ՎԱՀԱՆ ՄԱՐՏԻՐՈՍՅԱՆԻՑ ՏՈՒԺԱԾ ՌՈՒԶԱՆ ՄԱՐԳՈՒՆԻՆ ԴԻՄԵԼՈՒ Է ԳԼԽԱՎՈՐ ԴԱՏԱԽԱԶԻՆ ՈՒ ՔՆՆՉԱԿԱՆ ԿՈՄԻՏԵԻՆ

ՎԱՀԱՆ ՄԱՐՏԻՐՈՍՅԱՆԻՑ ՏՈՒԺԱԾ  ՌՈՒԶԱՆ

ՄԱՐԳՈՒՆԻՆ  ԴԻՄԵԼՈՒ Է ԳԼԽԱՎՈՐ ԴԱՏԱԽԱԶԻՆ ՈՒ

ՔՆՆՉԱԿԱՆ ԿՈՄԻՏԵԻՆ

Ադրբեջան փախած դավաճան Վահան Մարտիրոսյանից տուժած  գիտաշխատող, թարգմանչուհի Ռուզան Մարգունին  նամակներ է  ուղարկելու գլխավոր դատախազություն եւ քննչական կոմիտե: Այս մասին «Իրավունքը» տեղեկացավ Ռուզան Մարգունուց: «Դրանք իսկ ավելի կոնկրետ քննիչը, ուզում է  ամեն կերպ ցույց տալ, որ ճիշտ է արել, որ դրան (նկատի ունի Վահան Մարտիրոսյանին-խմբ.) չեն ձերբակալել, որ իբր  գողություն չի եղել: Ուզում եմ անվստահություն հայտնել, քանի որ իմ կարծիքով գործն այդ ուղղությամբ են տանում: Չնայած հույս չունեմ, որ ուղարկվելիք նամակներից արդյունք կլինի»,- ասաց մեր զրուցակիցը:

Տիկին Մարգունու համար անհասկանալի է, թե ինչու քննիչն առանց անձնագրի, առանց  որեւէ իրավական հիմնավորման բաց է թողել Վահան Մարտիրոսյանին: «Ես ԱԱԾ ղեկավար Գորիկ Հակոբյանին էի նամակ գրել եւ բողոքել` ինչու են բաց թողել  դրան, թույլ տվել` սահմանն անցնի, սակայն  ԱԱԾ-ն իմ նամակն ուղղորդել էին վերոնշյալ ատյաններ»,- ասաց տիկին Մարգունին:

Տուժողն այլեւս չի ցանկանում որեւէ  առնչություն ունենալ քննիչի հետ` նյարդեր չունի. «Ինչ-որ փորձաքննություն են արել, իբր քրտինքի հետքերն անհետացել են: Քննիչին ասում եմ` հիմա  ինչու եք այդ գործողություններն անում բաց թողնելուց հետո: Ասում է` իմ գործն է»:

Եթե քննչական կոմիտեն ու գլխավոր դատախազությունը Ռուզան Մարգունուն բավարարող պատասխան չտան, գիտաշխատողը չգիտի` ինչ է  անելու: «Ինձ թվում է, որ դրանք (նկատի ունի իրավապահներին-խմբ.), արել են ամեն ինչ` գործը կասեցնելու համար, որպեսզի նա փախչի»,-ասաց գիտաշխատողը:

Այս անորոշության պատճառով Ռուզան Մարգունին չի կարողանում  իր աշխատանքով զբաղվել: Ավելին` անգամ գումար էլ չունի, որ փաստաբան վարձի:

Թեեւ Վահան Մարտիրոսյանն է տիկին Մարգունու տանից հափշտակել 4000 ԱՄՆ դոլարը, սակայն փորձել է գումարի պահանջի հարցով դիմել Վահան Մարտիրոսյանի մորը: «Ոչ, ես նրանց հետ կապ չունեմ»,- եզրափակեց  գիտաշխատողը:

ՍՈՆԱ ԴԱՎԹՅԱՆ