«ԻՄ ԳՈՐԾԸՆԿԵՐՆԵՐԻՆ ԽՈՐՀՈՒՐԴ ԿՏԱՅԻ ԽՈՍԵԼՈՒՑ ԱՌԱՋ ՄՏԱԾԵԼ»

«ԻՄ ԳՈՐԾԸՆԿԵՐՆԵՐԻՆ ԽՈՐՀՈՒՐԴ ԿՏԱՅԻ ԽՈՍԵԼՈՒՑ ԱՌԱՋ ՄՏԱԾԵԼ»

Որքան մոտենում է սահմանադրական բարեփոխումների հանրաքվեի օրը, այնքան զավեշտալի է դառնում այս նախագծին դեմ արտահայտվող քաղաքական գործիչների անզոր ու անհույս ելույթներն ու տարբեր նախաձեռնությունները: Իսկ մյուս կողմից` որոշ քաղաքական գործիչներ լրջորեն պատրաստվում են նոր, փոփոխված սահմանադրության հոդվածների տողատակերով սողոսկել հայաստանյան քաղաքական դաշտ: Մեկը փափագում է վարչապետի պաշտոն ստանալ, մյուսն էլ իր առավել խայտառակ հայտարարություններով փորձում գոնե մտնել ինչ-որ օտարերկյա ուժերի աչքը: Մերօրյա ներքաղաքական պատկերի մասին էլ ծավալվեց «Իրավունքի» զրույցը  ԱԺ ՀՀԿ խմբակցության պատգամավոր ՍԱՄՎԵԼ ՆԻԿՈՅԱՆԻ հետ:

«ՀԱՄՈԶՎԱԾ ԵՄ, ՈՐ ՀԱՆՐԱՔՎԵՆ ՇԱՏ ՔԱՂԱՔԱԿԻՐԹ ՊԱՅՄԱՆՆԵՐՈՒՄ Է ԱՆՑՆԵԼՈՒ»

–Ընդդեմ սահմանադրական բարեփոխումների, օրերս ձեւավորվել է «Նոր Հայաստան» հանրային փրկության ճակատը, որի քաղաքական խորհրդում տեղավորվել են Րաֆֆի Հովհաննիսյանը, Ժիրայր Սէֆիլյանը, Հմայակ Հովհաննիսյանը, Անդրիաս Ղուկասյանը, Պետրոս Մակեյանը, Գարեգին Չուքասզչյանը եւ Արմեն Մարտիրոսյանը: Ըստ Ձեզ` ո՞ւմ են փրկելու քաղաքական ստվերում հայտնված այս գործիչները:
– Վերցրեք եւ ուսումնասիրեք 1995 թվականի սահմանադրության հանրաքվեի ժամանակը եւ ընդդիմության կոչերը, լոզունգները, բանաձեւերը ու տեսեք, թե միավորման ինչ անուններ են տվել: Կամ նայեք 2005 թվականի սահմանադրության փոփոխությունների հանրաքվեի ժամանակն ու ընդդիմության որդեգրած վարքագիծը ու համեմատականներ անցկացրեք այսօրվա հետ: Ուզում եմ ասել, որ թեպետ այն ժամանակ ընդդիմությունը տարբեր է եղել, բայց մտքերը, արտահայտությունները բոլորովին նույնն են: Այնպես որ, անսպասելի ոչինչ չկա, սա իրենց քաղաքական իրավունքն է: Եթե ձեւավորում են «ոչ»-ի ճակատ, ուրեմն` պետք է հանրաքվեի օրն իրենց համակիրներին, համախոհներին քարոզեն, որ գնան «ոչ» ասեն սահմանադրական փոփոխություններին: Իսկ մենք մեր համակիրներին, համախոհներին քարոզելու ենք, որ գնան ու «այո» ասեն, մինչեւ այժմ բացատրել ենք եւ այսուհետ էլ կբացատրենք, թե ինչու: Սա քաղաքակիրթ ճանապարհն է, վերջիվերջո, ամեն ինչի գնահատականը տալիս է ժողովուրդը:
– Բայց վերոնշյալ ուժերով նրանց կհաջողվի՞ բավարար թվով «ոչ» ասող համախոհներ գտնել: Չէ՞ որ մարդիկ շատ լավ գիտեն, օրինակ, Րաֆֆի Հովհաննիսյանի քաղաքական կարողությունները:
– Ես որեւէ մեկին չեմ ուզում գնահատական տալ: Յուրաքանչյուրին հանրությունը լավ ճանաչում է, որովհետեւ յուրաքանչյուրի խոսքի հետեւում գործ է: Այդ իսկ պատճառով ես ո՛չ մտնում եմ գնահատականներ տալու դաշտ, ո՛չ էլ` վիրավորելու դաշտ, ինչպես շատ հաճախ հակառակ կողմից եմ լսում: Ընդամենն ասում եմ, որ հանրաքվեի արդյունքները որոշում է ժողովուրդը, եւ յուրաքանչյուրն իր համակիրներին թող փորձի համոզել իր տեսակետի ճշմարտությունը: Համոզված եմ, որ հանրաքվեն շատ քաղաքակիրթ պայմաններում է անցնելու, եւ մեր հանրության անհրաժեշտ մեծամասնությունը «այո» է ասելու սահմանադրական փոփոխություններին: Դրանում, ուղղակի, վստահ եմ, իսկ մնացածն իրենց քաղաքական իրավունքներն են, թող պայքարեն, ինչպես ուզում են, բայց թող այն լինի օրինականության շրջանակներում:

