմ, թե ինչպես է մի փոքր վեճի պատճառով կինը երեխաների հետ հայտնվել կացարանում: Կացարանում իր իրավունքներն այնպես են իրազեկել, որ երկար ժամանակ ընտանիքից դուրս է մնացել: Ես ինքս կին եմ եւ շատ կարեւորում եմ ընտանիքի պահպանությունը»: Չէ, տիկին Աճեմյանը հեչ չի խղճում սրանց, ճակատներին պարզապես մեխում է` դուք ընտանիք քանդող եք եւ ուրիշ ոչինչ:
Իսկ ամենադժբախտ քաղաքական գործիչը շարունակում է մնալ ԼՅՈՎԻԿ ԶՈՒՐԱԲՅԱՆԸ: Զարմանալիորեն, նա ոչ մի կերպ չի կարողանում ձերբազատվել անհաջողակի կերպարից: Երեկ ուշագրավ դեպք տեղի ունեցավ ԱԺ նիստերի դահլիճից դուրս: Խորհրդարանական ելույթներից հետո, երբ աշխատանքային ժամն ավարտվեց, ԱԺ միջանցքում ՀԱԿ խմբակցության ղեկավար Լեւոն Զուրաբյանին ՀՀԿ-ականները ամոթանք էին տալիս սահմանադրական փոփոխությունների «Ոչ»-ի ճամբարի հավաքների ժամանակ իր գործընկերների հասցեին ավել-պակաս վայրահաչելու համար: Ավելին` վերջինիս հորդորեցին տղամարդուն վայել պահել իրեն: Զարմանալիորեն, պարոն Զուրաբյանն էլ անկեղծացավ. «Բոլորը ինձ տղամարդկություն են սովորեցնում...»: Ու դասը չսերտած աշակերտի պես գլխիկոր հեռացավ խորհրդարանից:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