«ԹՈՒՆԱՎՈՐ ԾԱՌ»-Ի ԴԵՄ ՔԱՐՈԶԱՐՇԱՎԸ ՍԿՍՎԵԼ Է, ԻՍԿ ՐԱՖՖԻ ՀՈՎՀԱՆՆԻՍՅԱՆԸ ԿՐԿԻՆ ԱՍՊԱՐԵԶՈՒՄ ՉԷ

«ԹՈՒՆԱՎՈՐ ԾԱՌ»-Ի ԴԵՄ ՔԱՐՈԶԱՐՇԱՎԸ  ՍԿՍՎԵԼ Է,

ԻՍԿ ՐԱՖՖԻ ՀՈՎՀԱՆՆԻՍՅԱՆԸ ԿՐԿԻՆ ԱՍՊԱՐԵԶՈՒՄ ՉԷ

Երեկ հայտնի դարձավ, որ ՀԱԿ-ն ու ՀԺԿ-ն, որոնք սահմանադրական բարեփոխումների դեմ ստեղծված «Ոչ»-ի ճակատի մաս են կազմում, շտաբ են բացել:  Սահմանադրական բարեփոխումների դեմ պայքարող «Նոր Հայաստան» միասնության ճակատում անորոշություն է: Ավելին` ինչպես պարզ դարձավ «Ժառանգություն» կուսակցության փոխնախագահ Արմեն Մարտիրոսյանի` «Իրավունք»-ին տված պարզաբանումից, «Ժառանգություն» կուսակցության նախագահ Րաֆֆի Հովհաննիսյանն արդեն մեկ շաբաթի ավելի է, որ Հայաստանում չէ եւ մեկնել է արտերկիր ընտանեկան հարցերով:

Թե երբ է վերադառնալու «Ժառանգություն» կուսակցության նախագահը, Արմեն Մարտիրոսյանը դժվարացավ ասել:  «Տեղյակ չեմ, չգիտեմ»,- ասաց կուսակցության փոխնախագահը:

Հ.Գ. Առաջին հայացքից թվում է, որ արտառոց ոչինչ չկա, երբ պրն Հովհաննիսյանն արտերկրում է: Սակայն առաջին անգամ չէ, որ լսում ենք այս խոսքերը: Վերջերս «Նոր Հայաստան» միասնական ճակատի ասուլիսին եւս բացակայում էր Րաֆֆի Հովհաննիսյանը: Ու դարձյալ նույն պարզաբանումը` Րաֆֆին Հայաստանում չէ: Մինչդեռ  մինչ ԱԺ-ի վեցերորդ նստաշրջանի սկիզբը նախագահի նախկին թեկնածուն սահմանադրական բարեփոխումների մասին խոսելիս  գործածում էր  «թունավոր ծառից բարի  պտուղ չի կարող գալ»: Պարոն Հովհաննիսյան հիմա սկսվել է «թունավոր ծառի» դեմ պայքարը, սակայն դուք կրկին Հայաստանում չեք ու կրկին ասպարեզում չեք: Իսկ միգուցե,  ինչպես գրում են լրատվամիջոցները, «Ժառանգություն» կուսակցության ղեկավարն իրո՞ք դեպրեսիայի մեջ է:

ՍՈՆԱ ԴԱՎԹՅԱՆ