Գալուստ Սահակյանը քննադատել է ԱՄՆ դեսպանին

Ազգային ժողովի նախագահ Գալուստ Սահակյանը սուր քննադատության է ենթարկել ԱՄՆ դեսպան Ռիչարդ Միլսի հայտարարությունն այն մասին, որ, եթե Հակակոռուպցիոն խորհուրդը Հայաստանում շոշափելի արդյունքներ չգրանցի, Միացյալ Նահանգները կդադարեցնեն այդ խորհրդին ֆինանսավորել:

Սահակյանի խոսքով՝ որևէ դեսպան իրավունք չունի "մատ թափ տալ՛՛ Հայաստանի վրա.«Օտարներին պետք է հասկանալի դառնա, որ ճնշումների մեխանիզմով հնարավոր չէ խոսել մի ժողովրդի հետ, որը կարողացել է իր ուժերով վերականգնել իր անկախությունը: Մենք բավականին ծանր ժամանակաշրջան ենք ապրել և երբեք չենք երկնչել: Դեսպանը, փաստորեն, իր ոգևորության շրջանակով փորձում է իրադարության որոշակի պայմաններ ստեղծել և ինչ-որ ձևով համարումներ ունենալ: Մենք չենք ընդունում, որ մատ է թափ տալիս, որ մենք ձեզ փող չենք տա, մենք փողի երկիր չենք, մենք ավելի շատ փորձում ենք ազգային խնդիրները լուծել: Պետք է նման տիպի հայտարարությունները կոռեկտ լինեն»:

Գալուստ Սահակյանը հավելեց, որ ամենամեծ կոռուպցիան հենց գերտերություններում է, պարզապես փոքր պետություններում կոռուպցիան հարվածում է հենց շարքային քաղաքացուն:

«Կոռուպցիան այն հրեշը չէ, որ այսպես` աչքով տեսնես ու միանգամից ոչնչացնես, դա պետք է համակարգը այնքան ուժեղանա, ժողովուրդն էլ այնքան գիտակից լինի, որ կոռուպցիայի մաս չկազմի»,- ասաց Սահակյանը: