ՎԵՐԱԴԱՐՁԻ ԴԱՍԱԿԱՆ ԵՐԱԺՇՏՈՒԹՅԱՆ 8-ՐԴ ՓԱՌԱՏՈՆԸ ԿԵԶՐԱՓԱԿԻ «ՏԱՆԳՈ ԿԱՐԲՈՆ» ԱՆՍԱՄԲԼԸ

ՎԵՐԱԴԱՐՁԻ ԴԱՍԱԿԱՆ ԵՐԱԺՇՏՈՒԹՅԱՆ 8-ՐԴ ՓԱՌԱՏՈՆԸ ԿԵԶՐԱՓԱԿԻ «ՏԱՆԳՈ ԿԱՐԲՈՆ» ԱՆՍԱՄԲԼԸ

Վերադարձի դասական երաժշտության 8-րդ փառատոնն արդեն 8-րդ անգամ հայ հանդիսատեսին եւ  մայրաքաղաքի հյուրերին է ներկայացնում բացառիկ փառատոն, որը դասական երաժշտության զարգացման եւ տարածման խնդրից զատ, նպատակ ունի արտերկրում ապրող եւ ստեղծագործող մեր հայրենակիցներին համախմբելու, նրանց ստեղծագործական ներուժն ու կարողությունները ծառայեցնելու  ի նպաստ Հայաստանի եւ հայկական  մշակույթի զարգացման:

Փառատոնը մեկնարկեց հոկտեմբերի 19-ին եւ  հանդիսատեսին ներկայացավ 5 համերգից բաղկացած համերգաշարով: Փառատոնային համերգների ընթացքում հանդես եկան տաղանդաշատ երաժիշտներ  Սվետլանա Նավասարդյանը /դաշնամուր/, Վահան Մարտիրոսյանը /դաշնամուր, դիրիժոր/, Անի Բատիկյանը /ջութակ, Մեծ Բրիտանիա/ Աստղիկ Վարդանյանը /ջութակ/, Աննա Մայիլյանը /մեցցո-սոպրանո/, Լիլիթ Գրիգորյանը /դաշնամուր, Բելգիա/, Դավիթ Հարությունյան /ջութակ, Ֆրանսիա/, Հայկ Դավթյանը /ջութակ, Ֆրանսիա/, Տոմոկո Ակասական /ալտ,  Ճապոնիա/, Պոլին Բարտիսոլը /թավջութակ, Ֆրանսիա/, Բլանշ Ստրոմբոնին /կոնտրաբաս, Ֆրանսիա/, Լյուսի Բեսսիեն /ջութակ, Ֆրանսիա/, Ցվետելինա Ալաջեմը /ալտ, Ֆրանսիա/, Սոֆի Ռիբրոն /թավջութակ, Ֆրանսիա/, Վերոնիկ Գոտերոնը /կոնտրաբաս, Ֆրանսիա /Լուիզ Ժալյուն /բանդոնեոն, Ֆրանսիա/, Լեանդրո Լակապերը /դաշնամուր, Ֆրանսիա/:

Հանդես եկան այնպիսի երաժշտախմբեր, ինչպիսիք են Հայաստանի Պետական Կամերային Նվագախումբը /գեղարվեստական ղեկավար եւ գլխավոր դիրիժոր` Վահան Մարտիրոսյան/, Նաիրի Լարային Կվինտետը /Ֆրանսիա/, «Տանգո Կարբոն» անսամբլը /Ֆրանսիա/: Առաջին անգամ հայ երաժշտասերներին ներկայացվեց Վերադարձի դասական երաժշտության փառատոնի շրջանակներում ձեւավորված «Վերադարձի Կվինտետ» երաժշտախումբը:

Միջազգային համբավ եւ ճանաչում վայելող երաժիշտները միավորվեցին` ի կատար ածելով Վերադարձի փառատոնի ծրագրային դրույթներից մեկը` հայկական կատարողական դպրոցի առանցքի շուրջ միավորել տարբեր մշակույթների, կատարողական դպրոցների եւ ուղղությունների արվեստագետներին` միջմշակութային երկխոսության, փորձի փոխանակման, հագեցած ստեղծագործական աշխատանքի համար: Որի արդյունքում ստեղծվեց մի նոր երաժշտախումբ, որը Վերադարձի Փառատոնի Կվինտետ անվանմամբ հնարավորություն կունենա ներկայանալու նաեւ արտերկրում:

Փառատոնի եզրափակիչ համերգը, որը կկայանա նոյեմբերի 7-ին, ժ. 19.00-ին Կոմիտասի անվ. Կամերային Երաժշտության Տանը, խորհրդանշում է կյանքի շարունակականությունն ու լավատեսությունը:

Ֆրանսիական Տանգո Կարբոն երաժշտախումբը ձևավորվել է 2012-ին, երբ Փարիզի կոնսերվատորիայում ուսանած տաղանդաշատ երաժիշտներ Դավիթ Հարությունյանը /ջութակ/, Լուիզ Ժալյուն /բանդոնեոն/, Լեանդրո Լակապերը /դաշնամուր/ և Բլանշ Ստրոմբոնին /կոնտրաբաս/, տանգո երաժշտության նոր արտահայտչամիջոցների փնտրտուքով միավորվեցին` ստեղծելով կարճ ժամանակահատվածում լայն ճանաչման արժանացած անսամբլ: Երաժիշտների արհեստավարժության շնորհիվ երաժշտախմբի երկացանկը արագորեն հարստացավ նոր եւ բազմազան ստեղծագործություններով, որը միավորում է ավանդական տանգոյի մասերը խնբի ինքնատիպ ստեղծագործությունների հետ: Յուրաքանչյուր համերգի ընթացքում Տանգո Կարբոնը ստեղծում է մի երաժշտական աշխարհ` փորձելով տարանջատվել տանգոյի  երաժշտության կարծրատիպերից: Եվրոպայում մեծ ճանաչում ունեցող Տանգո Կարբոն անսամբլը  կներկայացնի համաշխարհային տանգոյի գլուխգործոցները, որն իրապես տոն կդառնա բոլոր երաժշտասերների համար: Ջութակահար Դավիթ Հարությունյանը եւ  իր երաժիշտ գործընկերները աշխարհի տարբեր երկրներում շրջագայությունից հետո ելույթ կունենան Հայաստանում` եզրափակելով Վերադարձի Դասական Երաժշտության 8-րդ Փառատոնը:

Փառատոնն անցկացնում է  «Արվեստների պատկերասրահ» մշակութային հիմնադրամը (նախագահ` Մարիամ Շահինյան, տնօրեն` Գարիկ Նազարյան) ՀՀ Նախագահի տիկին Ռիտա Սարգսյանի բարձր հովանու ներքո, ՀՀ մշակույթի նախարարության աջակցությամբ եւ ՎիվաՍել-ՄՏՍ-ի գլխավոր գործընկերությամբ:

Դասական երաժշտության 8-րդ փառատոնն այս տարի նվիրված  է Հայոց Մեծ Եղեռնի 100-րդ տարելիցին:

ԶՎԱՐԹ ԽԱՉԱՏՐՅԱՆ