«Մեր կողմից ճիշտ չի լինի Արցախյան հիմնախնդրի լուծումը ուղղորդել ինչ-որ մի կետի»

«ՄԵՐ ԿՈՂՄԻՑ ՃԻՇՏ ՉԻ ԼԻՆԻ ԱՐՑԱԽՅԱՆ ՀԻՄՆԱԽՆԴՐԻ ԼՈՒԾՈՒՄԸ ՈՒՂՂՈՐԴԵԼ ԻՆՉ-ՈՐ ՄԻ ԿԵՏԻ»

Այս օրերին Հայաստանում գտնվող ՌԴ Դաշնային ժողովի Դաշնության խորհրդի նախագահ Վալենտինա Մատվիենկոյի գլխավորած պատվիրակության կազմում է նաեւ խորհրդի միջազգային կոմիտեի ղեկավար, իրավաբանական գիտությունների թեկնածու ԿՈՆՍՏԱՆՏԻՆ ԿՈՍԱՉԵՎԸ, ում հետ «Իրավունքը» զրուցեց Սիրիայում տեղի ունեցող իրադարձությունների եւ հայ-ադրբեջանական սահմանին տիրող իրավիճակի մասին:

–Պարոն Կոսաչեւ, ընդդեմ իսլամական ահաբեկչական խմբավորումների` ռուսական օդուժի կիրառումից հետո, Սիրիայում բոլորովին այլ իրավիճակ ստեղծվեց: Ըստ Ձեզ` ինչպիսի՞ ավարտ կունենա այն:
– Այս պատմությունը կարող է ունենալ բարեհաջող ավարտ` ահաբեկչության տարածումը կանխելով բոլոր պետություններում, որն այսօր ակտիվացել է հատկապես սիրիական տարածքում: Սիրիայում կատարվող դժբախտությունները կանգնեցնելու համար, ինչպես գիտեք, մենք` Ռուսաստանը, որեւէ երրորդ մեկին չենք մերժել եւ պատրաստ ենք փոխհամագործակցության` սկսած Սիրիայի ընդդիմադիր ուժերից, վերջացրած ԱՄՆ-ով: Մենք առաջնորդվում ենք նրանով, որ «Իսլամական պետություն» կոչվող ահաբեկչական խմբավորումը մեր բոլորի ընդհանուր թշնամին է, եւ նրանց դեմ հաջողության կարելի է հասնել միայն փոխհամագործակցությամբ: Իսկ օրերս կայացած Սիրիայի հարցով Վիեննայում 19 երկրների արտգործնախարարների հանդիպումը բավական խոստումնալից էր: Ըստ էության, հանդիպման ժամանակ երկրները եկան կոնսենսուսի, որ Սիրիայի ներքին հարցերը հետաձգվեն, եւ դրանց անդրադարձ լինի հետագայում, որովհետեւ Սիրիայում բոլոր հարցերը պետք է լուծել ոչ թե զուգահեռ, այլ հերթականությամբ: Այսինքն` չպետք է դրանց լուծումները փորձել գտնել միաժամանակ, ինչպես ժամանակին ցանկանում էին անել ամերիկացիները: Հետեւաբար, այստեղ կարծում եմ  շանսեր կան, բայց այն առայժմ ընդամենը շանս է, այս հարցի լուծումը դրված չէ սեղանի վրա ու ոչ էլ փաթեթավորված սպասում է իր լուծմանը:
– Ոչ մեկի համար գաղտնիք չէր, որ Սիրիայում իսլամական ահաբեկչական խմբավորումները ֆինանսավորվում են ամերիկյան-արեւմտյան ուժերի կողմից: Այս առումով ի՞նչ լուծումներ են պետք:
– Մենք չունենք ուղիղ ապացույցներ իսլամական ահաբեկչական խմբերի ֆինանսավորման մասին, բայց փաստ է, որ նրանք զենք ու ռեսուրսներ են ձեռք բերում, որը նրանց փոխանցվում է Սիրիայի օպոզիցիոն ուժերի միջոցով: Խնդիրը նախեւառաջ այն է, որ վերականգնվի Սիրիայի տարածքում օրենքը: Իր ձեռքին զենք պետք է ունենա նա, ով ունի դրա իրավունքը: Եթե մենք հասնենք դրան, մնացյալ հարցերը ընթացքում կգտնեն իրենց լուծումները, բայց արդեն քաղաքական երկխոսության, այլ ոչ թե զենքի կիրառման ճանապարհով:
– Ի դեպ, երկխոսության մասին` չնայած ԵԱՀԿ Մինսկի խմբի ջանքերի, այնուամենայնիվ, հայ-ադրբեջանական սահմանում լարվածությունը չի թուլանում: Ի՞նչ կասեք այս մասին:
– Հարցը չի կարող լուծվել զենքի ուժով: Ռուսաստանն այս հարցում կառուցողական մոտեցում ունի եւ ոչ թե հիմնախնդրի մասնակից, այլ օգնող կողմ է: Կարծում եմ` մեր կողմից ճիշտ չի լինի այս հարցի լուծումը ուղղորդել ինչ-որ մի կետի, որին համաձայն չեն լինի Հայաստանն ու Ադրբեջանը: Մեր առաջադրանքն է ապահովել Հայաստանի եւ Ադրբեջանի երկխոսությունը: Իհարկե, սա գուցե պարզամիտ է հնչում, բայց ուրիշ ճանապարհ չկա:

ՀՐԱՆՏ ՍԱՐԱՖՅԱՆ