Զարմացած

Ինչպես հայտնի է, հոկտեմբերին մեկնարկել է «Գրին քարտի» վիճակախաղի հերթական խաղարկությունը, եւ բավականին շատերը փորձում են մասնակցել դրան: Բնականաբար, ցանկացած «քուչում» պպզած Վալոդ Անբանյան երազում է` այ հիմա վիճակախաղով «Գրին քարտ» կշահեմ, կգնամ ԱՄն ու շատ լավ կապրեմ: Սակայն սոցիոլոգ ԱՀԱՐՈՆ ԱԴԻԲԵԿՅԱՆԸ զարմանալի, նույնիսկ ահավոր դաժանությամբ պատմում է ճշմարտությունը եւ կոտրում այդ մարդկանց երազանքը. «Ճիշտ է, վիճակախաղին կարող է մասնակցել ցանկացած անձ, որը բավարարում է դրա պահանջներին: Այդուհանդերձ, վերջնական ընտրություն կատարվում է ոչ պատահական ընտրության սկզբունքով, ինչպես վիճակախաղում է, այլ լուրջ սելեկտիվ տարբերակով: Այսինքն` ԱՄՆ դեսպանատանը «Գրին քարտի» հավակնորդների հետ հարցազրույցի ժամանակ որոշակի սկզբունքներ է կիրառվում: Այն քաղաքացիները, ովքեր կարող են «Գրին քարտ» շահել, անպայման պետք է մի շարք չափորոշիչների բավարարեն...

Իսկ անբաններին, որեւէ մասնագիտության չտիրապետողներին, օրինախախտներին, հանցագործներին, տարբեր անբուժելի հիվանդություններով տառապողներին նման հնարավորություն չի ընձեռվում, նրանց առջեւ Միացյալ Նահանգների դուռն այդ միջոցով փակվում է»:
Ոչ պակաս դաժան է իր գնահատականներում եւ քաղաքագետ ԱԼԵՔՍԱՆԴՐ ԻՍԿԱՆԴԱՐՅԱՆԸ: Խոսելով սահմանադրական փոփոխությունների հակառակորդների մասին` նա զարմանալի դիպուկ բանաձեւում է. «Մի առիթով ասել եմ` եթե վաղը իշխող կուսակցությունը որոշի օրենքով ամրագրել բազմապատկման աղյուսակը, ընդդիմությունը կքվեարկի դրա դեմ` արտահայտելով ոչ թե իր կարծիքը տվյալ օրենսդրական նախաձեռնության վերաբերյալ, այլ վերաբերմունքը իշխանությունների նկատմամբ»: Նա նաեւ համոզմունք հայտնելով, որ մեծամասնությունը չի էլ կարդացել նախագիծը, տալիս է ախտորոշումը. «Ավելին` «Ոչ» ասողների մեծամասնությունը ոչ վաղ անցյալում պնդում էր, որ երկիրը տեղապտույտից դուրս բերելու միակ ձեւը խորհրդարանական համակարգի անցնելը եւ մեծամասնական ընտրակարգից հրաժարվելն է: Բայց բավական էր, որ իշխանությունն ասեր` օքեյ, թող ձեր ուզածը լինի, որպեսզի խորհրդարանական համակարգի նախկին ջատագովները վերածվեին կիսանախագահական մոդելը պահպանելու համոզված կողմնակիցների»:
Երբ Սահմանադրությանը նվիրված քննարկմանը ելույթ էր ունենում դաշնակցական ԱՐԾՎԻԿ ՄԻՆԱՍՅԱՆԸ, սրահ մտան «Ոչ»-ի պաստառներով երիտասարդներ, ինչին պատգամավորը արձագանքեց` հաճելի է տեսնել, որ «Ոչ»-ի կողմնակիցները հետաքրքրվում են հարցով: Բայց միաժամանակ Արծվիկ Մինասյանը զարմանալի միամտություն դրսեւորեց` հույս հայտնելով, որ «Ոչ»-ի կարգախոսով հանդես եկող ակտիվիստները ծանոթ են փոփոխությունների նախագծին: Թան էլ չէ, փրթած մածուն` ախր վերջերս, օրինակ, հոգեբույժների միջավայրում շրջանառվում է կատակ, որ հոգեբուժարաններում կտրուկ պակասել է նապոլեոնների քանակը, քանզի հիմիկվա գժերը պարզապես չգիտեն էլ, թե ով է եղել Նապոլեոնը:
Եվ վերջապես մի զարմանալի լուր, որը ցույց է տալիս, որ աշխարհը շուռ է եկել: Հռչակավոր «ՓԼԵՅԲՈՅ» հանդեսի խմբագրությունը հայտարարել է, որ այլեւս հրաժարվելու է մերկ կանանց եւ աղջիկների նկարներ հրապարակելուց: Բայց ախր, դա նրանց միակ գործն էր, եւ եթե այդպիսի նկարներ չեն տպելու, ապա, գրողը տանի, ինչ են տպելու: Հո օրինակ, չեն զբաղվի աշխարհաքաղաքական վերլուծություններ հրապարակելով, կամ հո սովորական պոռնոգրաֆիայի փոխարեն չեն տպելու քաղաքական պոռնոգրաֆիա, ասենք` մեր արմատական ընդդիմադիրների ելույթների տեսքով: Մի՞թե ԱՄՆ գերագույն դատարանի որոշումը նույնասեռական ամուսնությունների օրինականացման վերաբերյալ ազդել է նաեւ «Փլեյբոյի» վրա, եւ այսուհետ մերկ գեղեցկուհիների փոխարեն տպելու են պեդերաստների պատկերները...

Զարմացած է
ՀՈՎՀԱՆՆԵՍ ԳԱԼԱՋՅԱՆԸ