«ԱՄԵՆ ՕՐ ՀԱՐՑՆՈՒՄ Է` ԱՐԵՎԻ ԼՈՒՅՍ ԿՏԵՍՆԵ՞Մ»

«ԱՄԵՆ ՕՐ ՀԱՐՑՆՈՒՄ Է` ԱՐԵՎԻ ԼՈՒՅՍ ԿՏԵՍՆԵ՞Մ»

Հայաստանյան քրեակատարողական հիմնարկներում ցմահ ազատազրկման դատապարտված մարդկանց թիվը հասնում 101-ի: Այս մասին տեղեկացանք ՀՀ ԱՆ ՔԿՀՎ լրատվության վարչության պետ Գոռ Ղլեչյանից: Ցմահ դատապարտվածներին անդրադառնալու պատճառ հանդիսացավ 20 տարի բանտում գտնվող ու գրեթե ողջ ընտանիքը կորցրած նախկին հետախույզ Սողոմոն Քոչարյանի առողջական վիճակը, որը օր օրի էլ ավելի է վատանում: Ս. Քոչարյանը, ինչպես հայտնի դարձավ, կարող է մոտ ժամանակներս հայտնվել ազատության մեջ, ինչը կարծես թե իր նախադեպը չունի:

ԻՐԱԿԱՆՈՒՄ ԻՆՉՊԵՍ Է ՍՊԱՆՎԵԼ ՊԱՐՍԿԱՀՊԱՏԱԿ ԱԴՐԲԵՋԱՆՑԻՆ

Հիշեցնենք, որ Արցախյան պատերազմի մասնակից, 2-րդ կարգի հաշմանդամ, հետախույզ Սողոմոն Քոչարյանը 1995-ին դատապարտվել է մահապատժի:  Նա մեղադրվել էր պարսկահպատակ ադրբեջանցու` Իրաջ Փուր Միրզա-Բեկի սպանության մեջ: Դատապարտման տարիներին էլ Ս. Քոչարյանը քանիցս եղել է ուշադրության կենտրոնում: Մասնավորապես, որ երկու անգամ իր խցակից Մհեր Ենոքյանի հետ կարողացել է փախչել բանտից: Եվ ահա երեկ պաշտոնապես հայտարարվեց, որ Սողոմոն Քոչարյանին պատժի հետագա կրումից ազատելու վերաբերյալ միջգերատեսչական բժշկական հանձնաժողովը դրական եզրակացություն է տվել, որն ուղարկվել է Կենտրոն եւ Նորք-Մարաշ վարչական շրջանների ընդհանուր իրավասության դատարան, եւ օրենքով սահմանված կարգով յոթ օրվա ընթացքում դատարանը նիստի օր կնշանակի:
Այլ հարց է, որ մինչ այժմ էլ պարբերաբար շրջանառվում է այն հին վեճը, թե արդյոք Ս. Քոչարյանն իրավա՞մբ հայտնվեց կալանավայրում: Քանի որ դեպքը տեղի է ունեցել քսան տարի առաջ, ուստի ավելորդ չենք համարում որոշ մանրամասներ ներկայացնել քրեական գործից: Մեզ հետ զրույցում Սողոմոն Քոչարյանի ներկայիս փաստաբան ԳՐԻՇԱ ԲԱԼԱՍԱՆՅԱՆԸ մասնավորապես նշեց.
- 29-ամյա Սողոմոնը մեղավոր է ճանաչվել 1995-ին Երեւան-Մեղրի ավտոճանապարհի վրա պարսկահպատակ Իրանի քաղաքացի Իրաջ Փուր Միրզա-Բեկի կանխամտածված սպանության ու թալանի մեջ` դատապարտվելով բացառիկ պատժամիջոցի` մահապատժի (2003-ին ՀՀ նախագահի հրամանագրով մահապատիժը փոխարինվել է ցմահ ազատազրկման): Իրանի քաղաքացի վարորդի մեքենայից, ըստ քրեական գործի նյութերի, Սողոմոն Քոչարյանը վերցրել է գումար, նրա փաստաթղթերը ու դիմել փախուստի: Ընդամենը 3 հատորանոց գործ ու 4 ամիս տեւած դատավարություն, եւ... մահապատժի դատավճիռ, սա է իրականությունը: Պատկերացրեք` 1995 թվականն էր, երբ Հայաստանի քաղաքացիները հրադադարից հետո կարողանում էին գոյատեւել Իրանից մուտք գործող ապրանքներով, ուստի մեծ էր այս գործի նկատմամբ պետական ու միջպետական հսկողությունն ու ուշադրությունը: Քրեական գործին հետեւել ու դատավարությանը մասնակցել է ՀՀ-ում ԻԻՀ դեսպանատան հատուկ ներկայացուցիչը: Բացի այդ, որպես թարգմանիչ, ներգրավվել է հենց դեսպանատան թարգմանիչ` հիմնական թարգմանչի հիվանդության պատճառաբանությամբ: Հայաստան ժամանած տուժող կողմի ներկայացուցիչը պահանջել է՝ մահապատժի դատապարտել Սողոմոն Քոչարյանին: Արդյունքում՝ դատարանը հաստատված է համարել, որ Սողոմոն Քոչարյանը դիտավորությամբ կրակել է Հայաստանից Իրան վերադարձող Միրզա-Բեկի բեռնատար մեքենայի առաջին անվադողին, ապա եւ կանխամտածված սպանություն կատարել` հափշտակելով մեքենայում եղած գումարը: Ըստ գործի նյութերի, երբ վարորդը դուրս է եկել անվադողը փոխելու, Սողոմոն Քոչարյանը մոտիկ հեռավորությունից կրակել է նրա արմունկին: Վարորդը վայր է ընկել, գլուխը հարվածել բութ մակերեսի ու մահացել: Այս փաստը ապացուցված է համարվել նաեւ դատաբժշկական փորձաքննությամբ: Փորձագետը նշել էր, որ մահը վրա է հասել գանգուղեղային փակ վնասվածքից, հնարավոր է ընկնելուց: Բայց... Ղարաբաղյան պատերազմով անցած ազատամարտիկը, հետախույզը, եթե սպանության մտադրություն ունենար, ապա ոչինչ չէր խանգարի նրան կրակել տուժողի գլխին կամ կրծքին, այն էլ՝ մի քանի անգամ: Այնինչ՝ գնդակը կպել է միայն արմունկին: Եվ այս ամենի արդյունքում մահապատի՞ժ. ինչքանո՞վ է արդար:

