ԱԼԵՆ ՍԻՄՈՆՅԱՆ. «ԻՇԽԱՆՈՒԹՅՈՒՆԸ ՄԻՇՏ ՋԱԽՋԱԽԵԼՈՒ Է ԸՆԴԴԻՄՈՒԹՅԱՆԸ, ԵԹԵ…»

ԱԼԵՆ ՍԻՄՈՆՅԱՆ. «ԻՇԽԱՆՈՒԹՅՈՒՆԸ ՄԻՇՏ

ՋԱԽՋԱԽԵԼՈՒ Է ԸՆԴԴԻՄՈՒԹՅԱՆԸ, ԵԹԵ…»

Հայտնի է, «Քաղաքացիական պայմանագիր» կուսակցությունը կեղծ օրակարգ է համարում սահմանադրական բարեփոխումները: Կուսակցության անդամներից է ՀԱԿ խմբակցության պատգամավոր Նկոլ Փաշինյանը:

«Իրավունք»-ն այսօր վերոնշյալմ կուսակցության  վարչության անդամ Ալեն Սիմոնյանից պարզեց` եթե  հանրությունն «այո» ասի նոր սահմանադրությանը, «Քաղաքացիական  պայմանագիր»-ն իր կուսակցական գործունեությունը ծավալելու է հենց նոր սահմանադրության շրջանակներում: Հետեւաբար, հենց միայն այդ տեսանկյունից արդյոք կուսակցությունը չպետք  է դիրքորոշում հայտնի նոր սահմանադրության վերաբերյալ, որտեղ գուցե կան դրույթներ, որոնք կխոչընդոտեն «Քաղաքացիական պայմանագիր» կուսակցության գործունեությանը:

«Անկախ նրանից, թե մենք կապրենք խորհրդարանական կամ կիսանախագահական համակարգում, եթե դու չունես ձեւավորված  ինստիտուցիոնալ ընդդիմություն, որը չի կարողանում գրեթե բոլոր ընտրատարածքներում ունենալ մարդիկ, դու կպարտվես: Քանի դեռ Հայաստանում չկա  ինստիտուցիոնալ ընդդիմություն, իշխանությունը միշտ «հաղթելու» է, ջախջախելու է ընդդիմությանը»,- պատասխանեց կուսակցության անդամը:

Նիկոլ Փաշինյանի կուսակցի խոսքով` Սերժ Սարգսյանն ու գործող իշխանությունը կարող են վերարտադրվել նաեւ գործող սահմանադրության շրջանակներում: «Իրավունք»-ն այս առնչությամբ  պրն Սիմոնյանից հետաքրքրվեց` արդյոք «Ոչ»-ի ճակատի պնդումները, թե  նոր սահմանադրությամբ իշխանությունը ցանկանում է վերարտադրվել, կեղծ չեն:  «Ես չեմ ցանկանում որեւէ ուժի գնահատական տալ,  բայց տարբերություն չկա` Սերժ Սարգսյանը նոր, թե հին սահմանադրությամբ կվերարտադրվի»,- ասաց  «Քաղաքացիական պայմանագիր» կուսակցության անդամը:

Այնուամենայնիվ, Ալեն Սիմոնյանը չբացառեց` եթե լինի կոնկրետ առաջարկ եւ գործողություններ «Ոչ»-ի ճակատի կողմից, կքննարկեն եւ չի բացառվում` անգամ միանան:

ՍՈՆԱ ԴԱՎԹՅԱՆ