ՆՈՐԱ ԳՐԻԳՈՐՅԱՆ. «ՈՂՋ ԴԱՀԼԻՃԸ ՄԱՐՄՆԱՄԱՐԶՈՒԹՅՈՒՆ ԷՐ ԱՆՈՒՄ»

ՆՈՐԱ ԳՐԻԳՈՐՅԱՆ. «ՈՂՋ ԴԱՀԼԻՃԸ ՄԱՐՄՆԱՄԱՐԶՈՒԹՅՈՒՆ ԷՐ ԱՆՈՒՄ»

Օրերս Կ. Ստանիսլավսկու անվան ռուսական դրամատիկական թատրոնի խաղացանկը համալրվեց նոր մանկական ներկայացումով: Թատրոնի բեմ բարձրացավ «Շաղգամը»: Ռուսական ժողովրդական հայտնի հեքիաթի հերոսներն երիտասարդ բեմադրիչ ՆՈՐԱ ԳՐԻԳՈՐՅԱՆԻ մտահղացմամբ գրեթե անճանաչելի էին, բայց եւ շատ զվարճալի: Ներկայացման մանրամասների շուրջ էլ ծավալվեց «Իրավունքի» զրույցը բեմադրիչի հետ:

- Նորա, նախ շնորհավորում եմ «Շաղգամը» հեքիաթի առաջնախաղի կապակցությամբ: Ինչպե՞ս ծնվեց այն բեմադրելու գաղափարը:

-  Շնորհակալություն: Ուրախ եմ, որ այն դուր եկավ թե´ փոքրերին, թե´ մեծերին: Մենք թարմացրել ենք մանկական ներկայացումների ամբողջ խաղացանկը. փորձում ենք բեմադրել այն հեքիաթները, որոնք ծանոթ են երեխաներին: Անկեղծ ասած, հեքիաթ բեմադրելու մտահղացումն իմն էր: Ղեկավարությունը՝ ի դեմս պարոն Գրիգրոյանի, մի տեսակ կասկածանքով էր վերաբերվում իմ այս մտահղացմանը, քանի որ այս հեքիաթում իրադարձությունների ու դեպքերի զարգացման զգալի պակաս կար: Այդ ծանր բեռը ինձ վրա վերցրեցի ու գրեցի սցենարը: Փորձեցի ստանալ նոր հեքիաթ, որտեղ կան ե՛ւ կոնֆլիկտներ, ե՛ւ իրադարձություններ, ե՛ւ հարաբերություններ, ինչպես նաեւ երգ, պար եւ, իհարկե, խաղեր:

- Փաստորեն, ե՛ւ սցենարն է Ձերը, ե՛ւ  երգերի ընտրությո՞ւնը…

-Այո´, եւ սա իմ առաջին փորձը չէ: «Մաշան եւ երեք արջերը» հեքիաթի սցենարը կրկին ես եմ գրել: Փոքրիկներին այն դուր եկավ: Ծնողներից շատերը մոտենում էին ու շնորհակալություն հայտնում ներկայացման համար: Նրանց գոհացրել էր նաեւ ներկայացման երաժշտական ձեւավորումը. հին ռուսական մուլտֆիլմներից հայտնի երգեր էի ընտրել: Գիտեմ, որ երեխաներից շատերը սերտել էին այդ երգերը ու երգում էին:

- Ի՞նչ եք կարծում` այս հեքիաթի, ո՞ր հերոսը հատկապես երեխաներին դուր եկավ:

- Կարծում եմ՝ Մկնիկը, ով մեր հիքիաթում կոչ է անում բոլորին միահամուռ լինել, մարմնամարզություն անել, ուժ հավագել եւ բռնած գործում միշտ հաղթողի դերում լինել: Անկեղծ ասած, չէի սպասում, որ մարմնամարզության տեսարանն, որ բեմադրել էի այստեղ այսքան շատ դուր կգա փոքրիկներին. դերասանին հավասար նրանք կրկնում էին բոլոր շարժումները. ողջ դահլիճը մարմնամարզություն էր անում (Ժպտում է.-հեղինակ): Իսկ ներկայացման վերջում փոքրիկներից շատերը ցանկություն հայտնեցին, որ Մկնիկը իրենց տուն գնա եւ եւս մի քանի շարժումներ սովորեցնի…

- Մանկական ներկայացում բեմադրելիս, ի՞նչ կարեւոր շեշտադրումներ եք անում՝ որպես երիտասարդ ռեժիսոր:

-  Կապը հանդիսատես-դերասան շատ կարեւոր է: Եթե դերասանի եւ փոքրիկների միջեւ ստեղծվում է երկխոսություն, ապա ներկայացումը, կարելի է ասել, հաջողված է: Այս դեպքում ստեղծվել էր խաղ, ինչն իմ կողմից միտումնավոր էր արվել. երեխաներին դա դուր է գալիս: Հանդիսականներից շատերը չեն տիրապետում ռուսերենին, բայց ներկայացումից դուրս են գալիս տպավորված, քանի որ ներգրավվում են այդ խաղի մեջ: Մեր դերասաններն անգամ ժեստերով են փորձում հասկանալի դառնալ նրանց համար: Ի դեպ, օգտվելով առիթից ասեմ, որ ինձ հաճելի էր աշխատել դերասանական խմբի հետ. բոլորից շնորհակալ եմ: Կես բառից իրար հասկանում էինք: Մեր փորձերն անցնում էին հաճելի աշխատանքային մթնոլորտում:

Ինձ շատ օգնեցին Նունե Կիրակոսյանը (պարուսույց), Հասմիկ Ավագյանը (զգեստների նկարիչ), Արթուր Հարությունյանը (բեմանկարիչ): Իրենց էլ հատուկ շնորհակալություն:

-  Ի՞նչ նոր մտահղացումներ ունեք առաջիկայում:

- Առաջիկայում դարձյալ փոքրիկների համար նոր ներկայացում եմ բեմադրելու՝ Ամանորի հեքիաթ: Այստեղ էլ կլինեն վառ կերպարներ, երգ եւ պար… Սա է, որ գրավում է փոքրիկին: Մտահղացումներ, ծրագրեր շատ կան, բայց առայժմ վաղ է նրանց մասին խոսելը: Ճիշտ է, մտահղացումներից մեկը ինձ հանգիստ չի տալիս՝ նույնիսկ երազում… Հայրիկիցս եմ ժառանգել. նա էլ անգամ քնած ժամանակ աշխատում է… Հուսամ՝ ամեն ինչ հաջողությամբ կպսակվի:

ՀՐԱՆՏ ՍԱՐԱՖՅԱՆ