«ԼԻՆԵԼ ԸՆԴԴԻՄԱԴԻՐ ՉԻ ՆՇԱՆԱԿՈՒՄ ՀԱՅՀՈՅԵԼ ԻՇԽԱՆՈՒԹՅՈՒՆՆԵՐԻՆ»

«ԼԻՆԵԼ ԸՆԴԴԻՄԱԴԻՐ ՉԻ ՆՇԱՆԱԿՈՒՄ ՀԱՅՀՈՅԵԼ ԻՇԽԱՆՈՒԹՅՈՒՆՆԵՐԻՆ»

ՀՀ նախագահ Սերժ Սարգսյանը երեկ հանդիպում է ունեցել Հայաստանի կոմունիստական կուսակցության Կենտկոմի ներկայացուցիչների հետ, ովքեր նախագահին են ներկայացրել ՀՀ Սահմանադրության փոփոխությունների նախագծի վերաբերյալ ՀԿԿ-ի մոտեցումները: Ինչպես նաեւ հանդիպման ժամանակ ՀԿԿ Կենտկոմի առաջին քարտուղար ՏԱՃԱՏ ՍԱՐԳՍՅԱՆԸ Ռուսաստանի Կոմկուսի Կենտկոմի քարտուղար Գ. Զյուգանովի խնդրանքով` ՀՀ նախագահին է փոխանցել Հայրենական մեծ պատերազմում տարած հաղթանակի 70-րդ տարեդարձի կապակցությամբ կուսակցության հուշամեդալը: Այս մասին «Իրավունքի» հետ զրույցում նշեց Տ. Սարգսյանն ու մանրամասներ հաղորդեց մոտ մեկ ժամ տեւած հանդիպումից.

- Իհարկե, հիմնական խոսակցության թեման սահմանադրական բարեփոխումների հարցն էր, որը դեկտեմբերի 6-ին դրված է հանրաքվեի: Մենք տեղյակ պահեցինք ՀՀ նախագահին, որ սահմանադրական բարեփոխումների հայեցակարգը քննարկել ենք քաղկոմում եւ շրջկոմներում, փնջային խորհրդակցություններում: Երկու անգամ քննարկել ենք Կենտրոնական կոմիտեի բյուրոյում, հրավիրել ենք ասուլիս ու հայտնել կոմունիստների հիմնական կարծիքը: Պետք է ասեմ, որ վերջնական մեր որոշումը կայացնելու է Կենտրոնական կոմիտեի պլենումը, որը ղեկավար օրգանն է: Բայց նաեւ շեշտեմ, որ Կենտրոնական կոմիտեի բյուրոյի երկրորդ անգամվա քննարկման ժամանակ Սահմանադրությանն «այո» կամ «ոչ» ասելու հարցում մեծամասնության նժարը թեքվեց դրականի կողմը: Մենք  ՀՀ նախագահին ունեինք նաեւ հարցեր, որոնք ուղղակիորեն վերաբերում էին Կոմունիստական կուսակցությանը, ինչի վերաբերյալ ունեցանք մանրամասն քննարկում: 
– Մասնավորապես ինչի՞ մասին ծավալվեց քննարկումը:
– Մենք ՀՀ նախագահին ասացինք, որ հետնորդներն ենք Սովետական Միության Կոմունիստական կուսակցության, որն ունեցել է շարժական եւ անշարժ սեփականություն: Սակայն հանրապետության անկախությունց հետո այդ բոլորը ապօրինի կարգով իշխանությունները մեր ձեռքից զավթել են: Եվ այսօր կուսակցության Կենտրոնական կոմիտեն եւ քաղկոմ-շրջկոմները` բոլորն աշխատում են վարձակալած սենյակներում: Արդյունքում կուսակցությունը հայտնվել է ծանր ֆինանսական կացության մեջ: Դրա համար խնդրեցինք, որ վերադառնան այդ հարցին եւ հնարավորության սահմաններում նորմալ աշխատանքային պայմաններ ստեղծեն Կոմունիստական կուսակցության գործունեության համար: Մենք նաեւ հարց բարձրացրեցինք Խորհրդային Հայաստանի ստեղծման օրը պետականորեն ճանաչելու հարցի վերաբերյալ, որովհետեւ ՀՀ առաջին անկախ պետության օրը նշվում է, բայց երկրորդ պետության` խորհրդային իշխանության 70 տարիները, որի ընթացքում հանրապետությունը ծաղկեց եւ բարգավաճեց, այսօր մատնվել է անուշադության ու չի նշվում: Ի դեպ, մի քանի անգամ ՀՀ նախագահն էլ է իր ելույթներում նշել Հայաստանի պատմության մեջ Խորհրդային Հայաստանի բարերար դերի մասին, ուստի`  ՀՀ նախագահին առաջարկեցինք, որ հնարավորության սահմաններում անպայման ճանաչվի Խորհրդային Հայաստանի ստեղծման օրը` նոյեմբերի 29-ը, եւ սա չպետք է կապել Առաջին հանրապետության վախճանի հետ: 
– Իսկ հանդիպման ժամանակ անդրադարձ եղա՞վ ՀՀ ներքին եւ արտաքին քաղաքականությանը:
– Այո, եւ մենք եւս մեկ անգամ ընդգծեցինք, որ ողջունել ենք Եվրասիական տնտեսական միության մեջ մտնելու ՀՀ նախագահի ջանքերը: Եվ ռուսական կողմնորոշումը մեզ համար հարցերի հարցն է, հետեւաբար  միշտ կլինենք այն իշխանության կողքին, որն ընդունում եւ փայփայում է հայ եւ ռուս ժողովուրդների բարեկամությունը: Միաժամանակ անդրադարձանք հանրապետության ներսում գոյություն ունեցող թերություններին, իսկ դրական երույթ համարեցինք այն, որ ՀՀ նախագահը սկսել է ավելի մոտիկից զբաղվել մարզերի սոցալ-տնտեսական զարգացման խնդիրներով: Եվ ուզում եմ հավելել, որ լինելով 110-ամյա ընդդիմադիր կուսակցություն` մենք հասկանում ենք, որ լինել ընդդիմադիր չի նշանակում անպայման հայհոյել իշխանություններին, քննդատել` ծնկի բերելու համար: Մեր կուսակցության սկզբունքը հետեւյալն է` քննադատությունը պետք է նպատակ հետապնդի` նպաստելու, օգնելու իշխանություններին` տեսնելու թերությունները եւ վերացնելու դրանք: Այնպես որ, եթե ՀՀ նախագահը, բոլոր հանդիպումների ժամանակ այդքան ուշադիր լսում է եւ աչալուրջ է հարցերի լուծմանը, ինձ թվում է` առաջիկայում հանրապետության վիճակը կլինի առավել լավ:

ՀՐԱՆՏ ՍԱՐԱՖՅԱՆ