ԿՈՒՐՍԱՆՏԻՆ ԱՆԿՈՂՆՈ՞ՒՄ ԵՆ ԽԵՂԴԱՄԱՀ ԱՐԵԼ

ԿՈՒՐՍԱՆՏԻՆ ԱՆԿՈՂՆՈ՞ՒՄ ԵՆ ԽԵՂԴԱՄԱՀ ԱՐԵԼ

Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության նախաքննությունը, ինչպես հայտնի է, ավարտվել է, եւ գործը մտնում է դատական փուլ: Թե ինչ է պարզվել նախաքննությամբ՝ տուժող կողմի եւ մեղադրյալների փաստաբանները համառորեն լռում են` նշելով, որ չեն ցականում բացել փակագծերը, քանի որ դա կխանգարի  դատարանում իրենց մարտավարությանը: Բայց ահա շրջանառվում են լուրեր, թե նախաքննությամբ բավականին ուշագրավ հանգամանքներ են ի հայտ եկել: Մասնավորապես պարզվել է, որ կուրսանտ Հայկազ Բարսեղյանը էմոյական հակումներ ունեցող երիտասարդ էր, եւ դա է ըստ երեւույթին պատճառը, որ մեղադրյալների փաստաբաններն անընդհատ առաջ են տանում ինքնասպանության վարկածը:

Մեր աղբյուրի հավաստիության մեջ մեկ անգամ եւս համոզվելու համար փորձեցինք դիմել տուժող` Բարսեղյանների փաստաբան ԳԱՐԻԿ ԳԱԼԻԿՅԱՆԻՆ, ով, զարմանալիորեն, որեւէ հստակ պատասխան վերոհիշյալի վերաբերյալ չտվեց` նշելով.
- Դա ի՞նչ կապ ունի: Այսօր մենք քննում ենք սպանության գործ, մեղադրանք առաջադրվել է սպանության գործով: Ես իհարկե հասկանում եմ, որ պաշտպանական կողմը հնարավոր է հենվի նման բաների վրա, այսինքն ասեն, թե կարող է աղանդավորական է եղել ու ինքնասպանություն է գործել: Սակայն ես այդ ինքնասպանության վարկածն առհասարակ բացառում եմ:
- Սակայն «աղանդավորական» բառը Դուք նշեցիք: Մինչդեռ մեր տեղեկությունները միայն այն մասին են, որ գործում առկա է, թե Հայկազ Բարսեղյանը էմոյական շարժման հակումներ է ունեցել: Կա՞ նման բան, թե` ոչ: Եվ նշենք, որ եթե անգամ գործում, չգիտես որտեղից, նման «բացահայտումներ» կան, դա ամենեւին էլ չի նշանակում, թե նախ՝ անպայման համապատասխանում է իրականությանը, կամ որ դա կարող էր հանգեցնել Ռազմական ինստիտուտի կուրսանտի, այսինքն՝ պատանեկան «գաղափարախոսություններից» այն կողմ անցած անձի ինքնասպանության. ի վերջո էմոյական պատանին հազիվ թե համազգեստ հագներ:
- Եթե պաշտպանական կողմը փորձի շեշտը դնել նրա վրա, որ կուրսանտը ինչ-որ աղանդավորական հակում է ունեցել եւ դրա հիմքով կարող էր ինքնասպանություն գործել, ես կկրկնեմ իմ նախորդ ասած խոսքերը. այսօր գործի փաստերն ասում են, որ որեւէ ինքնասպանություն տեղի չի ունեցել, դա իմ սուբյեկտիվ կարծիքն է: Թող դատարանը վերջում իր գնահատականը տա:
- Այսինքն՝ հնարավո՞ր եք համարում, որ դատարանում ինչ-որ բան կփոխվի:
- Չեմ կարծում, ավելի շուտ բացառում եմ, եւ դրա համար միայն Ձեզ համար կհրապարակեմ փորձաքննության մեկ մանրամասնություն: Այն է՝ փորձաքննությամբ ապացուցվել է, որ այն պարանը, որով Հայկազ Բարսեղյանը իբրեւ թե կախվել է, եւ նույն պարանից առաջացած ճմլվացքները, որոնք որ կան մարմնի վրա, եղել է հետմահու: Այսինքն՝ ինքը մահացած է եղել, որից հետո կախել են: Ավելի շատ փորձեմ բացել փակագծերը. փորձաքննություններով ապացուցվել է, որ Հայկազ Բարսեղյանին անկողնու մեջ խեղդամահ անելուց 3-րդ հարկից իջեցրել, տարել են մարզահրապարակ եւ կախել պտտաձողից:

ԻԼՈՆԱ ԱԶԱՐՅԱՆ