ՌՈՒԲԼՈՎ ԳԱԶԻ ՀԱՄԱՐ ՎՃԱՐԵԼԸ ԲԽՈՒՄ Է ՄԵՐ ԱԶԳԱՅԻՆ ՊԵՏԱԿԱՆ ՇԱՀԵՐԻՑ

ՌՈՒԲԼՈՎ ԳԱԶԻ ՀԱՄԱՐ ՎՃԱՐԵԼԸ ԲԽՈՒՄ Է ՄԵՐ ԱԶԳԱՅԻՆ ՊԵՏԱԿԱՆ ՇԱՀԵՐԻՑ

Թեպետ կառավարության Կոռուպցիայի դեմ պայքարի խորհրդի ընդամենը մեկ նիստ է տեղի ունեցել, սակայն ԱԺ ՀԱԿ խմբակցության ղեկավար Լեւոն Զուրաբյանն այս շաբաթ ԱԺ-ում` կառավարության հետ հարց ու պատասխանի ժամանակ, սկսեց քննադատությունների մի երկար շարան այս խորհրդի գործունեության մասին, որին ժամանակին չցանկացան մասնակցել ՀԱԿ-իստները: Այս մասին «Իրավունքը» զրուցեց ԱԺ ԲՀԿ խմբակցության պատգամավոր ՄԻՔԱՅԵԼ ՄԵԼՔՈՒՄՅԱՆԻ հետ` մասնավորապես պարզելով, թե որքանո՞վ է արդյունավետ այս խորհրդի գործունեությունը, որին մասնակցում է ընդդիմությունից միայն ԲՀԿ-ն.

-Արդյունավետությունը կերեւա աշխատանքների ընթացքում, կարծում եմ` այստեղ երկու տիպի հարց կա. մեկը գլոբալ ռազմավարական գործունությունն է, ըստ ռիսկային ոլորտների` տեղական ինքնակառավարում, գիտություն, կրթություն, վարչական համակարգ, ներքին իրավական համակարգ եւ այլն: Եվ կան այնպիսի խնդիրներ, որոնք հասարակական հնչեղություն ունեն, ինչը բարձրաձայնելը կարող է դրական ազդեցություն ունենալ: Պետք է սա էլ արվի, բայց այդ ռազմավարության մեջ չկորի հատայինի անելու էֆեկտը: Այնպես որ, ես կողմնակից եմ, որ կամք ցուցաբերվի եւ անպայման լուծենք հնչեղություն ունեցող խնդիրները: Իսկ դրա մասին ես հետո կասեմ, թե որոնք են այդ ոլորտները:
– Ամեն դեպքում, չմասնակցելով Կոռուպցիայի դեմ պայքարի գործունեությանը` քննադատելը որքանո՞վ է ընդունելի Ձեզ համար:
– Այդ մարդիկ իրենք են որոշում իրենց մոտեցումները, եւ ես այստեղ խնդիր չեմ տեսնում: Մենք որոշել ենք, որ պետք է մասնակցենք ու մասնակցում ենք:
– Անդրադառնանք նաեւ, ԱԺ-ում ՀՀ վարչապետի` լրագրողների հետ ճեպազրույցին, որտեղ նա նշեց, թե կողմնակից է, որ, օրինակ, գազը սպառողները վճարեն ռուբլով: Հետաքրքիր է Ձեր տեսակետն այս մասին:
– Դրա մասին բազմիցս ասել եմ եւ հանդես եմ եկել հրապարակմամբ` նաեւ ռուսական, լատվիական լրատվամիջոցներում, խոսել եմ բարձր գիտական կոչում ունեցող մասնագետների հետ: Միանշանակ, սա բխում է մեր ազգային պետական շահերից, եւ ոչ միայն գազը, այլեւ նավթամթերքը պետք է վճարել ռուբլով: Մոտավորապես 700 միլիոն դոլարի կարգի գումար է անում տարեկան, եւ սա միանշանակ ճիշտ է: Իսկ թե երբ կլուծվի այս խնդիրը, ըստ իս, Ռուսաստանի համար մեծ բան չէ այդ ծավալը: Այնպես որ, կարծում եմ` քաղաքական լուծում կտան եւ կհամաձայնեն, որովհետեւ դրանով Հայաստան տրանսֆերները կգան ռուբլով, եւ այդ ամբողջ կուրսի փոփոխությունների, կորուստների ֆոնին մենք չենք կորցնի ոչինչ:

ՀՐԱՆՏ ՍԱՐԱՖՅԱՆ