ՆԱՏՕ-Ի ՀԱԿԱՌՈՒՍԱԿԱՆ ՏՐԱՄԱԴՐՈՒԹՅՈՒՆՆԵՐՆ ՈՒ ԹՈՒՐՔ-ԱԴՐԲԵՋԱՆԱԿԱՆ ԱԳՐԵՍԻԱՆ

ՆԱՏՕ-Ի ՀԱԿԱՌՈՒՍԱԿԱՆ ՏՐԱՄԱԴՐՈՒԹՅՈՒՆՆԵՐՆ ՈՒ ԹՈՒՐՔ-ԱԴՐԲԵՋԱՆԱԿԱՆ ԱԳՐԵՍԻԱՆ

Հոկտեմբերի 9-12-ը Ստավանգերում (Նորվեգիայի Թագավորություն) կայացել է ՆԱՏՕ-ի Խորհրդարանական վեհաժողովի 61-րդ տարեկան նստաշրջանը, որտեղ անդրադարձ է եղել Սիրիայի ճգնաժամի, Աֆղանստանում անվտանգության պահպանման եւ այլ հարցերին: Սակայն, առավել ուշագրավ է այն, որ ՆԱՏՕ-ում ջանք ու եռանդ չի խնայվել հայ-ադրբեջանական սահմանային լարվածությունը բարդելու Ռուսաստանի Դաշնության վրա, ինչին անդրադարձել է «Ռուսաստանը եւ Եվրատլանտյան անվտանգությունը» զեկույցի հեղինակ Օյարս Կալնինշը: Այս մասին երեկ կայացած ասուլիսի ժամանակ ՆԱՏՕ-ի ԽՎ-ում ՀՀ ԱԺ պատվիրակության ղեկավար, ԱԺ ՀՀԿ խմբակցության պատգամավոր ԿՈՐՅՈՒՆ ՆԱՀԱՊԵՏՅԱՆԸ մասնավորապես ասաց. «Խնդիրն այն է, որ ԼՂ-ի մասով կային որոշ ձեւակերպումներ, որոնք չեն համապատասխանում իրական վիճակին: Այդ կապակցությամբ մենք բարձրաձայնել ենք մեր մտահոգությունը, գրավոր առաջարկներ ներկայացրել: Զեկույցում Ռուսաստանի հետ կապված որոշ ձեւակերպումներ են ներկայացվել, որոնք առնչվում են նաեւ ԼՂ հակամարտությանը. մասնավորապես հակամարտության ծագման եւ ներկա փուլում Ռուսաստանի ունեցած ազդեցությանը, ինչպես նաեւ ռուս-ուկրաինական հարաբերությունների համատեքստում ներկայացված կոնֆլիկտին:

Խորհրդարանական պատվիրակությունը հստակ առաջարկներ է ներկայացրել` նշելով, որ սխալ է նույն համատեքստում դիտարկել բոլոր հակամարտությունները:Ադրբեջանական պատվիրակությունը եւս ներկայացրել է իր առաջարկները: Սակայն, նախագահողն ընդհատել է ադրբեջանցի պատվիրակին, քանի որ օրակարգից դուրս հարցադրումներ են հնչեցվել»: Պատվիրակության անդամ, ԱԺ «Ժառանգություն» խմբակցության պատգամավոր ԹԵՎԱՆ ՊՈՂՈՍՅԱՆՆ էլ հավելեց, որ զեկույցի հեղինակ Օյարս Կալնինշը գիտակցել է, թե ինչ սխալներ է արել եւ ընդունել է դրանք. «Խնդիրն իրականում ավելի շատ ակադեմիական ճշմարտության ձեւակերպման մեջ էր: Մենք ասում էինք, եթե գրում եք հայ-ադրբեջանական կարգավորման մասին, ինչու եք մոռանում Մինսկի խմբի անունը տալ, քանի որ այն միայն Ռուսաստանը չէ, ի վերջո, ԱՄՆ-ն եւ Ֆրանսիան, որոնք ՆԱՏՕ-ի անդամ երկրներ են, դրանում ներգրավված են: Այդտեղ հասկանալի էր, որ իրենց պետք էր ավելի շատ Ռուսաստան բառը նշել զեկույցի մեջ, մեզ էլ անընդհատ ասում էին` դուք ինչու եք խառնվում, դա ձեզ չի վերաբերում»: Ինչ վերաբերում նրան, որ ադրբեջանցի պատվիրակին զրկել են հարց տալու իրավունքից, Թ. Պողոսյանն ընդգծեց. «ՆԱՏՕ-ում արդեն սովորություն են դարձել հայ-ադրբեջանական պատվիրակների, այսպես ասած, մտքային բախումները»:

ՀՐԱՆՏ ՍԱՐԱՖՅԱՆ