«ԿԳԱ ՕՐԸ, ԵՎ ԿՏԵՍՆԵՔ, ՈՐ ԱՄԵՆ ԴԵՊՔՈՒՄ, ՇԱՏ ՇԱՏԵՐԸ ԿՍԽԱԼՎԵՆ»

–Ի դեպ, օրինականության մասին. երեկ ԱԺ ՀԱԿ խմբակցության ղեկավար Լեւոն Զուրաբյանն, ըստ էության, վերահաստատել է իր արած հայտարարությունն առ այն, որ Վենետիկի հանձնաժողովը կաշառված է ՀՀ ՍԴ նախագահի կողմից, ինչի առթիվ իրավական գործընթաց է սկսել Գլխավոր դատախազությունը: Ի՞նչ կասեք այս մասին:
– Պարզապես, իմ գործընկերներին խորհուրդ կտայի խոսելուց առաջ մտածել: Նրանք բոլոր նրանց, անգամ իրենց ներսի ընդդիմախոսներին, որոնք չեն համաձայնում իրենց տեսակետին կամ ունեն այլ տեսակետ, կարող են հայհոյել, կաշառակեր անվանել, աշխարհի բոլոր մեղքերը բարդել նրա ուսերին: Բայց երբ նույնն անում են օտարերկրյա հեղինակավոր միջազգային կազմակերպության վերաբերյալ, կարծում եմ, որ լավ չեն մտածել` ինչ են անում: Սա ավելի շատ վնաս է բերում առաջին հերթին իրենց եւ, իհարկե, նաեւ մեր երկրին:
– Այնուամենայնիվ, երկար մտածելու փոխարեն, Լ. Զուրաբյանն առավել հեռուն է գնացել ու շեշտել, թե ՍԴ նախագահ Գագիկ Հարությունյանին խոստացվել է վարչապետի պաշտոնը...
– Այսօր յուրաքանչյուրը նման հարցում, որն իր մեջ չի պարունակում զրպարտանք, վիրավորանք, այլ, ուղղակի, քաղաքական կանխատեսումներ են, ազատ է անելու այն: Թող ինքն էլ այսօրվանից «նշանակի» բոլոր հնարավոր պաշտոններին ում ուզում է, բայց կգա օրը, եւ կտեսնեք, որ, ամեն դեպքում, շատ-շատերը կսխալվեն իրենց կանխատեսումների մեջ:
– Ռուսաստանի հայերի միության նախագահ Արա Աբրահամյանը նույնպես որոշակի ախորժակ ունի` հայաստանյան քաղաքական դաշտի հետ կապված եւ որպես այցեքարտ` տպավորություն է, որ փորձում է համոզել, թե ՌԴ նախագահի կողմից է երաշխավորված: Ըստ Ձեզ` կհաջողվի՞ նրան իր տեղը գտնել ՀՀ քաղաքականության մեջ:
– Հայաստանի քաղաքական դաշտում քաղաքականությամբ զբաղվելու, քաղաքական գործընթացներում եւ պետական կառավարման համակարգում իրավունք ունեն լինելու այն մարդիկ, որոնք օրենքով ունեն նման լիազորություններ: Իսկ նրանք, ովքեր իրավունք ունեն եւ փորձում են Հայաստանի քաղաքական դաշտում գործունեություն ծավալել, իրենց խնդիրն է: Բայց նորից եմ կրկնում` ովքեր ունեն այդ իրավունքը, եւ մեր սահմանադրությունը թույլ է տալիս:

ՀՐԱՆՏ ՍԱՐԱՖՅԱՆ