ՀԵՐՄԻՆԵ ՆԱՂԴԱԼՅԱՆԸ ԲԱՑԱՏՐԵՑ ՀԵՂԻՆԵ ԲԻՇԱՐՅԱՆԻՆ, ԹԵ ՈՎ ԻՆՉԻ ՀԱՄԱՐ Է ՊԱՏԱՍԽԱՆԱՏՈՒ

ՀԵՐՄԻՆԵ ՆԱՂԴԱԼՅԱՆԸ ԲԱՑԱՏՐԵՑ ՀԵՂԻՆԵ ԲԻՇԱՐՅԱՆԻՆ, ԹԵ

ՈՎ ԻՆՉԻ ՀԱՄԱՐ Է ՊԱՏԱՍԽԱՆԱՏՈՒ

Ընտրական օրենսգրքի քննարկումների ժամանակ ՕԵԿ խմբակցության ղեկավար Հեղինե Բիշարյանը իրեն բնորոշ բարձր գոռալով հայտարարեց, թե սահմանադրական հանրաքվեի ազատ ու արդար անցկացման համար պատասխանատու է ՀՀ վարչապետ Հովիկ Աբրահամյանը, քանի որ վերջինս նշանակվել է ընտրական շտաբի պետ: Նա նույնիսկ խիստ ափսոսեց, որ պարոն Աբրահամյանը չի եկել եւ չի մասնակցում օրենսգրքի փոփոխման հարցերին: Այդ հայտարարությունը խիստ զարմանք առաջացրեց տիկին Բիշարյանի ունկնդիրների մոտ, քանի որ բոլոր օրենքներով, սահմանադրություններով, որոշումներով ընտրությունների օրինականության համար պատասխանատու է, ոչ թե այս կամ այն կուսակցության շտաբի պետը՝ այլ ԿԸՀ-ն: Հավանաբար Հեղինե Բիշարյանը տեղյակ չէր, որ Հովիկ Աբրահամյանը չի նշանակվել հանրաքվեի շտաբի պետ, կամ ԿԸՀ-ի նախագահ, այլ ընդամենը ՀՀԿ-ի քարոզչությունն իրականացնող շտաբի ղեկավարն է եւ որւէ առնչություն չունի հանրաքվեի անցկացման եւ օրինականության ապահովման հետ: Բոլոր դեպքերում ԱԺ փոխխոսնակ Հերմինե Նաղդալյանը ստիպված էր Հեղինեին ընտրական համարակգի վերաբերյալ դաս տալ ու բացատրել, թե ինչ պատասխանատվություն ունի ԿԸՀ-ն եւ ինչի համար է պատախսնատու առանձին կուսակցության շտաբի պետը:

Այդ դասից հետո Բիշարյանի նյարդերը վերջնականապես տեղի տվեցին եւ նա իր ելույթում էլ ավելի բարձր տոնով հայտարարեց, որ նա ազնիվ մարդ է: Այնուհետ ընդհանրապես կորցնելով ինքնատիրապետումը անցավ փողոցային ժարգոնին եւ առաջարկեց ինչ որ մի բան <ռադ անել>: Թե հատկապես ինչ էր առաջարկում <ռադ անել> ազնիվ Հեղինե Բիշարյանը պարզ չդարձավ, քանի որ նա այնքան արագ ու բարձր էր բղավում:

Ինչ վերաբերում է տիկին Բիշարյանի սեփական անձի ինքնագնահատանքին, ապա, ճիշտ կլիներ, որ նրա ազնվության մասին դատեին ՀՀ ընտրողները: Դատելով ՕԵԿ-ի հանդեպ հանրության վերաբերմունքից, կարծում ենք, ոչ բոլոր ՀՀ քաղաքացիները միանշանակ կհամաձայնեին տիկին Բիշարյանի հետ:

Ի դեպ Հովիկ Աբրահամյանին Տիգրան Մուկուչյանի հետ շփոթելը Բիշարյանի միակ թյուրիմացությունը չէր: Իր ելույթում նա շփոթեց նաեւ <դրոշմանիշ> եւ <դրոշմապիտակ> բառերի իմաստը եւ անընդհատ <դրոշմանիշի> փոխարեն օգտագործում էր <դրոշմապիտակը>: Սակայն այդ շփոթմունքից նրան այդպես էլ հանող չեղավ, քանի որ այդ բառերի տարբերությունը պետք է իրեն բացատրեր լեզվի պետական տեսչության պետ Սերգո Երիցյանը, որը ցավոք ԱԺ դահլիճում չէր:

ԱՐՄԵՆՈՒՀԻ ՀԱԿՈԲՅԱՆ