«ԲԺԻՇԿՆԵՐԸ ՔԱՌԱՍՈՒՆ ՐՈՊԵՆ ՄԵԿ ՑԱՎԱԶՐԿՈՂՆԵՐ ԵՆ ՆԵՐԱՐԿՈՒՄ»

-Իսկ ներկայումս ինչպե՞ս է Ս. Քոչարյանի առողջական վիճակը: Կան խոսակցություններ, որ իրեն շատ վատ է զգում:
- Սողոմոն Քոչարյանը մի քանի տարի շարունակ անընդհատ գանգատվել է, որ առողջական լուրջ խնդիրներ ունի: Քսան տարի անազատության մեջ գտնվող պատերազմի 2-րդ կարգի հաշմանդամը տառապում է սրտի իշեմիկ հիվանդությամբ` 4-րդ աստիճանի սրտային անբավարարությամբ (իշեմիկ կարդիոմիոպաթիա), ունի հետինֆարկտային խրոնիկ անեւրիզմա, հիվանդ է նաեւ կանգային թոքաբորբով: Այս հիվանդությամբ նա ենթակա է պատժից ազատման` համաձայն ՀՀ կառավարության հաստատած պատժի կրման հետ անհամատեղելի հիվանդությունների ցանկի: Բացի այդ, նրա մոտ հայտնաբերվել է նաեւ ողնաշարային հիվանդություն: Օգոստոսի 26-ից մինչ այս պահը պաշտպանյալս գտնվում «Գրիգոր Լուսավորիչ» ԲԿ-ում, առողջական վիճակը ծայրահեղ ծանր է: Այս պահին չի քայլում, չի տեղաշարժվում, բժիշկները բառիս բուն իմաստով քառասուն րոպեն մեկ ցավազրկողներ են ներարկում, քանի որ հակառակ դեպքում ցավերից ամբողջ հարկով գոռում է: Որ նրան հիմա ազատ արձակեն, նա նույնիսկ չի կարող իր ոտքով տուն գնալ: Բայց դա շատ մարդասիրական քայլ կլիներ եւ հոգեբանական ազդեցություն կարող է ունենալ Սողոմոնի վրա, որովհետեւ նա ամեն օր հարցնում է` ես արեւի լույս կտեսնե՞մ, թե չէ: Նրա վիճակն այնքան վատ է, որ նա ամեն օր արթնանալիս փառք է տալիս Աստծուն, թե` այսօր էլ ապրեցի: Իսկ նման պայմաններում դատապարտյալին պահել փակ ռեժիմում, անկողնուն գամված... Մինչդեռ ուղղակի անմարդկային է, որ հիվանդասենյակի մոտ չորս-հինգ հոգի հսկում են, որ նա հանկարծ փախուստի չդիմի, երբ նա նույնիսկ ոտքը անկողնուց ներքեւ չի կարողանում դնել:

ԻԼՈՆԱ ԱԶԱՐՅԱՆ