ԹՇՆԱՄԻՆ ԿՐԿԻՆ ՀԻԱՍԹԱՓՎԵՑ

ԹՇՆԱՄԻՆ ԿՐԿԻՆ ՀԻԱՍԹԱՓՎԵՑ

Հոկտեմբերի 10-ի  գիշերը սահմանային  դիվերսիոն գործողությունների վերաբերյալ փորձեցինք մանրամասներ պարզել Լեռնային Ղարաբաղի Հանրապետության Ազգային ժողովի պատգամավոր, պաշտպանության, անվտանգության եւ օրինապահպանության հանձնաժողովի փոխնախագահ ԼԵՌՆԻԿ ՀՈՎՀԱՆՆԻՍՅԱՆԻՑ:

Քսան տարի շարունակ այս իրավիճակն է՝ ոչ պատերազմ է, ոչ խաղաղություն: Բայց ինչ խոսք՝ հատկապես վերջին ժամանակահատվածում սահմանային լարվածությունն աննկարագրելի է, տարբեր տեղերում հակառակորդի կողմից կիրառվում է ավելի բարձր տրամաչափի հրետանի, չհաշված դիվերսիոն-հետախուզական բազմաթիվ փորձերը: Իհարկե ցանկացած դիվերսիոն փորձ, ինչպես նաեւ վերջինը` արժանի հակահարված է ստանում ԼՂՀ ՊԲ-ի  կողմից: Զերծ մնալով ադրբեջանական լրատվամիջոցների ապատեղեկություններից, ցանկանում եմ նշել, լրատվությունը, որը տալիս է ՊԲ-ն, լիովին հավաստի է:
Վերջին դիվերսիայի հետ կապված` որոշակի մանրամասներ կան, որոնք պարունակում են գաղտնիություն, որը ենթակա չէ հրապարակման: Բայց, կրկնում եմ, թշնամին կրկին հիասթափություն ապրեց, քանի որ հերթական դիվերսիոն փորձը հետ է շպրտվել եւ հակառակորդն ստացել է բազմաթիվ զոհեր. մեր կողմից, փառք Աստծո, զոհեր չկան: Կարող եմ միայն ասել, որ վերոնշյալ գործողությունից հակառակորդը տարբեր տրամաչափի զինատեսակներից շփման գծի ողջ երկարությամբ հրադադարի պահպանման ռեժիմը խախտել է շուրջ 150 անգամ: ՊԲ առաջապահ ստորաբաժանումների կողմից ձեռնարկված պատասխան գործողություններից հետո շփման գծի ողջ երկայնքով ադրբեջանական բանակի ակտիվությունը ճնշվել է:
- Ստացվում է, որ հակառակորդը չի հանգստանում եւ շարունակում է սահմանը լարված պահել:
- Դա Ադրբեջանի վերջին երկու տարվա շանտաժի քաղաքականությունն է` փորձելով շփման գծում լարել իրավիճակը: Իսկ շանտաժի քաղաքականությունն ուղղված է հակամարտության կարգավորմամբ զբաղվող Մինսկի խմբի երկրներին եւ առհասարակ, միջազգային հանրությանը: Դիվերսիոն փորձերով, կրակահերթ արձակելով` Ալիեւը փորձում է իր իսկ ժողովրդի ուշադրությունը շեղել: Ինչպես գիտեք՝ նավթի գների անկման հետ կապված` Ադրբեջանում մեծ դժգոհություններ կան: Այսինքն՝ իրենց սոցիալ-տնտեսական վիճակից, ինչպես նաեւ մարդու իրավունքների հետ կապված` իրենց երկրում ընթացող աղմկահարույց դատավարություններից հանրությանը շեղելու համար, միեւնույն ժամանակ շանտաժի ենթարկելով միջազգային հանրությանը, Ադրբեջանը դիմում է նման քայլերի: Որպեսզի իրական բանակցություններից շեղում կատարվի:

«ՈՉԻՆՉ ՈՒ ՈՉ ՄԻ ԶԵՆՔ ՉԻ ԿԱՐՈՂ ՀԱՂԹԵԼ ՄԵՐ ԲԱՆԱԿԻՆ»

-Լավ, ըստ Ձեզ, ե՞րբ այդ լարվածությունը կհանդարտվի:
- Ցավոք բաժին են հասել այնպիսի հարեւաններ, ինչպիսիք են՝ Թուրքիան եւ Ադրբեջանը, որոնք պատրաստ են ցանկացած նենգ եւ ստոր քայլի` ցանկացած պահի եւ ցանկացած հանգամանքում: Այնպես որ՝ մենք միշտ պետք է պատրաստ լինենք հակառակորդի սադրանքներին եւ զգոն լինենք, որովհետեւ թշնամին նույն թշնամին է, ձեռագիրը նույնը` կապ չունի 20-րդ դարում է եղել, թե 21-րդ դարում: Մենք ինչպես այսօր, այնպես էլ ամեն վայրկյան պատրաստ ենք արժանի հակահարված հասցնել մեր դեմ ոտնձգություն կատարողներին: Թշնամին շատ լավ գիտակցում է, որ ոչինչ ու ոչ մի զենք չի կարող հաղթել մեր բանակին, եւ դա է պատճառը, որ հանգիստ չի կարողանում մնալ ու ցանկացած սադրանքի ճանապարհով փորձում է ինչ-ինչ դիվիդենտներ շահել: Բայց արդյունքում հենց ինքն է իր արած գործողություններից խոր հիասթափություն ապրում: Քանի որ Պաշտպանության բանակը լիակատար վերահսկում է մեր սահմանները:

ԻԼՈՆԱ ԱԶԱՐՅԱՆ