ՓԱՇԻՆՅԱՆԻ ԱՐՏԱՍԱՀՄԱՆՅԱՆ ԱՅՑԵՐԸ ՓՈՂ ՀԱՎԱՔԵԼՈՒ ՆՊԱՏԱԿ ՉՈՒՆԵԻՆ

ՓԱՇԻՆՅԱՆԻ ԱՐՏԱՍԱՀՄԱՆՅԱՆ ԱՅՑԵՐԸ ՓՈՂ

ՀԱՎԱՔԵԼՈՒ ՆՊԱՏԱԿ ՉՈՒՆԵԻՆ

ՀԱԿ խմբակցության պատգամավոր, «Քաղաքացիական պայմանագիր»  կուսակցության կառավարման խորհրդի անդամ Նիկոլ Փաշինյանն ու Ալեն Սիմոնյանը վերջերս եղել են  ԱՄՆ-ում, ապա Մոսկվայում:  «Իրավունք»-ը կուսակցության  վարչության անդամ Ալեն Սիմոնյանից պարզեց` այդ այցերը պայմանավորվա՞ծ էին նաեւ նորաստեղծ կուսակցության  համար ֆինանսներ հայթայթելով: «Ոչ, այդ այցերը պայմանավորված էին մեր հայրենակիների հետ հանդիպումներով, նրանց կարծիքը լսելով: Մենք ցանկանում ենք մեր սփյուռքահայ հայրենակիցներին ներգրավվել ընտրական գործընթացներում: Բացի այդ` մեր կուսակցության ծրագրային դրույթներից մեկով  նախատեսված է կրկնապատկել ՀՀ բնակչության թիվը մեր իշխանության գալուց հետո»,- պատասխանեց վարչության անդամը:

«Քաղաքացիական պայմանագիր» նախաձեռնության գործունեության ֆիանսավորումը ՀՀ օրենսդրությանը եւ ժողովրդավարության հայտնի կանոններին կազմակերպելու նպատակով ստեղծվել է «Քաղաքացիական պայմանագիր» վերադարձի  հիմնադրամը: Սակայն թե որքան գումար է հավաքվել  հիմնադրամի հաշվեհամարին,Ալեն Սիմոնյանը նախ ասաց, որ դա փակ տեղեկատվություն է, ապա ավելացրեց. «Անկեղծ ասած, չգիտեմ էլ` ինչքան գումար է հավաքվել»:

Ինչպես ժողովուրդն է ասում առանց կրակ ծուխ չի լինում, այսինքն արտասահման մեկնել այն «հյուրախաղերով», թե հանդիպում ենք հայրենակիցների հետ, դա ընդամենը գործի մի մասն է: Կուսակցություն ստեղծելն ու հանրության շրջանակում ռեյտինգ ապահովելը, քաղցր խոսքերով, կամ խոստումներով չես ապահովի: Իսկ եթե մի պահ լուրջ ընդունենք Ա. Սիմոնյանի ասածները ու հավատանք, թե ոչ մի գումարային ակնկալիք չկա դրսից, ապա այդ ում հույսով է «Քաղաքացիական պայմանագիրը» որոշել առաջ գնալ:

ՍՈՆԱ ԴԱՎԹՅԱՆ